Barbora Strýcová

C'l artìcul chè 'l è scrit in Miranduléś

La Barbora Strýcová (Plzeň, 28 ad Mars dal 1986, a s lèś [ˈbarbora ˈstriːtsovaː]), cgnusùda in pasâ anc cuma Barbora Záhlavová-Strýcová in fiṅ tant ch'l'éra spuśàda cun Jakub Zahlava ^[1], l'è na tenìsta céca prufesiunìsta da 'l 2003. L'è élta 164 cm e la péśa 60 chilo. La dróa al bras dèstar e la tira 'l arvèrs a dū maṅ. L'à tacâ a śugàr a tènis a sinc an.

Al film ch'a piàś da piò 'l è Grease. In dal tèmp lìbar la s divertìs anc a nudàr e a siàr.

In dla sò caréra 'l à vins un tìtul WTA (cun anc dū finàli) e nóṿ ad qvéi ITF in singulàr. In dópi, in dua l'è deciśamènt più fòrta, invéci l'à mis in bisàca darsèt tìtui WTA e nóṿ ad qvéi ITF.

Caréra

La céca la taca a far-as cgnósar in dal sircùit WTA in dal 2004 quànd, pasànd p'r al qualificasiòṅ, la riva a 'l secónd tùran a gl'Australian Open e in di utàṿ a Indian Wells baténd l'Eleni Daniilidou e l'Iveta Benešová prima 'd lasàr-'g al péni cun la Justine Henin, nùmar òṅ dal mónd, par 3-6 4-6. La riva a 'l tèrs tùr'n anc a Amelia Island dand la paga a la Melinda Czink e a l'Anna Smashnova par pò pèrdar da l'Amélie Mauresmo. In Maǵ in tèra francéśa la fà i quàrt a Straśbûrg e al secónd tùran a 'l Roland Garros. In Agóst, dòp na stagiòṅ deludènta in sl'èrba, la vèṅ misa sóta da la Mashona Washington a Montreal. In Aṿtòṅ la gh la cava a rivàr in semifinàl a Cantón baténd la Dinara Safina in di quàrt ma pò la céd a la Martina Suchá 2-6 5-7. La finìs 'l an in belésa cun al tìtul ITF mis in dal bisachèṅ a San Rafaèl, 6-1 6-2 a la francéśa padròna ad cà Stéphanie Cohen-Aloro, e la riva a èsar la nùmar sinquànta-siē dal mónd.

Al sò 2005 al và pèś par lē ch'la n cumbìna gnint in Austràglia e pò la ciàpa dū scòpli in di quàrt a Bugutà e a 'l prim tùran a Indian Wells da gl'itagliàni Flavia Pennetta e Antonella Serra Zanetti. In Maǵ la và sóta a 'l secónd tùran a Rabat in Maròc cun la Tathiana Garbin par 4-6 4-6 e a 'l prim tùr'n a 'l Roland Garros cun l'Elena Dement'eva par 3-6 3-6. In di àtar Grand Slam la céd a 'l secónd tùran a Wimbledon a la Dinara Safina par 2-6 2-6 e subìt cun la Marion Bartoli a gl'US Open par 3-6 0-6. La cróda acsè śò a la puśisiòṅ 142. In dal 2006 la gh'à tròp pôc punt par śugàr diretamènt in di turnèo WTA e quànd la gh próa pasànd p'r al qualificasiòṅ da spés la n i pasa briśa. La céca la s adàta acsè a pistàr i camp ITF ma anca lè la cumbìna pôc, cuma in qvél ad Cavriōl in dua la pèrd 3-6 1-6 in di quàrt da la carta salvàdga nùmar 331 dal mónd Sara Errani.

In dal 2007 la và a śugàr al sò prim turnèo WTA dla stagiòṅ a Bugutà in dua la pèrd in di quàrt da la Tathiana Garbin par 2-6 5-7. In Avrìl la s qualìfica p'r al turnèo ad Charleston ma pò la và fóra subìt, 5-7 1-6 da la Shuai Peng. Stés parcōrs anc a Esturìl ma lè l'è la Nastas'sja Jakimava a mandàr-la a cà par 6-2 4-6 3-6. I prim tùr'n i cuntìnuan par lē anc a Praga (2-6 5-7 da la Klára Zakopalová) e a Wimbledon (4-6 6-7 da la Tamira Paszek). In Luj e in Setémbar la s ardûś a śugàr dū ITF a Petange e a Mèstar pardénd in di quàrt da la Pauline Parmentier e da l'Alisa Klejbanova. La finìs 'l an pardénd in dla semifinàl dal turnèo ITF ad Deauville da la Kirsten Flipkens srand acsè la stagiòṅ a 'l nùmar 156 dal mónd.

