Melanie Oudin
|
C'l artìcul chè 'l è scrit in
Miranduléś |
La Melanie Oudin (Mariéta, 23 ad Setémbar dal 1991) l'è stada na tenìsta americàna, prufesiunìsta da 'l 2008. L'è élta 168 cm e la péśa 59 chilo. La dróa al bras dèstar e la tira 'l arvèrs a dū maṅ. L'è stada badśàda cuma “American Sweetheart” (la còca dl'Amèrica)[1] [2]. In dla sò caréra la gh'à abû di prubléma a 'l cōr[3] e par cal mutìṿ chè l'è stada custréta a ritiràr-'s a sōi vint-sinc an[4].
La Melanie l'è stada bòna 'd vìns'r un tìtul WTA e siē ad qvéi d'l ITF rivànd a èsar la nùmar trént'òṅ dal mónd al 19 'd Avrìl dal 2010. Insém a Jack Sock l'à vins al tìtul ad dópi misć a gl'US Open dal 2011.
Caréra
La Melanie la taca a śugàr a tènis in dal 2006 in soquànt turnèo di Stat Unî. In dal 2007, a séd'ś an, l'è bòna ad bàtar la Chanelle Scheepers, l'Andrea Petković, l'Alexandra Dulgheru, l'Ayumi Morita e la Varvara Lepchenko.
_-_Qualifying_Rounds_-_Melanie_Oudin_(15032742166).jpg)
_-_Qualifying_Rounds_-_Melanie_Oudin_(15055374362).jpg)
_-_Qualifying_Rounds_-_Melanie_Oudin_(14851057169).jpg)
L'americàna la taca bèṅ al 2008 cun na semifinàl a Clearwater e na finàl a Fort Walton Beach in dua la pèrd da la Barbora Záhlavová-Strýcová par 3-6 7-5 6-7. A Indian Wells i gh dànan na carta salvàdga e lē la riva a 'l secónd tùran farmànd-as cun la Francesca Schiavone par 1-6 1-6. In Maǵ la pèrd in di quàrt in d'l ITF da sinquànta-mila dòlar 'd Indian Harbour Beach cun la Bethanie Mattek-Sands ma in Luj l'è la vòlta bòna par métar-'s in bisàca 'l tìtul ad Lexington. In Agóst la pèrd in dal Bronx da l'Elena Bovina e la finìs 'l an c'n i quàrt a Quebec City (6-7 1-6 da la Bethanie Mattek-Sands) a la puśisiòṅ 177 dal mónd.
In dal 2009 la tōś part a i turnèo 'd Indian Wells e ad Miami cun dū carti salvàdghi in bisàca ma la và fóra subìt cun la Lucie Šafářová e la Daniela Hantuchová. La fà méj a Charleston in dua la riva in di utàṿ (4-6 1-6 da la Marion Bartoli) e pò in Maǵ la vins dū tìtui ITF da sinquànta-mila dòlar ad fila. In Luj la pasa 'l qualificasiòṅ a Wimbledon e pò la bat la Sybille Bammer par 4-6 6-4 6-2, la Jaroslava Švedova par 3-6 6-2 6-4 e la Jelena Janković par 6-7 7-5 6-2 prima ad farmàr-as cun l'Agnieszka Radwańska in di utàṿ par 4-6 5-7. La fà cumpàgn anc a Stanford in dua la pèrd incóra da la Marion Bartoli. In Istâ la s qualìfica a Los Angeles e a Cincinnati baténd la Melanie South e la Varvara Lepchenko ma pò la pèrd subìt cun la Daniela Hantuchová e cun l'Ana Ivanović. A gl'US Open però la fà la vōś grôsa dvintànd la masa-rusi dal turnèo. La Melanie difàti la mét in riga, una adrē cl'atra, l'Anastasija Pavljučenkova 6-1 6-2, l'Elena Dement'eva 5-7 6-4 6-3, la Marija Šarapova 3-6 6-4 7-5 e la Nadia Petrova 1-6 7-6 6-3. In di quàrt però la patìs un 2-6 2-6 da la Caroline Wozniacki. A la fiṅ d'l an la pèrd la finàla ad Fed Cup cun l'Itàglia: i sò singulàr i finìsan 6-7 2-6 cun la Francesca Schiavone e 5-7 2-6 cun la Flavia Pennetta.
