Wikipedia

Siouxsie and the Banshees

C'l artìcul chè 'l è scrit in Miranduléś Emiliàn


«
Only at night time I see you, in darkness, I feel you. A bride by my side, I'm inside many brides, sometimes I wonder what goes on in your mind, always silent and kind, unlike the others. Fuck the mothers, kill the others, fuck the others, kill the mothers, I'll put it out of my mind because I'm out of my mind with you, in heaven and hell with you. Night shift sisters, await your nightly visitor, they don't bother me, no they don't bother me, cold marble slab submits at my feet with a neat dissection, looking so sweet to me, please come to me. Cold flesh and my cold love, hissing, not kissing, a happy go lucky chap, always dressed in black, he'll come to you.»
(EN)(Nightshift, 1981)
«
A t véd sōl a la nòt, in dal buj, a t sènt. Na mujér da na banda, dèntar gh 'n ò dimóndi, dal vòlti a m admànd cuśa gh'à't in dla tò tèsta, ch'la n diś mai gnint e l'è gintìla, difarènt da chi àtar. Ciùla al màdar, masa chi àtar, ciùla chi àtar, masa 'l màdar, a 'l tir fóra da la tèsta parchè tèg a sòṅ fóra ad tèsta, in Paradìś e a 'l Inféran tèg. Tùran ad nòt surèli, spétand al viśitadōr dla nòt, i n m preòcupan minga, no i n m preòcupan minga, na lastra fréda ad màrmul la tîṅ sù i mè pē cun un taj 'd òrgan fat bèṅ, al m pâr acsè dōls, par piaśér, vîn chè da mè. Carna fréda e al mè amór fréd, a bacàj, a n baś minga, un tisi furtunâ e cuntènt, sèmpar vistî ad négar, al vgnarà da tè.»
(MUD)


I Siouxsie and the Banshees (a s diś [suːzi ænd ðə ˈbænʃiːz]) i èṅ stâ òṅ di grup ingléś più famóś dal gènar cgnusû cuma post-punk e new-wave, in Itàglia definî genericamènt cuma dark.

I tri mèmbar stòric di Siouxsie & the Banshees: Severin, Siouxsie e Budgie

Biugrafìa

Gl'Inìsi (1976-1979)

I Banshees i fâṅ i prim pas in dal famóś "Bromley Contingent", un grupét ad sustenidór ch'i tgnìvan a drē a i Sex Pistols. P'r impinìr un vōd durànt al prim «Festival Internasiunàl dal Punk Rock», i sònan par la prima vòlta a 'l «100 Club» ad Malcolm McLaren, a Lóndra, al 20 ad Setémbar dal 1976.

La prima furmasiòṅ la gh'iva Siouxsie Sioux, scutmàj ad Susan Janet Dallion, a la vóś, Steven Severin a 'l bas, Marco Pirroni (un lundinéś cun di urìgini itagliàni) a la chitàra e Sid Vicious (in séguit basìsta di Sex Pistols) a la baterìa.

In dal Śugn dal 1978 al grup, ch'l iva tòlt in cal mèntar al chitarìsta John McKay e al baterìsta Kenny Morris, al firma un cuntràt cun la cà discugràfica dla Polydor. Sèmpar in c'l an lè a vèṅ fóra al prim sìngul, Hong Kong Garden (ch'al rivarà a 'l sètim pòst in dla clasìfica ingléśa) e anc al prim àlbum The Scream (Al sîg), cun dèntar la cover catìva 'd Helter Skelter di Beatles e al sìngul tedésc Metal Postcard/Mittageisen (in séguit cantàda anc dal grup di Massive Attack in dal 1997) didicâ a 'l artìsta ch'al dava cónt'r i naśìsta John Heartfield. Al disc al sa dascàca dimóndi da i sòṅ punk d'l inìsi (a part al braṅ Carcass, ch'al dascór 'd un maslàr ch'al s inamóra dla carcàsa ch'l è drē a tajàr), cun al canti Switch, Overground, Jigsaw feeling e Mirage ch'i vèran la strada a 'l stil nóṿ dal grup.

