Jeepers Creepers - Il canto del diavolo
|
C'l artìcul chè 'l è scrit in
Miranduléś |
 Jeepers Creepers
| ||
| Jeepers Creepers - Il canto del diavolo | ||
 Al Creeper in na figùra dal film | ||
| 'D un Dio! - Al cant dal Diàvul 2001 | ||
|---|---|---|
| Regìa: Victor Salva | ||
| Scritōr: Victor Salva | ||
| Atōr: Gina Philips • Justin Long • Brandon Smith Jonathan Breck • Patricia Belcher • William Haze Eileen Brennan • Tom Tarantini • Peggy Sheffield | ||
| Müsica: Bennett Salvay | ||
| Léngua: Ingléś | ||
| Dürä dal film: 90 minüt | ||
| Nasiōṅ: Stat Unî • Germàgna | ||
Jeepers Creepers - Il canto del diavolo 'l è 'n film ad scarésa americàṅ e tedésc dal 2001 scrit e dirèt par Victor Salva. Custâ 10 migliòṅ ad dòlar, al 'n à pò ciapâ siē vòlti tant, dand vita 'l an dòp anc a 'n séguit, Jeepers Creepers 2 - Il canto del diavolo 2. Jeepers Creepers, in dal slang americàṅ, a vōl dir Geśù Crist p'r indicàr, in na manéra eufemìstica, un quèl 'd armàgn'r-ag par la surpréśa dònca al pōl èsar tradót cun 'l Emigliàn «’D un Dio!».
In dla culòna sunóra i s càt'n i braṅ Jeepers Creepers ad Paul Whiteman e Peek-A-Boo di Echo 3, cover di Siouxsie and the Banshees.
Sunt
Finìdi al vacànsi ad Primavéra, la Patrisha Jenner dita "Trish" (Gina Philips) e sò fradèl Darius dit "Darry" (Justin Long) i s mét'n in màchina par turnàr a cà. Tut 'd un trat da drē a riva 'n vèć camiunàs maròṅ Chevrolet 1941 ch'al và a tuta bala e ch'al taca a sunàr al clàcson in cuntinuasiòṅ par dmandàr-ag stràda. Dòp avér-al lasâ pasàr, chi lōr i tàc'n a dascórar di dū di sò amìg ch'i ìvan pardû la vita in 'n incidènt da pìcui. Cuntinuànd al viàś, i fradèi Jenner i càt'n incóra cal tir là parchegiâ da na banda. Al camiunìsta 'l è drē a traplàr quèl: 'l insfìlsa na ròba anvlupàda par bèṅ dént'r un tub e al fagòt 'l è tut maciâ ad rós! Cardénd ch'al sia sangṿ, spavintâ i dū i próan a ciamàr la pulisìa ma 'l telefunèṅ 'l è dascàrag e alóra i scàpan via. C'l àtar là però al gh và a drē e al gh dà di cuć par far-ag far 'n incidènt. La màchina la sa śbraga e la finìs śò da la strada, cun al càmion ch'al cuntìnua drit.
Darry al decìd ad turnàr indrē cun sò surèla par védar cuśa 'l iva mis in dal tub e al gh cata déntar sōl di sórag. Purtròp par lōr lè 'd intóran i s imbat'r-an in na sfilaràda ad cadàvar nûd e imbalsamâ. L'è òpra dal Creeper, 'n èsar dal demòni ch'al tórna in sla Tèra quànd i pàsan vint-a-tri an par magnàr dla carna umàna ad cuntìnuṿ par vint-a-tri dè par tiràr-as sù.