In dal 2008 la Barbora la riva in finàl in d'l ITF ad Stucólma ma la la pèrd cun la Johanna Larsson par 6-0 1-6 6-7. A gh và méj a Fort Walton Beach, ITF da vintsìnc-mila dòlar in di Stat Unî, in du a vins lē su la Melanie Oudin cun al puntéǵ ad 6-3 5-7 7-6. In Mars a Redding l'è l'Aleksandra Wozniak a finìr sóta i sò cōlp par 7-6 6-3 e la céca la pōl acsè tiràr fóra dal frigo al spumànt p'r al sò secónd tìtul ITF d'l an. La tórna a śugàr dū WTA a Amelia Island e a Charleston faghénd sèmpar secónd tùran pardénd da la Marija Šarapova e da la Katarina Srebotnik. In Maǵ la s mét in bisàca 'n àtar ITF in Pulògna e pò in Luj la riva a 'l tèrs tùr'n a Wimbledon in dua la patìs un 2-6 4-6 da la Svetlana Kuznecova. La sèra la stagiòṅ cun gl'ITF ad Bratiślàva e ad Cracòvia. In dal prim turnèo la pasa a fadìga insìma a la Bovina 6-7 7-6 6-3 par pò cédar a la Petra Kvitová, in Pulògna invéci la ciàpa na scòpla mia da rìdar da l'Angelique Kerber in di quàrt, 0-6 1-6.

A 'l inìsi dal 2009 la śōga a Auckland, Melbourne e Bugutà ma la vins sōl 'n incóntar, al prim, cun la Virginie Razzano. A Acapûlc la riva in semifinàl (0-6 3-6 da la Venus Williams) mént'r a Monterrey, dòp avér pigâ la Flavia Pennetta par 7-6 2-6 6-4, la s férma in di quàrt ad òpra dl'Iveta Benešová cun al puntéǵ ad 5-7 4-6. In dal rèst dla stagiòṅ la śōga da schiva, a n cavànd-'g-la mai a vìnsar da piò dna partìda ad fila. La s tira 'n pôc sù in dal turnèo ad Bad Gastein in Luj in dua la riva in di quàrt cun l'Alizé Cornet. A gl'US Open la pasa 'l qualificasiòṅ par pò pèrdar a 'l secónd tùran da la Viktoryja Azaranka 2-6 1-6. Da la fiṅ 'd Utóbar a 'l inìsi ad Nuvémbar la tōś part a dū turnèo ITF che pò la vins, a Urtìśèi (7-6 6-3 a la Klára Zakopalová) e a Ismaning (6-4 4-6 7-6 a la Kristina Barrois).

In dal 2010, dòp na prima part dla stagiòṅ da daśmindgàr, la riva in semifinàl in d'l ITF da sènt-mila dòlar ad Marsìglia (6-2 3-6 1-6 da la Klára Zakopalová) e pò a 'l tèrs tùran a Wimbledon in dua la céd par 5-7 3-6 a la Marija Šarapova. In Luj la céca la pèrd da la Lucie Šafářová in di quàrt ad Båstad e pò in finàl a Praga cun l'Ágnes Szávay ch'la gh'à la méj sèg par 6-2 1-6 6-2. A gl'US Open la và a cà subìt cun la Marija Kirilenko e la fà cumpàgn cun la Sara Errani a Tokyo e cun l'Alexandra Dulgheru a Pechîn. In Utóbar invéci la riva a 'l secónd tùran a Linz e in Lussembûrgh, pardénd da l'Ana Ivanović par 3-6 2-6 e da la Roberta Vinci par 6-7 6-4 6-7. La sèra 'l an a la puśisiòṅ nùmar ssanta-sèt.