«
Someones in cold storage, seeking heinz main courses, craving for a raw love, he'll hide you from the cleaver, he'll hang with you forever, longing for a fresh meat by hook or by crook, you'll be 1st in his book for an impaled affair by hook or by crook, you'll be last in his book of flesh oh so rare. Be a carcass, be a dead pork, be limblessly in love, be a carcrash, be a dead pork, be limblessly in love. Someones left in cold storage, thawed in heinz main-courses, carving for a new tin, he got you with the cleaver, he hung you up forever anticipating new skin»
(EN)(Carcass, 1978)
«
Qualchidòṅ in dal sèli frigurìferi, pascànd i secónd piàt 'd Heinz, deśidèri 'd 'n amōr crûd, al t lugarà da 'l manarèṅ, al restarà tèg par sèmpar, deśidèri ad carna frésca cun al bòni o cun al catìvi, at sarà la prima dla sò lista p'r èsar impalàda cun al bòni o cun al catìvi, at sarà l'ultma in dla sò lista ad carna, oh acsè rara. Èsar na carcàsa, ès'r un ninét mòrt, èsar di pès tajâ inamurâ, èsar na carcàsa, ès'r un ninét mòrt, èsar di pès tajâ inamurâ. Qualchidòṅ al s 'n è andâ via da 'l sèli frigurìferi avénd dasślâ i secónd piàt 'd Heinz, tajànd un baràtul nóṿ, al t à tòlt cun al manarèṅ, al t à impicâ là sù par sèmpar, prima dla pèla nóva.»
(MUD)

'L arìṿ ad Budgie (1979-1980)

Al baterìsta Budgie marè dla Siouxsie

Al secónd àlbum Join Hands (Maṅ śunti) a véd la luś in dal 1979 e al gh'à dèntar la versiòṅ minga dascurtàda, ad vint minùt a 'l incìrca, ad The Lord's Prayer, na canta ch'i Banshees i ìvan sunâ durànt al lōr prim cuncèrt. Al disc al gh'à dimóndi riferimènt leteràri (Blake, Redcliffe e Edgar Allan Poe) cun al chitàri a furmàr un sòṅ dûr abàsta ma minga a 'l punt ad rénd'r-al metal. I braṅ ad punta i èṅ Regal zone, Placebo effect e Playground twist (ùnic sìngul tirâ fóra). Da nutàr pò al braṅ Mother/Oh mein pa pa sunâ tut cun un carillon.

«
Staying alive at five for you to cure my ailments, another soul is saved with your bogus medications. What colour shall we have today? Depends on how you feel I say, consult your research on the media, see blue will calm my hysteria.»
(EN)(Placebo effect, 1979)
«
A stag in muimènt a sinc óri par vùatar par curàr i mè mai, n'atr'anma l'è salva cun al vòstri madśìni patàchi. Che culōr gh'ém-j-a da druàr incō? A dipénd da cum at sènt, a dig, và a pascàr quèl in di mèddia, guàrda chè, al blù al calmarà al mè isterìśum.»
(MUD)

Durànt al tour ingléś a Aberdeen, al 6 ad Setémbar dal 1979, al grup al pèrd a 'l impruvìś John Mc Kay e Kenny Morris. Chi lōr i s éran incasâ parchè al manager di Banshees, Nils, 'l iva vindû un pachét ad disc ad Join hands a un negòsi ch'l i iva finî e al n éra briśa bòṅ ad dar-i a i fans ch'i éran vgnû lè par cumpràr-i firmâ da i dū muśicìsta. Al fat al n gh'andàva minga bèṅ, alóra John e Kenny i s éran mis a dar-i via a gràtis questiunànd-as cun al vendidōr. Sénsa dar dal spiegasiòṅ, lì lōr i s in vànan, tulénd un tréno par Lóndra, lasànd la Siouxsie in di guàj p'r al cuncèrt dla sira. Par sò furtùna i The Cure, al grup da spala, i tìran pò in lung la sò eśibisiòṅ p'r impinìr al vōd, cun Siouxsie e Severin ch'i s śòntan sól a la fîṅ par cantàr The lord's prayer. Finî al cuncèrt, Robert Smith al s śibìs ad tōr al pòst ad McKay méntar Peter Clark, ciamâ Budgie, al s piàsa da drē a la baterìa. Smith al stà sèg in fîṅ a la fîṅ dal tour e pò al lasa 'l pòst a John McGeoch ch'al daśvgnìva da i Magazine.

