Stéphanie Cohen-Aloro
|
C'l artìcul chè 'l è scrit in
Miranduléś |
La Stéphanie Cohen-Aloro (Parì, 18 ad Mars dal 1983) l'è stada na tenìsta francéśa ch'l'è rivàda a èsar la nùmar ssant'òṅ dal mónd al 6 'd Utóbar dal 2003. L'è élta 175 cm e la péśa 68 chilo. Cum a s pōl capìr da 'l nóm, lì lē l'è n'ebréja.
In dla sò caréra la n à mai vins di tìtui WTA ma sōl di tìtui ITF (sinc). Prufesiunìsta da 'l Utóbar dal 2001 la gh'à dâ a muć al 12 ad Favràr dal 2011, muciànd sù 1.080.922 dòlar in prèmi.
Caréra
Dòp avér tacâ a móv'r i prim pas in dal sircùit WTA in dal 2001, la gh la cava a pasàr al prim tùran a 'l Roland Garros baténd l'Angelika Roesch ma la mudnéśa Adriana Serra Zanetti la la manda a cà subìt dòp. In dal 2003 la fà sù i sò riśultâ più bèi. La bat la Tat'jana Panova a Tokyo e la nùmar 15 dal mónd Anna Smashnova a Parì. A gl'US Open la riva a 'l secónd tùran ma pò la pèrd da l'Amélie Mauresmo. In Utóbar la tóca al sò best ranking ad sèmpar: al 61śum pòst.
In dal 2005 la Stéphanie la taca 'l an faghénd un stus minga da pôc baténd la Mary Pierce in dal prim tùran di Australian Open. A Miami invéci la fà fóra la nùmar 21 Daniela Hantuchová ma a 'l tèrs tùran la gh'à da chinàr la tèsta in frònt a la cruàta Karolina Sprem. In dal 2008 la bat la Dominika Cibulková a 'l prim tùran ad Barcelóna par pò pèrdar in semifinàl da la Marija Kirilenko.
In di Gran Slam la gh l'à cavàda a rivàr na vòlta a 'l tèrs tùran pardénd a 'l Roland Garros dal 2007 cóntar l'itagliàna ad Mèstar, Tathiana Garbin.
La gh dà sù in dal Favràr dal 2011.