In dal 2011 la riva in di quàrt in dal prim turnèo d'l an, qvél ad Brisbane, ma la gh'à pò da lasàr strada a la Marion Bartoli par 2-6 1-6. A Sydney la s qualìfica dand un 6-4 6-3 a la Petra Martić e pò la manda a cà anc la Nadia Petrova prima ad lasàr strada a Kim Clijsters par 1-6 4-6. A gl'Australian Open la riva a 'l tèrs tùran (2-6 1-6 da la Na Li) mént'r a Parì a 'l quèrt la pèrd p'r un pēl cun la Petra Kvitová, 9-11 in dal tie-break dal tèrs sét. La Barbora la s tōś l'arvìndida sèg a Indian Wells, mandànd-l' a cà par 3-6 6-2 7-5, par pò far al valìś anca lē cun l'Ana Ivanović par 2-6 2-6. A Miami la bat la Sloane Stephens 6-4 6-2 prima ad vgnir sćiancàda par 1-6 0-6 da l'Agnieszka Radwańska. In sla tèra vérda ad Charleston la pèrd in di utàṿ par 6-7 6-7 da la danéśa nùmar òṅ dal mónd, la Caroline Wozniacki. In sal rós la śōga a Barcelóna, Madrid, Róma e Roland Garros e la n è bòna ad vìnsar gnanc 'n incóntar. A Wimbledon invéci la bat l'Aleksandra Wozniak par 7-6 6-4 ma pò la vèṅ misa sóta da la Francesca Schiavone par 5-7 3-6. In Luj a Båstad la riva in semifinàl, baténd prima la Nastas'sja Jakimava e pò la Flavia Pennetta, ma pò la céd a la Polona Hercog par 2-6 6-4 5-7. Dòp un deludènt US Open (prim tùran cun la Petra Martić), la céca la vins al sò prim tìtul WTA a Quebec City in dua però la bat sōl dal śugadōri da 'd là da la puśisiòṅ sènt in clasìfica, a part la Marina Eraković (nùmar 85) batùda in d'l ùlt'm incóntar par 4-6 6-1 6-0. Cun i 280 punt purtâ a cà, la céca la riva a èsar la nùmar quarànta-siē dal mónd, tirànd-as sù ad vint-nóṿ pòst. In di quàtar turnèo a vgnir però la vins sōl na partìda.

La céca la partìs in dal 2012 cun dū secónd tùran a Brisbane (6-7 0-6 da l'Andrea Petković) e a gl'Australian Open (0-6 4-6 da la Serena Williams). A Parì, Doha e Dubai invéci la fà 'l valìś subìt cun la Mona Barthel, l'Iveta Benešová e l'Arantxa Rus. A Indian Wells, Miami e a Charleston la bat l'Ayumi Morita, la Vera Duševina e la Camila Giorgi ma pò la pèrd cun la Petra Kvitová, cun la Caroline Wozniacki e cun l'Aleksandra Wozniak. In Maǵ la céd in di quàrt a Bùdapest a la Marina Eraković par 2-6 6-1 4-6, dand vita a na sfilaràda ad siē scunfìti ad fila. Il Luj la và in Itâglia a śugàr in sla tèra rósa ad Bjèla (ITF) e a Palèrum. In Piemånt la bat la Caroline Garcia e la Julija Putinceva prima ad cédar a la Nastassja Burnett in di quàrt. In Sicìglia invéci la riva in finàl (dand la paga a la Julia Görges e a la Laura Robson) in dua però la pèrd da la Sara Errani par 1-6 3-6. La sò stagiòṅ 'd élt e bas la cuntìnua par lē cun siē prim tùr'n ad fila, prima ad far i quàrt a Quebec City (3-6 4-6 da la Mona Barthel). I sò ùltim turnèo WTA śugâ in Setémbar e in Utóbar e i èṅ qvéi ad Tokyo, Linz e Lussembûrgh e i vaṅ via anc in présia, cun la céca ch'la gh'à la pèś cun la Roberta Vinci 4-6 6-4 5-7, cun l'Andrea Petković 6-7 2-6 e cun l'Annika Beck 7-5 6-7 2-6.

La taca la stagiòṅ 2013 dimóndi tard par via dna squalìfica par doping ad siē méś. La Barbora la tórna a pistàr i camp dal sircùit WTA in Avrìl in sla tèra rósa a 'l quèrt ad Stucàrda andànd però fóra subìt cun la Mirjana Lučić par 6-1 3-6 5-7. Par far sù di punt la śōga dū ITF in Maǵ vinsénd-an òṅ in Śluvàcchia cóntar la Karin Knapp par 6-2 6-4. A 'l Roland Garros, dòp avér pasâ 'l qualificasiòṅ, la céd subìt a la Bojana Jovanovski par 3-6 2-6. In Śugn in d'l ITF ad Nottingham (al nùmar dū) la fà dvintàr mata la Sema a 'l prim tùran e pò la manda a cà anc la Samantha Murray, prima ad far al valìś in di quàrt cun l'Elena Baltača par 4-6 4-6. A Wimbledon la Strýcová la pèrd a 'l secónd tùran par 5-7 3-6 da la Cvetana Pironkova e la fà cumpàgn anc a Palèrum in dua la céd a la Sara Errani par 3-6 2-6. La stmana dòp la śōga 'n ITF a Olomouc da sènt-mila dòlar, pardénd in semifinàl da la pulàca Katarzyna Piter par 4-6 7-5 4-6.

Culegamènt estéran

Nòti

↑ Strycova, vìnsida a la purtàda Il Veggente, 15 ad Luj dal 2015

[1] Strycova, vìnsida a la purtàda Il Veggente, 15 ad Luj dal 2015

[1]