In dal 1980 a vèṅ rigistrâ al disc nóṿ, ciamâ Kaleidoscope, dimóndi più calm, curâ, dark e pop dal precedènt, cun di sòṅ letrònic e sintetiśadōr a réndar blini tut al canti. Quànd pò al vèṅ fóra al riva subìt a 'l quìnt pòst dal clasìfichi ingléśi, un riśultâ mai vdû prima. I sìngui Happy House e Christine (qvésta chè ispiràda cuma la sò b-side Eve White Eve Black a 'l rumànś "Eve" ad Christine Sizemore ch'al dascór dna dóna cun 22 manéri 'd èsar difarènti) i èṅ sunàdi dimóndi in dal discutéchi dark. In séguit i Red Hot Chili Peppers i aṅ pò sunâ Christine anca lōr in di cuncèrt dal 2001. La dark Tenant, la martlànta Trophy, al divertimènt ad Clockface, la letrònica Red light, la turmintàda Paradise place e la rabìda Skin i impinìsan cum a ś dév al disc.

«
Curse the brain inside it's skull, just a bitch in the manger to the balances of nature, cover me with skin and accuse me of sin but you know what I mean, there's just too many of them, give me your skin for dancing in»
(EN)(Skin, 1980)
«
Al tira di càncar a 'l sarvèl dènt'r al sò tésć, sōl na vaca in dla magnadōra in d'l equilìbri dla natùra, quaciâ-'m ad pèla e dâ pur la cólpa a mè ma a saîv cuś a vój dir, 'l è sōl ch'a gh'n è tròpi ad lōr, dâ-'m la vòstra pèla par balàr-ag dèntar»
(MUD)

In cal mèntar a véd la luś, ma sōl cuma sìngul, al braṅ sìmbul Israel, cun al bas ad Severin sèmpar in prim piâṅ.

Al caplavōr: Juju (1981)

La regìna dla nòt versiòṅ 1986

Juju 'l è al tìtul dal quàrt disc di Siouxsie and the Banshees e al vèṅ fóra in dal Śugn dal 1981, dvintànt òṅ di sò àlbum più bèi, cun un sòṅ che più dark e gòtic a n s pōl minga. I braṅ i dascóran ciàr: al sìngul Spellbound, la danse macabre 'd Halloween, la scarésa 'd Head cut, la canta sìmbul dal dark Night shift, la rabìda Sin in my heart e la catìva Voodoo dolly i n s pōlan minga daśmindgàr facilmènt. Ju-ju al daśvèṅ diretamènt da i cant tribài tradisiunài dla Nigeria e 'l udōr dla magìa négra e dal vudù al s respìra a palmòṅ pîṅ. Da 'l cant suo la Siouxsie la canta cuma na stria cun al diav'l adòs, Severin al n s tira mai indrē quànd a s trata ad far giràr al sò bas ipnòtic, Budgie al martèla cun la sò rumba tribàla méntar McGeogh al dà al sò méj. 'L àlbum, anc se acsè particulàr e difìcil, al fa sèntar anc 'sta vòlta tucànd al sètim pòst dal clasìfichi ingléśi.

