Madagascar (film)
|
C'l artìcol chè 'l è scrit in
Carpśàn |
 Madagascar
| ||
| Madagascar | ||
| ||
| Madagascar 2005 | ||
|---|---|---|
| Scritōr: Mark Burton Billy Frolick Eric Darnell Tom McGrath | ||
| Regìa: Eric Darnell Tom McGrath | ||
| Senegiadùra: Mireille Soria | ||
| Personâǵ: Alex Marty Gloria Melman | ||
| Dupiadōr originêl: Ben Stiller Chris Rock David Schwimmer Jada Pinkett Smith | ||
| Mùśica: Hans Zimmer | ||
| Durèda dal cartòun: 85 minût | ||
| Lengua: Ingléś | ||
| Nasiòun/Paēś: Stêt Unî | ||
Madagascar 'l è 'n cartòun animê dal 2005 disgnê e prodòt da l'americàna DreamWorks Animation.
Sunt
In dal śoo ed Central Park a New York, da mèś a cagli ètri bésti, a gh'è anc al grùp 'd amìg Alex, Marty, Gloria e Melman.
Alex 'l è 'n liòun abàsta śóven e al cata dimòndi sodisfasiòun in dal fères rimirèr acsè tant tirê a lùcid, acsè tant arpunsê e argiulî damànd un rè. Alex 'l è anc dimòndi aplavdî da 'l pùblic in tùti el só eśibisiòun ed dansa e 'd arghìgn da liòun che lò al śibìs da stèr dèintr in dal só recìnt. Quand a tòca la só óra ed fèr spetàcol per i agìnt ch'a pasa dedlè, lò al s prìla in piroèti e movèinsi da balarèin ed dimòndi brevitù e cun dimòndi gràsia e beltê. La gint ch'l'al và a vèder la 'l plaudìs, la gh'tira di bêś, la gh'fà 'l tifo e i cunplimèint, e i putèin i stravèden per tut quèl che lò al fà. A s pōl pròpia dìr che Alex al sìa la stèla 'd cal śoo lè: che lò 'l dorma, o ch'al magna o ch'al faga i só spetaculèin ed dansa, tut i 'l vólen vèder e tgnìregh la pèrt.
Minga sōl Alex al stà da pèpa, lè in dal śoo, perchè anc a 'l só amìg Marty la śébra, a nn egh chèla minga gnint in dal só recìnt. Al gh'à tut al prê ch'a gh'servìs per biasèr l'erba, i ghe ślùnghen el bali ed fèin da magnèr, al gh'à l'atrès da paléstra per caminèr in sìma a 'l tapì rulàṅ col velocitê che più a gh'pièś e in dal mèinter ch'al guèrda lè 'd fròunt un murales ed mośàic grandìsim cun disgnèda la savàna e 'n ambìnt naturèl colorê e belìsim. A s prèv dìr ch'a nn'egh'chèla gnanc al lat ed galèina.
Cla sira lè, i só amìg dal cōr Alex, Gloria e Melman i gh'àn preparê na sorpréśa perchè i gh'àn da festegèr al só dècim conpleàn. Marty 'l è dimòndi cuntèint che i só amìg i àpien pinsê a lò e ch'i 'l festègen. Insèm i s espartìsen dal fèti 'd na turtlèina ed pana tùt pin ed cuntintèsa, i s fàn i cunplimèint a vicènda, i desquàcen i pactèin di reghèl ch'i gh'àn purtê e i schèrsen in alegrìa. Marty 'l è dimòndi cuntèint anca lò 'd èser acsè tant evlû bèin, mo però a gh'vìn anc un mumèint ed malincunìa perchè a gh'vin dìt che a lò, a dēś an sunê, la metê dal camìn 'd la só vìta, a gh'chèla incòr ed vìver in dla natùra qvèla véra, minga quèla ch'i gh'śibìsen per finta lè in dal śoo. I gh'chèlen i prê grandìsim e la salvadgherìa che lò al n'à mài cgnusû da stèr lè dàinter in dal recìnt: "A dēś an sunê, ajò incòr da capìr s'a sun biànc a strìssi négri, o négr a strìssi bianchi... A 'm piaśrèv ed vèdr al mond fóra ed cal śoo chè", al dìś Marty ai só amìg.
"Mo và là!" i gh'rispònden chièter, "Chè a sòm da mêś ala civiltê, a psòm cantèr la cansòun New York, New York, a nn'es chèla gnint, tut i dè i guardiàn i s preòcupen ed purtères da magnèr, a gh'òm un tèǵ da durmìregh 'd sòta e tùti el curi di dutōr s'a gh' in fùs biśògn". La giràfa Melman, ch'l è 'n pecundrìec, al gh'śunta che fóra dal śoo bèin dificilmèint lò al catarà chi medicamèint, el medśèini e 'l TAC ch'i gh'śibìsen lè dèinter e che a lò i gh'pièśen acsè tant.