La bottega che vendeva la morte
|
C'l artìcul chè 'l è scrit in
Miranduléś |
 From Beyond the Grave
| ||
| La bottega che vendeva la morte | ||
 Donald e l'Angela Pleasence in na figùra dal film | ||
| La butéga ch'la vindìva la mòrt 1973 | ||
|---|---|---|
| Regìa: Kevin Connor | ||
| Scritōr: R. Chetwynd-Hayes Raymond Christodoulou • Robin Clarke | ||
| Atōr: Peter Cushing • David Warner • Ian Bannen Donald Pleasence • Diana Dors • Ben Howard Ian Carmichael • Jack Watson • Wendy Allnutt Margaret Leighton • Rosalind Ayres • Ian Ogilvy | ||
| Müsica: David Gamley | ||
| Léngua: Ingléś | ||
| Dürä dal film: 97 minüt | ||
| Nasiōṅ: Régn Unî | ||
La bottega che vendeva la morte (La butéga ch'la vindìva la mòrt) 'l è 'n film ad scarésa fat a epiśòdi dal 1973 ad Kevin Connor, òṅ di ùltim prudót par qvéi d'l Amicus Productions.
Sunt
Un butgàr ch'al gh'à 'n negòsi 'd antiquariâ (Peter Cushing) al vénd di śavàj antìg a soquànt cliènt diśunèst che pò i fànan sèmpar na bruta fiṅ.
In dal prim epiśòdi (The Gate Crasher) Edward Charlton (David Warner) al cómpra cun 'l ingàn par dū franc un spèć antìg ch'al gh'à quatarsènt an sénsa savēr ch'ad dènt'r al gh'à 'n spìrit maladî. Chi lò (Marcel Steiner) al cmanda acsè a Edward ad cupàr dla gint par lò, par psēr turnàr in vita. 'L óm al taca subìt la sò òpra masànd na scaja (Rosalind Ayres) bcada par strada e quànd dal sangṿ a s 'n è stramnâ abàsta, al spìrit al tórna in dal mónd di viṿ mént'r Edward al finìs lò in dal spèć
In dal secónd epiśòdi (An Act of Kindness) 'l impiegàt Christopher Lowe (Ian Bannen), daśgustâ da dimóndi tèmp cun sò mujér, la Mabel (Diana Dors), un dè al cgnós 'n èx militàr pîṅ ad mdaj, Jim Underwood (Donald Pleasence), ch'al s è ardùt a véndar di fulminànt e dal lasi par strada. Dòp avér cumprâ quèl da lò, al śgranfgna via na mdaja da la butéga 'd antiquariâ par far védar ch'l è stâ premiâ anc lò in tèmp ad guèra. Invidâ a séna da Jim, Christopher al cgnós sò fiōla puta, l’Emily (Angela Pleasence), ch'la gh buta i òć adòs e pò la cópa la Mabel druànd na bàmbula vudù par psēr-al spuśàr. Durànt al pranś ad nòsi la fà àtar tant c'n al putòć dal spóś ch'a gh'éra insìma a la tórta ch'la gh'iva da tajàr.
In dal tèrs epiśòdi (The Elemental) Reginald Warren (Ian Carmichael) al farga 'l butgàr cambiànd ad nascòst al prèsi dna scatla 'd argìnt cun qvél 'd 'n artìcul da gnint e in cla manéra chè al gh la cava a cumpràr-la par pôc. Turnànd a cà in trêṅ, al cgnós na sensitìva, la Madame Orloff (Margaret Leighton), ch'la gh fà nutàr ch'in sla spala al gh'à 'n spìrit catìṿ ciamâ “'l Elementàri”. Chi lò al custrìnś al parsòni ch'i gh 'l aṅ adòs a cupàr par lò. 'L òm al gh dà minga a mènt ma al tōś listés al nùm'r ad telèfun dla dóna. Rivâ a cà da sò mujér Susan (Nyree Dawn Porter), 'l óm al próa a strusàr-la méntar la dórm a lèt tgnénd adrē a i vulēr d'l “Elementàri” ma par furtùna la sò spóśa la s salva. Reginald al dmanda ajùt subìt a la Madame Orloff ch'la gh la cava a casàr via 'l spìrit ma purtròp chi lò al cata pò pòst in dla còrp dla Susan che acsè, cla nòt lè, la fà fóra sò marè.
In dal quàrt epiśòdi (The Door) William Seaton (Ian Ogilvy) al còmpra da 'l butgàr na pòrta antìga cun na ghigna sculpìda in mèś par tacàr-la pò a 'n scafàl ch'al gh'à in cà. Vrénd-la, lò e sò mujér Rosemary (Lesley-Anne Down) i gh càtan na cambra in du a gh'è 'n stregòṅ, Sir Michael Sinclair (Jack Watson), ch'al pésca dgl'anmi.