«
Now this little voodoo dolly has made you very lazy and you're anaemic from her sucking and when you're dead she'll find another. Better break that little dolly and sling her in the corner, now she's a sorry little dolly such a sorry little dolly. Are you listening to your fear, the beat is coming nearer like that little drum in your ear, transfixing you to your fear, listen...»
(EN)(Voodoo dolly, 1981)
«
Adès cla bambulìna vudù chè la t à fat dvinàr pìgar dabòṅ e 't sē anèmic parchè lē la ciùcia e quànd at sarà mòrt lē la in pascarà 'n àtar. A sarà méj śbragàr-la cla bambulìna lè e butàrla via in un cantòṅ, adès lì lē l'è na bambulìna daspiaśùda, na pìcula bambulìna acsè daspiaśùda. Sē't drē a scultàr la tò paùra? La batarìa l'è drē a vgnir cum un pìcul tambùr in dla tò urécia, la t tîṅ sòdi in dla tò paùra, scólta...»
(MUD)

Sèmpar in dal 1981 a vèṅ fóra la prima racòlta dal grup, Once Upon a Time: The Singles ch'la mét insém i prim déś sìngui vgnû fóra in cal mèntar, quàtar di quài mai rigistrâ in di sò àlbum: Hong Kong garden, The staircase (Mystery), Love in a void e Israel.

A Kiss in the Dreamhouse (1982)

In dal 1982 a véd la luś 'l àlbum nóṿ dla banda ingléśa, A Kiss in the Dreamhouse (Un baś in dla cà di sógn), un disc ch'a ś dastàca da 'l precedènt (a part la canta ch'la vèra al lavōr, Cascade) e al fà vgnir in a mènt sèrti ròbi ad Kaleidoscope cun di sòṅ più curâ, psichedèlic e sperimentài, e di strumènt particulàr cuma sintetiśadōr, arc, viulèṅ, òrgan e campanèi. I sìngui tirâ fóra i èṅ Slowdive e Melt!.

«
You are the melting men and as you melt you are beheaded, handcuffed (in lace, blood and sperm), swimming in poison, gasping in the fragrance, sweat carves a screenplay of discipline... and devotion. So Melt! My lover, melt! She said melt! My lover, melt! Can you see? See into the back of a long, black car, pulling away from the funeral of flowers with my hand between your legs»
(EN)(Melt!, 1982)
«
Tè at sē 'l óm ch'l è drē a dasfàr-as e quànd 't al fà at pèrd la tèsta, pugn stric (in un piś, sangṿ e śbòra), nudànd in dal vlèṅ, tirànd fiâ a fadìga in dal fargōr, in na manéra dólsa a s càmbia al senàri dl'ubidiénsa... e dla devusiòṅ. Alóra dasf-at! Amōr dasf-at! La dgiva, dasf-at! Amōr dasf-at! Pō't védar? Guàrda in dal da drē dla lunga màchina négra ch'la và via da 'l funeràl di fiōr cun la mè maṅ in mèś a 'l tò gambi»
(MUD)

Al tèmp ad Robert Smith (1983-1984)

Robert Smith

A kiss in the dreamhouse 'l è stâ 'l ùltim disc rigistrâ insém a 'l chitarìsta John McGeoch. A 'l sò pòst a riva al leader di The Cure, uriginàri ad Blackpool, Robert Smith e sèg al grup al fà catàr in di negòsi al sìngul Dear Prudence (cover di Beatles). Al vìddeo prumusiunàl 'l è girâ a Venèsia in mèś a i canài.

Al grup al decìd pò ad tōr-as na pàuśa dand vita a dū prugèt difarènt. Fra Mars e Maǵ dal 1983 Robert Smith insém a Steven Severin al rigìstra al disc psichedèlic Blue Sunshine (Al sōl al luśa ad blù) cun al nóm ad The Glove (Al guant), vgnû fóra in Setémbar. Da 'l cant suo la Siouxsie insém a Budgie la gh rispónd cun Feast, un lavōr ch'al pòrta al nóm ad The Creatures.

