La figlia del diavolo (film 1973)
|
C'l artìcul chè 'l è scrit in
Miranduléś |
 The Devil's Daughter
| ||
| La figlia del diavolo | ||
.png) La Montgomery e la Winters in na figùra dal film | ||
| La fiōla dal Diàvul 1973 | ||
|---|---|---|
| Regìa: Jeannot Szwarc | ||
| Scritōr: Colin Higgins | ||
| Atōr: Shelley Winters • Belinda Montgomery Robert Foxworth • Abe Vigoda • Jonathan Frid Joseph Cotten • Martha Scott • Lucille Benson Barbara Sammeth • Diane Ladd • Ian Wolfe | ||
| Müsica: Laurence Rosenthal | ||
| Léngua: Ingléś | ||
| Dürä dal film: 74 minüt | ||
| Nasiōṅ: Stat Unî | ||
La figlia del diavolo (La fiōla dal Diàvul) 'l è 'n film ad scarésa dal 1973, fat par la televiśiòṅ, ad Jeannot Szwarc.
'L è stâ girâ a Pacific Grove in Califòrgna.
Sunt
Dòp ès'r andàda a catàr cunfòrt in céśa, l’Alice Shaw (Diane Ladd) la cata tri tisi misterióś in cà sua e òṅ ad qvi lè, un sòp ch'al gira cun 'l ajùt ad dū fèrli, al dmanda nutìsi dla Diane (Belinda Montgomery), fiōla dla dóna ma anc sua a sò dita. Quànd chi lē la próa a paràr-al via tirànd fóra na pistòla, a partìs un cōlp ch'al la masa.
A 'l funeràł ad sò màdar la Diane la taca a dascórar cun na dóna ch'la diś 'd èsar na sò amìga da dimóndi tèmp, la Lilith Malone (Shelley Winters). Chi lē, ch'in di fat ad cà la s fà jutàr par 'n óm mut ch'al s ciàma Mr. Howard (Jonathan Frid), la l'invìda anc a séna. La ragàsa la và a star da lē e la cgnós anc al surèli Poole, la Janet (Lucille Benson) e la Margaret (Thelma Carpenter), ch'i èṅ sèmpar gustóśi sèg e ch'i s śibìs'n ad far d'l apfelstrudel par na fèsta in sò unōr in prugàma venardè. Adòs la Diane la pòrta sèmpar 'n anèl che la sgnōra Malone la gh'à dâ dgénd ch'l'éra 'd sò màdar e ch'al gh'à insìma 'n sìmbul particulàr e dimóndi strâṅ ch'a s véd dapartùt in dla cà, in di quàdar, in dal sigaréti e in di àlbum dal foto.
In séguit la ragàsa la fà amicìsia anc cun na śōvna ch'la gh'à i sò an e ch'la fà la mistra, la Susan Sanford (Barbara Sammeth), e la decìd 'd andàr a vìvar sèg ma la Lilith la n in vōl savēr anc se pò la gh'à da cédar malvluntéra. A la Diane i tàc'n a sucédar di fat strâṅ: un putèṅ par pôc al n finìs mia sóta na màchina e 'n cavàl ch'al la véd al pèrd la tèsta.
Méntar la tōś part a la fèsta prugramàda i gh dìśan che lē l'è la fiōla dal Diàvul e ch'la gh'à da spuśàr Endor al demòni. La Diana la và via e la diś a la Lilith ch'la n la vōl piò védar. Turnànd a cà da la Susan la la véd spianàr un vistî nóṿ p'r andàr fóra c'n un ragàs ch'l à cgnusû da pôc ch'a gh piàś dimóndi e ch'al fà 'l architét, Steve Stone (Robert Foxworth). Chi lò 'l iva bèla cgnusû la Diane soquànt tèmp prima parchè al gh'iva ciapâ incòst mént'r al purtàva 'n stramàs in cô par stablìr-'s a 'l piàṅ ad sōvar.
Cla sira lè la Susan la mōr masàda da 'l sò cavàl e Steve, ch'al n è àtar che Endor in parsòna, al ciàma la sò amìga par dir-'g-al. La Diane la n suspèta gnint e la s inamóra 'd lò, pò la decìd ad spuśàr-'l e acsè la dmanda a 'l giùdas Weatherby (Joseph Cotten) ad far da testimòni a 'l matrimòni. Chi lò al riva a la serimògna girànd cun dal fèrli parchè sóta 'l braghi al gh'à dū śampi 'd cavròṅ. Par la Diane al destîṅ 'l è sgnâ.