C'l artìcul chè 'l è scrit in Miranduléś Emiliàn

The Killer Inside Me
The Killer Inside Me

La Alba e Casey Affleck in na figùra dal film
Al sasèṅ ch'a gh'ò dèntar
2010
Regìa: Michael Winterbottom
Scritōr: Jim Thompson
John Curran • Mark Tildesley
Atōr: Casey AffleckTom BowerJessica Alba
Kate HudsonNed BeattyMatthew Maher
Elias KoteasLiam AikenJay R. Ferguson
Simon BakerBill PullmanBrent Briscoe
Müsica: Chadwick Brown
Léngua: Ingléś
Dürä dal film: 109 minüt
Nasiōṅ: Stat Unî


«
Qualchidòṅ al masa p'r amōr, qualchidòṅ al cópa p'r i bèsi, qualchidòṅ sénsa mutìṿ.»
(Tagline dal film)


The Killer Inside Me (Al sasèṅ ch'a gh'ò dèntar) 'l è 'n thriller dal 2010 ad Michael Winterbottom trat da 'l rumànś umònim ad Jim Thompson. 'L è stâ preśentâ a 'l Tribeca Film Festival al 27 'd Avrìl dal 2010 ma 'l è stâ 'n flòp avénd ciapâ gnanc quàtar migliòṅ ad dòlar dòp ès'r-an custâ trédas.

Par cla pelìcula chè la Jessica Alba l'à vins un Razzie Awards par l'atōra minga prutagunìsta più lòfi.

Sunt

In dal 1952 Lou Ford (Casey Affleck) 'l è 'n pilàstar dla cumunità dna sitadìna pìcula dal Tèxas faghénd al vice-sierìf. Tut i gh vōlan bèṅ anc parchè lò 'l è càlum, al juta tut, a sa gh pōl cuntàr insìma e 'l pòrta pasìnsia in di quèi. Ma qvést chè 'l è sōl qvél ch'a pâr ad fóra parchè lò al gh'à di prubléma a rapurtàr-as cun la gint e al gh'à anc di gust sesuài parvèrs. Da ragasōl (Zach Josse) 'l éra stâ bcâ da 'l sò fradlàstar Mike (Noah Crawford) a viulentàr na putìna 'd sinc an ma al l'iva fata franca parchè pò Mike al s éra tòlt lò la cólpa e par cal mutìṿ chè al s éra fat soquànt an ad galéra. Vgnû fóra 'd parśòṅ 'l iva tacâ a lauràr cuma muradōr in dl'impréśa 'd custrusiòṅ ad Chester Conway (Ned Beatty). In dal paéś i ìvan catâ 'l petròli e dònca 'l éra drē a ślargàr-as e a gh'éra biśógn ad nóvi. Un dè Mike al vèṅ catâ mòrt spaplâ dòp èsar śliciâ śò da 'n edifìsi in custrusiòṅ anc parchè i puntéǵ i n éran minga stâ fat bèṅ. Lou al créd che Conway 'l is strulgâ incòsa.

Su incàrag dal sierìf Bob Maples (Tom Bower), Lou al và a cà dla Joyce Lakeland (Jessica Alba), na scaja ch'la gh'à na relasiòṅ c'n al fiōl ad Conway, Elmer (Jay R. Ferguson). Quànd Lou al gh diś ad far sù incòsa e 'd andàr via da 'l paéś, la Joyce la s arvòlta sèg ma la i ciàpa. Lou al s tira via la sintùra e al la dróa par piciàr-la in dal cûl, la Joyce la piànś ma la gh cata gust, pò i dū i gùsan tacànd un rapòrt cuntinuâ anc se lò la muróśa la gh l'à bèla, l’Amy Stanton (Kate Hudson). La Joyce la śibìs a 'l sò amànt un ricàt a Chester par purtàr-ag via déś-mila dòlar p'r a n far savēr a ninsòṅ che sò fiōl al và cun na putàna. Chester al dmanda a Lou ad dar i bèsi a cla rója lè e ad far in manéra ch'la vaga via ma lò al gh'à in mènt 'n àtar piàṅ. Prima al dà tanti bòti a la Joyce tant da maslàr-la, pò al spara a Elmer, ch'l éra vgnû a catàr-la, miténd la pistòla in maṅ a la Joyce par far crédar ch'i dū i s fùsan cupâ 'l un cun cl'atra. La dóna la và in còma e pò la mōr méntar Lou al s tîṅ i bèsi.

A riva 'l prucuradōr distretuàł Howard Hendricks (Simon Baker) ch'al capìs subìt ch'a gh'è quèl ch'a traśa e 'l è parsuàś che Lou al gh sia insaplâ. In séguit Hendricks al mét in parśòṅ un śōvan dal pòst, Johnnie Pappas (Liam Aiken), parchè i gh'aṅ catâ un bòṅ da vint dòlar ad qvéi nutâ ch'al fava part dal riscàt. Al ragàs al gh 'l à parchè al gh 'l iva dâ Lou quànd 'l éra andâ a far benśìna da lò. P'r al fat ch'i dū i èṅ amìg, Hendricks al dmanda a Lou 'd andàr a dascórar sèg par cunvìnsar-'l a cunfesàr ma Lou al 'l impìca par far-al taśēr par sèmpar faghénd pò crédar ch'al s sia cupâ p'r al magòṅ. Quànd tut a pâr ch'a s sia giustâ par lò a salta fóra 'n barbòṅ (Brent Briscoe) ch'al sà incòsa parchè al gh tgniva adrē.

Culegamènt estéran