In cal mèntar, p'r inganàr al tèmp, la cà discugràfica la fà vgnir fóra a la fiṅ ad Nuvémbar 'n àlbum dópi da 'l viṿ ciamâ Nocturne (Nutùran), rigistrâ a la Royal Albert Hall ad Lóndra al 30 ad Setémbar e al prim 'd Utóbar dal 1983. Al disc al gh'à dèntar sédaś braṅ, in mèś a i quài a s pōl catàr di pès cuma Pulled to bits e Eve white/Eve black ch'i èṅ dal vèci b-side dal grup. Dal cuncèrt a gh'n è anc na versiòṅ vìddeo fata bèṅ veramènt.

'L an dòp l'è la vòlta ad Hyæna (Jéna), al sèst disc dal grup, ch'al riva al quindicéśum pòst dal clasìfichi ingléśi, un lavōr misć e cun di arangiamènt baròc. I sìngui i èṅ Swimming Horses (ch'al dascór di cavalèṅ marèṅ e dal fat singulàr ch'i èṅ i masć a parturìr) e la sufisticàda Dazzle. Pîni ad ritm i èṅ pò al canti We hunger e Running town.

«
As the rust creeps, corrosion seeps a rotting seed, eat me - feed me with your belching foul breath, your destructive kiss death, do you hunger for this. The bliss of a sweet kiss, shanghai'ed on a locust flight, the thirst from a vampire bite fills the emptiness inside consuming everything green-eyed, we hunger.»
(EN)(We hunger, 1984)
«
Quànd la ruśna la traśa, la curuśiòṅ la và dènt'r a na rumlìna marsa, magn-um - dà-'m da magnàr cun al tò respìr lèrs ad vòmit, al tò baś ad mòrt ch'al śbraga, gh'à't fam ad qvést chè? Al piaśér màsim 'd un baś dōls, muntâ sù in sal vōl dna cavaléta, la sē dal mòrśag 'd un vampîr l'impinìs al vōd ch'a gh'ò dèntar ch'al frusta tut i quèi cun i òć vérd, nuàtar a gh'ém fam.»
(MUD)

Cun cal lavōr chè però a finìs par sèmpar la culaburasiòṅ fra Smith e la Siouxsie, cun al cantànt ch'al tórna definitivamènt cun i sò Cure.

La fiṅ di an Utànta (1985-1989)

La Siouxsie in di prim an Utànta

Cun al chitarìsta nóṿ John Valentine Carruthers, in d'l Avrìl dal 1986 al grup al dà a la luś al disc Tinderbox ch'al gh'à dènt'r òt braṅ in mèś a i quài i s càt'n i sìngui Candyman e Cities in Dust, quésta chè pinsàda durànt un viàś in Itàglia a Pumpèi. In cupertìna a s véd na figùra 'd 'n uragàṅ in vióla. La versiòṅ su CD la gh'à però sinc cansòṅ da piò: al b-side di dū sìngui e la versiòṅ ślungàda ad Cities in Dust. In dal 2009 a s pōl catàr n'àtra versiòṅ rimasteriśàda dal lavór cun al sìngul dal 1987, mai vgnû fóra in s'n àlbum fiṅ lè, Song from the Edge of the World e al braṅ inèdit Starcrossed scrit in dal Maǵ dal 1985 par Steven Severin.

«
Water was running, children were running, you were running out of time, under the mountain, a golden fountain, were you praying at the Lares shrine? But oh your city lies in dust, my friend, we found you hiding we found you lying, choking on the dirt and sand.»
(EN)(Cities in Dust, 1986)
«
L'àqua la curìva, i putèṅ i curìvan, tè at curìṿ fóra da 'l tèmp, sóta a 'l muntàgni, na funtàna duràda, sēr-at drē a pregàr a 'l altàr di Lari? Ma oh tuta la sità l'è saplìda in dla pólvra, amìg mio, a-j-ém catâ al tò nascundìli, a-j-ém catâ al tò buśìi, a n tirànd più al fiâ in dla spurchìsia e in dla sàbbia.»
(MUD)

