Inserzione pericolosa
|
C'l artìcul chè 'l è scrit in
Miranduléś |
 Single White Female
| ||
| Inserzione pericolosa | ||
 La Bridget Fonda in na figùra dal film | ||
| Insersiòṅ periculóśa 1992 | ||
|---|---|---|
| Regìa: Barbet Schroeder | ||
| Scritōr: John Lutz • Don Roos | ||
| Atōr: Bridget Fonda • Jennifer Jason Leigh Steven Weber • Peter Friedman • Frances Bay Stephen Tobolowsky • Tara Karsian • Kim Sykes Jessica Lundy • Renée Estevez • Eric Poppick | ||
| Müsica: Howard Shore | ||
| Léngua: Ingléś | ||
| Dürä dal film: 107 minüt | ||
| Nasiōṅ: Stat Unî | ||
Inserzione pericolosa (Insersiòṅ periculóśa) 'l è 'n thriller americàṅ dal 1992 ad Barbet Schroeder trat da 'l rumànś S.W.F. Seeks Same (Fémna biànca puta la pésca cumpàgn) ad John Lutz. La Jennifer Jason Leigh l'è stada premiàda a i MTV Movie Awards dal 1993 cuma mijōr catìṿ baténd la Sharon Stone (Basic Instinct), Danny DeVito (Batman - Il ritorno), Jack Nicholson (Qualcosa è cambiato) e Ray Liotta (Abuso di potere).
Al film, custâ sédas migliòṅ ad dòlar, 'l à finî c'n al muciàr-an utànta-quàtar e 'l à dâ vita anc a 'n arfacimènt in dal 2005 da 'l tìtul Inserzione pericolosa 2.
Sunt
L’Allison Jones (Bridget Fonda), dita Allie, la lavóra in àmbit infurmàtig a New York. Quànd la vîṅ a savēr ch'al sò muróś Sam Rawson (Steven Weber) 'l è andâ a lèt cun la sò èx mujēr, lē la 'l casa 'd cà miténd fiṅ a la relasiòṅ.
Dòp ès'r andàda a sfugàr-'s un pôc c'n al sò vśèṅ 'd cà aspirànt atōr Graham Knox (Peter Friedman), la dóna la mét 'n anùnsi su 'n giurnàł par catàr na dóna puta par spartìr 'n apartamènt a Manhattan. A gh rispónd na sèrta Hedra Carlson (Jennifer Jason Leigh) e 'l dū dóni i vàn'n a star insém, dvintànd anc amìghi tant che la Allie la taca a ciamàr cl'atra Hedy. Chi lē la gh diś ch'la sò śmèla l'éra nada mòrta e ch'adès la s sènt sōla.
C'n al pasàr dal tèmp la Hedy la taca a ligàr-as sèmpar da piò a la Allie, in na manéra murbóśa, cumpiànd-'g i vistî e anc la patnadùra, pò la dvènta gelóśa quànd la sò amìga la tórna insém a Sam anc se lē l'iva fat da tut par paràr-al via lugànd dal sò létri 'd scuśi. Adès a gh'è 'l risć ch'i dū muróś i pòs'n andàr a star par sò cònt, lasànd-la da par lē.
Dòp la mòrt dal sò caṅ Buddy, vulâ fóra par la fnèstra dòp 'n intervènt dla Hely ch'l'iva ślargâ la sfésa dla grada, la Allie la cata na scatla 'd scarpi dla Hedy in du a s capìs ch'al sò nóm véra 'l è Ellen Besch e 'n artàj 'd un giurnàl in du a s dascurìva dla sò śmèla Judy andgàda in na vasca da bagn quànd la gh'iva nóṿ an.
Na sira la Ellen, faghénd finta 'd èsar la Allie ch'la gh sumìlia dimóndi, la và a catàr Sam in dla sò cambra 'd albêrg, tintànd ad far sès sèg. Quànd lò al fà a mènt a 'l ingàn, prima 'd psēr telefunàr a la Allie, la Ellen la 'l masa c'n al tac dla sò scarpa. Dal tut fóra 'd tèsta, adès l'è la Allie a ès'r in perìcul.