Al sò 2010 al partìs cun na scunfìta a Hobart cun la Sara Errani: 6-3 3-6 5-7 al puntéǵ. In Favràr la riva in semifinàl a Parì a 'l quèrt in dua la céd in tri sét a l'Elena Dement'eva. A Memphis la fà i quàrt (acsè cuma a Charleston) mént'r a Indian Wells la patìs subìt un 6-3 3-6 0-6 da la Roberta Vinci. In sla tèra rósa la mét in fila quàtar prim tùr'n a Róma (1-6 3-6 da la Bethanie Mattek-Sands), Madrid (3-6 4-6 da la Vera Zvonarëva), Varsàvia (0-6 2-6 da la Magdaléna Rybáriková) e a 'l Roland Garros (5-7 2-6 da l'Anabel Medina Garrigues) ma a và mâł anc in sl'èrba. A Quebec City la s férma in di quàrt cun la Lucie Šafářová, pò la sèra 'l an cun na finàla ITF a Phoenix: 3-6 6-7 da la Varvara Lepchenko.
In dal 2011 l'americàna la n è bòna ad vìnsar mai dū pardìdi ad fila. A Fes la riva in di quàrt (5-7 7-5 0-6 da l'Alberta Brianti) ma la s imprufìta dal bandòṅ dla Polona Hercog a 'l secónd tùran (la n taca gnanc a śugàr). La cuntìnua acsè anc in dal 2012 in fiṅ in Avrìl in dua la vins 'l ITF ad sinquànta-mila dòlar ad Charlottesville, 7-6 3-6 6-1 a l'Irina Falconi. A 'l Roland Garros la riva a 'l secónd tùran (2-6 3-6 da la Sara Errani pò finalìsta) pò finalmènt la vins al sò prim turnèo WTA in sl'èrba ad Birmingham baténd l'Ekaterina Makarova in semifinàl par 6-4 3-6 6-2 e la Jelena Janković in finàl par 6-4 6-2. A Quebec City la ciàpa la paga da la Kristina Mladenovic in di quàrt, 0-6 1-6. In Nuvémbar la vins 'l ITF ad New Braunfels baténd la Madison Keys e la Mariana Duque-Mariño in finàl ma a Phoneix la cata la sò bistiàsa négra, la Bethanie Mattek-Sands, ch'la la manda a cà subìt, par la sèsta vòlta su siē. In tut al manéri la Melanie la gh la cava a finìr in dal primi sènt śugadōri a 'l mónd, a 'l 84śum pòst.
In dal 2013 la mét in fila quàtar prim tùran e sinc qualificasiòṅ mancàdi. A Róma la pasa 'n tùran cun l'Ekaterina Makarova ma l'è un bandòṅ dla rusa sóta 6-2 5-7 2-4. In Setémbar la vins 'n àt'r ITF a Las Vegas dand un 5-7 6-3 6-3 a la Coco Vandeweghe, pò i rìvan tri semifinàli ad fila, sèmp'r in turnèo ITF. In dal 2014 l'è custréta a śugàr praticamènt sōl in dal sircùit ITF in dua la riva in semifinàl a Contrexeville (2-6 2-6 da l'Irina-Camelia Begu) e in finàl a Carson in dua la céd par 4-6 4-6 a la Nicole Gibbs.
Culegamènt estéran
Nòti
- ↑ La còca 'd Amèrica l'è turnàda: la Melanie Oudin la vins fàcil al prim incónt'r a gl'US Open nbcnewyork.com, 31 'd Agóst dal 2010
- ↑ La Melanie Oudin, la còca 'd Amèrica ch'l'Amèrica l'à daśdmindgâ sbnation.com, 19 ad Śnar dal 2010
- ↑ 'N àt'r intervènt a 'l cōr par la Melanie Oudin livetennis.it, 11 'd Avrìl dal 2015
- ↑ A s ritìra la Melanie Oudin: 25 an e na prumésa mancàda Tennis Circus, 20 'd Agóst dal 2017