Austràglia

C'l artìcul chè 'l è scrit in Miranduléś

L’Austràglia (Australia in Itagliàn, Australia in Ingléś, a s lèś /əˈstreɪljə/) l'è 'n stat dl'Uceàgna cun capitàla Canbèrra. I sò abitànt, gl'Austragliàṅ, i èṅ da spés ciamâ anc “Aussie”. Sōl al 2% i èṅ uriginàri dal pòst, difàti p'r al 90% i daśvènan da l'Europa (45,26% britànic, 9,08% irlandéś, 4,29% itagliàṅ e 4,09% tedésc i grup più impurtànt) e par 'l 8% i rìvan da l'Àśia.

La cònta vint-a-tri migliòṅ 'd abitànt a 'l incìrca par na superfìsi ad 7.617.930 km², dagnóra tut deśèrt, ch'la la mét cuma 'l sèst paéś più grand a 'l mónd. L'è furmàda da 'l Mainland, l'ìśula più granda, da la Taśmàgna e da di atri ìśuli più pìculi. I sò mâr i èṅ al Mâr ad Tìmor, al Mâr di Arafùra, al Mâr di Curài e al Mâr ad Tàśman. Inóltar la gh'à 'l Ucèan Pasìfic a èst e 'l Ucéan Indiàṅ a òvest.

Al prim minìstar 'l è Tony Abbott méntar la sò munéda l'è al dòlar austragliàṅ. La tōś al nóm da 'l Latîṅ “australis” ch'a vōl dir “meridiunàł”. In dal 1606 'l è 'l navigadōr ulandéś Willem Janszoon a 'duciàr-la par prim in fiṅ tant ch'in dal 1770 al tenènt ad marìna britànic James Cook al la vōl p'r al sò paéś par purtàr-ag di parśunēr. Sōl in dal XX sècul l’Austràglia la dvènta 'n stat indipendènt ma sèmpar ligâ a 'l Commonwealth.

Al bèsti più famósi dl’Austràglia i èṅ al cangûr e al koala.

Al sità

Lista ad soquànti dal sità più impurtànti dl'Austràglia

Sydney
(abitànt 4.336.374)
Melbourne
(abitànt 3.806.092)
Perth
(abitànt 1.554.769)
Adelàide
(abitànt 1.158.259)
Brisbane
(abitànt 957.010)
Gold Coast
(abitànt 591.473)
Canbèrra
(abitànt 388.072)
Hobart
(abitànt 217.973)
Darwin
(abitànt 117.395)