In dal 1987 l'è la vòlta 'd un disc ad cover, Through the Looking Glass (Ad travèrs da 'l spèć) c'n i sìngui This Wheel's On Fire ad Bob Dylan e na versiòṅ fata bèṅ dabòṅ ad The Passenger 'd Iggy Pop druàda cuma siggla in dla traśmisiòṅ 'd Italia 1 Tempi Moderni (Tèmp Mudéran) dla fraréśa Daria Bignardi. Da nutàr pò la canta di Sparks This Town Ain't Big Enough For The Both Of Us e 'l strani Strange Fruit dla Billie Holiday (in du a s sènt na campàna ch'la sòna a mòrt arcurdànt i négar mòrt impicâ a Dixie) e Trust In Me (ch'la daśvîṅ da 'l film ad Walt Disney Al lìbar dla giùngla e l'éra la canta dal sarpènt Kaa).

«
Oh, the passenger, how, how he rides, oh, the passenger, he rides and he rides, he looks through his window, what does he see? He sees the sign and hollow sky, he sees the stars come out tonight, he sees the city's ripped backsides, he sees the winding ocean drive and everything was made for you and me.»
(EN)(The Passenger, 1977)
«
Oh, al pasegēr, cum, cum al gira, oh, al pasegēr, lò al gira e al gira, al guàrda da 'l finastrèṅ, csa véd-al? Al véd al cēl sgnâ e vōd, al véd al stéli alvàr-'s in dal cēl, al véd al stradi pîni 'd curvi su 'l ucèan e a pâr ch'incòsa al sia stâ fat par tè e par mè stanòt.»
(MUD)

In dal 1988 a vèṅ fóra 'l ùltim disc dal grup di an Utànta, Peepshow, ch'l à tucâ al vintéśum pòst in dla clasìfica ingléśa, cui i sìngui Peek-a-Boo (sunàda a 'l cuntràri e druàda in séguit in dal film ad scarésa Jeepers Creepers - Il canto del diavolo), The Killing Jar e The Last Beat of My Heart.

«
Reach out your hands, don't turn your back, don't walk away. How in the world can I wish for this? Never to be torn apart, close to you 'til the last beat of my heart.»
(EN)(The Last Beat of My Heart, 1988)
«
Dasténd al tò maṅ, minga vultàr-at, minga andàr via. Cuma pōl'l èsar ch'in cal mónd chè mè a vója qvést chè? A n sarò mai sćiancàda, tèg in fiṅ a 'l ùltim cólp dal mè cōr.»
(MUD)

In dal 1989 i Crearures i rigìstran 'n àtar disc, Boomerang, ispirâ a 'l eśistensalìśum francéś dal dòpguèra (Pluto drive).

Fiṅ dla córsa (1990-1996)

La cantànta tòlta śò durànt un cuncèrt a Lollapalooza in dal 1991
La Siouxsie da 'l viṿ a Madrid in dal 2008

In dal 1991, an dal matrimòni fra la Siouxsie e Budgie, al grup al fà vgnir fóra al dècim disc intitulâ Superstition (Superstisiòṅ), prudót par Stephen Hague ch'l iva laurâ cun i New Order e i Pet Shop Boys, ch'al dvintarà al lóō più grand sucès cumerciàl. 'L àlbum al gh'à dènt'r i tri sìngul Kiss Them for Me (vindû abasta in di Stat Unî avénd tucâ al vint-a-triéśum pòst in dla Billboard), Shadowtime e Fear (of the Unknown). Cla canta chè la dascór 'd un tisi ch'al s vōl masàr butànd-as śò da un gratacēl ma pò al gh'à na strica pinsàd a quél ch'a vgnarà dòp e al s tira indrē. Al vìddeo 'd apòǵ 'l è dimóndi bèl e 'l è stâ fat parténd da na versiòṅ disco dal braṅ. A la fiṅ a s sènt un stus e a s pōl pinsàr che pò al sa sia spaplâ dabòṅ, sénsa vlér-al a s pōl dar.

