Virgìgna Ucidentàla
|
C'l artìcul chè 'l è scrit in
Miranduléś |
La Virgìgna Ucidentàla (West Virginia in ingléś, a s lèś /ˌwɛst vərˈdʒɪnjə/ scólta'l chè) 'l è 'n stat di Stat Unî.
Al sò guvernadōr, da 'l 2010, 'l è Earl Ray Tomblin dal partî demucràtic. Da gl'elesiòṅ presidensiàli dal 2000 in avànti, i sò abitànt i aṅ sémpar vutâ p'r i candidâ republicàṅ dòp c'in di an da 'l 1932 a 'l 1996 i 'l ìvan fat sōl tri vòlti (1956, 1972 e 1984).
Cal stat chè al fava part dla Virgìgna, una dal trédas culògni ingléśi uriginàri in Amèrica, in fiṅ a 'l 24 'd Utóbar dal 1861 quànd gl'eletōr ad quarànt'òṅ cuntèi dal nòrd-òvest i àṅ decìś ad dastacàr-as durànt la guèra 'd secesiòṅ americàna par dar vita a 'n stat da par lōr parchè i n gh'ìvan minga tant séruv négar da far lauràr in di camp a difarénsa ad chi àtar. A 'l inìsi al nóm sarnî p'r al stat nóṿ 'l éra Kanawha ma pò 'l è dvintâ Virgìgna Ucidentàla.
La cunfìna cun la Virgìgna a sud-èst, c'n al Kentucky a sud-òvest, cun 'l Ohio a nòrd-òvest, cun la Pennsylvania a nòrd e c'n al Maryland a nòrd-èst. La Virgìgna Ucidentàla, ch'l'à ciapâ 'l nóm da la regìna 'd Inghiltèra Śabèta I cgnusùda cuma la Regìna Virgìn parchè in dla sò vita l'éra armàśa puta, la s è unìda a la federasiòṅ in dal 1863.
La sò capitàl l'è Charleston, sità più pìcula 'd Carp. Àtar sèntar da nutàr, ma in tut a manéri più pìcui incóra, i èṅ Huntington e Parkersburg. L'è divìśa in sinquànta-sinc cuntèi e in duśènt-trentadū cumùṅ. Al sò mòt in latìn 'l è „Montani semper liberi“ (I muntanàr i èṅ sèmpar lìbar), riferimènt ch'a s cata anc in dal sò scutmàj, „Mountain State“, riferimènt a i mònt apalachiàṅ. La Virgìgna Ucidentàla la mùcia sù un migliòṅ e òt 'd abitànt par na superfìsi ad 62.755 km².