Le avventure di Joe Dirt
|
C'l artìcul chè 'l è scrit in
Miranduléś |
 Joe Dirt
| ||
| Le avventure di Joe Dirt | ||
 David Spade in na figùra dal film | ||
| Gl'aventùri 'd Joe Muśnènt 2001 | ||
|---|---|---|
| Regìa: Dennie Gordon | ||
| Scritōr: David Spade • Fred Wolf | ||
| Atōr: David Spade • Brittany Daniel • Dennis Miller Adam Beach • Christopher Walken • Carson Daly Kid Rock • Erik Per Sullivan • Jaime Pressly Brian Thompson • Michael Arturo • Angela Paton Gordon Michaels • Rosanna Arquette • Fred Wolf Blake Clark • Caroline Aaron • Natalia Cigliuti | ||
| Müsica: Waddy Wachtel | ||
| Léngua: Ingléś | ||
| Dürä dal film: 91 minüt | ||
| Nasiōṅ: Stat Unî | ||
Le avventure di Joe Dirt (Gl'aventùri 'd Joe Muśnènt) l'è na cumèdia americàna dal 2001 ad Dennie Gordon ch'la cònta gl'aventùri in gir par l'Amèrica 'd 'n espunènt dal white trash ciamâ “Joe Dirt” (“Joe Lercio” in Itagliàṅ) ch'al pésca i sò genitōr.
La pelìcula, ch'la gh'à abû 'n séguit in dal 2015 da 'l tìtul Joe Dirt 2 - Sfigati si nasce, l'à fat sù trént'òṅ migliòṅ ad dòlar dòp ès'r-an custàda gnanc daśdòt.
Sunt
Joe (David Spade) 'l è 'n śōvan buletàri cun 'n asènt dixie dimóndi pēś e na patnadùra a la mullet ch'al riva a Los Angeles par far al pulisìi in dal palàs dna ràdio califurgnàna guidànd la sò màchina scasàda miténd sù a tuta Sweet Home Alabama di Lynyrd Skynyrd. Chi lò al n sà gnanc al sò cugnóm, anc se tut i al ciàman “Muśnènt”, parchè da pìcul i sò genitōr i 'l ìvan bandunâ durànt na gita a 'l Grand Canyon.
Un dè al prudutōr Freddy (Fred Wolf) al gh buta 'l òć adòs e 'l decìd ad far-ag far n'intervìsta in dal prugràma ràdio 'd sucès dla matìna dal disc jockey Zander Kelly (Dennis Miller). Chi lò al taca a far-ag cuntàr la sò vita da sfigâ e Joe al s vèra dabòṅ dgénd ch'in cô al gh'à na pirùca parchè quànd 'l è nâ al sò crani al n éra briśa sarâ dal tut e dònca sò màdar al vliva quaciàr-al ma pò c'n al tèmp la s è tacàda a la pèl e adès la n vîṅ più via. Dòp èsar stâ bandunâ quànd al gh'iva òt an, 'l à girâ soquànti famìji in afidamènt finénd pò a Silvertown, un paiśèṅ dla west coast in du 'l à cgnusû la bèla Brandy (Brittany Daniel) e 'l sò caṅ Charlie prima che cal brut grintèṅ ad Robby (Kid Rock) al gh dis adòs parchè al vliva métar-'s insém lò a la Brandy.
In séguit, vlénd catàr i sò genitōr, Joe al s éra mis a giràr i Stat Unî finénd prima in dal Mèsic Nóṿ, in du 'l à cgnusû 'n natìṿ americàṅ ciamâ Ala ch'la tira i cals (Adam Beach) ch'al vindìva di petàrd in dal deśèrt, e pò in dal Dakòta dal Nòrd in du al s éra mis a lauràr da uperàj in un sit in du a s tiràva sù al petròli prima 'd èsar casâ via dòp gnanc un dè. In Indiàna 'l è andâ in a risć 'd èsar cupâ da 'n sasèṅ seriàł c'n al visi 'd vistìr-as da dóna ciamâ Buffalo Bob (Brian Thompson) ch'al gh vliva tiràr via la sò pèl. Chi lò, in dal dè dal sò bandòṅ in Ariśòna, al s catàva là sèg in gita. Prima 'd èsar salvâ par la pulisìa, Joe 'l iva però fat in tèmp a purtàr via soquànt foto da la sò cà in du a s vdiva la màchina di sò genitōr cun na targa dla Luiśiàna. Fat un salt in dal sud fónd a New Orleans, al cgnós in dla scōla in du al s éra mis a far al bidèl 'n èx mafióś pintî 'd New York, Clem Doore (Christopher Walken), ch'al s cata là sóta quaciadùra prutèt par la pulisìa.
Mént'r al fà 'n nùmar cun 'n aligadōr, laurànd in dal parc dla Charlene (Rosanna Arquette), a gh vîṅ finalmènt in mènt al cugnóm di suo, qvél ch'la druàva sò surèla (Megan Taylor Harvey) par tōr-'l in gir, Nunnamaker. Faghénd 'l incróś cun qvéi ch'i aṅ cumprâ na Rambler Wagon in alóra al riva a la sità 'd Baton Rouge.