«
We all get the strangest feeling when we're standing mighty tall to jump from 17 floors and crash into freefall but then fear carries all, fear of the unknown, fear takes its toll, fear of the unknown. Aware of what will hurt you, you're prepared to remain this way, so sad yet safe with your afflictions, afraid to start a brand new day.»
(EN)(Fear (of the Unknown), 1991)
«
Nuàtar tut a gh'ém cla sensasiòṅ strana quànd a sém prònt in pē par saltàr śò da 'l 17 piàṅ e stablìr-'s a tèra ma pò la paùra la tōś al sōvravènt, la paùra ad quél ch'a n s sà briśa, la paùra la fà véd'r al cònt, la paùra ad qvél ch'a n s sà briśa. Persuàś ad quél ch'a t farà dal mâl, at sē daspòst a star incóra in cla manéra chè, acsè trist ma sicùr in di tò patimènt, cun la paùra ad tacàr un dè tut nóṿ.»
(MUD)

'L an dòp a véd la luś la secónda racòlta ad sìngui dal grup, Twice Upon a Time: The Singles, impurtànta parchè la parmét ad catàr di braṅ mai vgnû fóra in si àlbum quài Fireworks (dal 1982), Dear Prudence (dal 1983), Overground (dal 1984) e Face to Face (dal 1992 ch'la fà part anc dla culòna sunóra dal film ad Tim Burton Batman - Il ritorno). La versiòṅ su CD single ad cla canta chè la gh'à dèntar dal b-side (Hothead e I could be again) ch'i fànan vgnir in a mènt i disc vèć.

«
They say follow your heart, follow it through, but how can you when you're split in two? And you'll never know, you'll never know. One more kiss before we die, face to face and dream of flying. Who are you? who am I? Wind in wings, two angels falling, to die like this with a last kiss.»
(EN)(Face to Face, 1992)
«
I dìś'n ad tgnir a drē a 'l tò cōr, dapartùt, ma cuma pō't quànd at sē divìś in dū? E ta n al savrà mai, ta n al savrà mai. 'N ùltim baś prima 'd murìr, òṅ in frònt a c'l àtar e a sógn ad vulàr via. Chi sē't tè? Chi sòṅ-j-a mè? Vènt in dagl'ali, dū àngil crudâ śò, murìr acsè cun 'n ùltim baś.»
(MUD)

In dal 1994 Siouxsie la fà un duét cun Morrissey dand vita a 'l braṅ Interlude.

In dal 1995 l'è la vòlta ad The Rapture (L'èstaśi), un disc prudót in part (sinc braṅ) par 'l ex mémbar di Velvet Underground John Cale. Al disc al sa spòsta in diresiòṅ 'd un rock-pop difarènt da Superstition (ch'al n iva minga cunvìns dal tut al grup) ma anc da quéi vèć (sōl la cansòṅ Not forgotten la gh'à 'l stîl dark dal pasâ), scuntintànd in cla manéra lè i fans dna vòlta e sénsa cavàr-'g-la a catàr-an sù di nóṿ. I sìngui i èṅ Stargazer e O Baby e 'l è un pcâ che na canta cuma B Side Ourselves, sunàda in séguit anc da 'l viṿ, la sia stada misa da na banda p'r impinìr ch'al sìngul lè e minga in 'l àlbum. La title track l'è na lunga (più 'd ùndas minùt) e cumplésa rapsudìa urchestràla méntar pò in The double life la Siouxsie la n canta minga ma la dascór e la cònta dla vita segréta, dna vita dópia.

«
At the top of the stairs is a locked room, my secret chamber that no outsider views for entry is forbidden prohibited, behind this door is my other self, not a picture in a frame nor a fresh disguise but my other self, immoblie inert and sanguine, my narcissus kisses exhale crimson breath and pump ruby to the lip.»
(EN)(The double life, 1995)
«
In sima a 'l scali a gh'è na cambra saràda, la mè cambra segréta che ninsòṅ àtar 'l à mai vdû parchè 'l è pruibî intràr-ag dèntar, da drē da 'l us a gh'è l'àtra mè part, minga na foto in dla curnìś e gnanc un travestimènt nóṿ ma l'àtra mè part, férma impalàda e véra, i mè baś narcìś i bùtan fóra un respìr róś viṿ e i pómpan dal rusét rubèṅ in di làbar.»
(MUD)

In dal 1996 la séna muśicàla ingléśa la véd nàs'r incóra al dit acsè "punk revival" c'n i Sex Pistols ch'i tórnan insém dòp tant an. I Banshees i batéśan tut cal lavōr lè sōl cuma 'n quèl cumerciàl e cuntràri a 'l spìrit uriginàri dal muimènt. Al grup al decìd acsè ad dar-'g a muć par prutésta durànt na cunferénsa stampa da 'l tìtul "20 minutes into 20 years" (20 minùt in 20 an).

Prugèt da par lōr

La Siouxsie durànt un sò tour da par lē

Di tri mémbar stòric, Siouxsie e Budgie i cuntìnuan cun al lōr prugèt Creatures, faghénd vgnir fóra in dal 1999 'l àlbum Anima Animus pinsâ cun l'idea Transgender, méntar Severin al mét in pē na sò cà discugràfica ad mùśica letrònica sperimentàla.

In di an an 2000, sóta 'l nóm ad Siouxsie & the Banshees, i vénan fóra na racòlta ad quàtar CD cun tuti al b-side e canti difìcili da catàr (Downside Up dal 2004), un disc da 'l viṿ cun la registrasiòṅ 'd un cuncèrt a surpréśa tgnû a Lóndra in dal Luj dal 2002 (The Seven Year Itch cun in lista al cansòṅ dal grup cgnusùdi manc cuma Lullaby e I Could be again) e al sesiòṅ di an Stanta par la BBC (Voices on the Air: The Peel Sessions).

In dal 2003 la regìna dla nòt la vèṅ ciamàda par cantàr in dla title track d'l àlbum Kish Kash di Basement Jaxx: al lavōr al vins un Grammy Awards.

In dal 2007 pò Siouxsie, che in cal mèntar la s éra divìśa da sò marè e l'éra andàda a vìv'r in Frància, la taca na caréra da par lē faghénd vgnir fóra 'l àlbum Mantaray.

Mémbar

La Siouxsie tòlta śò a Piśa in dal 2008

Qvéi stòric

Àtar mémbar

Discugrafìa

Àlbum

Live

Racòlti

EP

Sìngui

  • 1978 - Hong Kong Garden
  • 1979 - The Staircase (Mystery)
  • 1979 - Playground Twist
  • 1979 - Mittageisen
  • 1980 - Happy House
  • 1980 - Christine
  • 1980 - Israel
  • 1981 - Spellbound
  • 1981 - Arabian Knights
  • 1982 - Fireworks
  • 1982 - Slowdive
  • 1983 - Melt!
  • 1983 - Dear Prudence
  • 1984 - Swimming Horses
  • 1984 - Dazzle
  • 1984 - Overground
  • 1985 - Cities in Dust
  • 1986 - Candyman
  • 1987 - This Wheel's on Fire
  • 1987 - The Passenger
  • 1987 - Song from the Edge of the World
  • 1988 - Peek-a-Boo
  • 1988 - The Killing Jar
  • 1988 - The Last Beat of My Heart
  • 1991 - Kiss Them for Me
  • 1991 - Shadowtime
  • 1991 - Fear (of the Unknown)
  • 1992 - Face to Face
  • 1995 - O Baby
  • 1995 - Stargazer

Culegamènt estéran

Estratto da "https://eml.wikipedia.org/w/index.php?title=Siouxsie_and_the_Banshees&oldid=156103"