Ghost Rider (film)
|
C'l artìcul chè 'l è scrit in
Miranduléś |
 Ghost Rider
| ||
.png) Nicolas Cage in na figùra dal film | ||
| id. 2007 | ||
|---|---|---|
| Regìa: Mark Steven Johnson | ||
| Scritōr: Mark Steven Johnson | ||
| Atōr: Nicolas Cage • Peter Fonda • Eva Mendes Wes Bentley • Donal Logue • Raquel Alessi Sam Elliott • Brett Cullen • Daniel Frederiksen | ||
| Müsica: Christopher Young | ||
| Léngua: Ingléś | ||
| Dürä dal film: 110 minüt | ||
| Nasiōṅ: Stat Unî • Austràglia | ||
Ghost Rider (id.) 'l è 'n film fantàstic americàṅ e austragliàṅ dal 2007 ad Mark Steven Johnson trat da 'l persunàǵ umònim di fumét dla Marvel Comics creâ in dal 1972 par Gary Friedrich, Michael Ploog e Roy Thomas. Al gh'à abû 'n séguit in dal 2014 ciamâ Ghost Rider - Spirito di vendetta.
Custâ sènt-déś migliòṅ ad dòlar, al film al 'n à pò purtâ a cà dagnóra duśènt-trénta.
Sunt
Barton Blaze (Brett Cullen) 'l è 'n motociclìsta acrubàtic texàṅ ch'al s śibìs in di spetàcui insém a sò fiōl Johnny (Nicolas Cage). Na sira al ragàs, turnànd a cà, al vîṅ a savēr da sò pàdar ch'al gh'à 'n càncar ch'a n gh'è piò gnint da far. A 'l impruvìś a Johhny a gh s para davànti al diàvul Mefìst (Peter Fonda) in parsòna ch'al gh prumét ad guarìr-'l in cambi dla sò anma. Al śōvan al gh astà e Barton al guarìs dabòṅ murénd però al dè dòp in 'n incidènt durànt òṅ di sò nùmar.
I pàs'n i an e Johnny 'l è dvintâ 'n fenòmen a far i salt cun la sò mòta, cuntinuànd al mistēr ad sò pàdar. Prima 'd un sò spetàcul, in du al gh'à da rivàr a nuànta métar, 'l arcgnós fra 'l pùblic la Roxanne Simpson (Eva Mendes), na ragàsa ch'al cgnusìva bèla da quànd i éran pìcui insém e ch'adès la fà la giurnalìsta. Johnny al l'invìda a séna. In cal méntar in sità a riva Cōr Négar (Wes Bentley), un dèmun fiōl ad Mefìst ch'al taca a masàr la gint insém a la sò banda 'd anmi maladìdi scapàdi via da 'l Infèran, i Lugâ.
Mefìst al cumparìs davànti a Johnny e 'l preténd al rispèt dal pat fat soquànt an prima. In di pagn ad Ghost Rider, un dèmun c'n un tésć ch'al ciàpa fōg a 'l pòst dla tèsta e 'n giubòt nég'r ad pèla adòs cun dal cadéni insìma da druàr cuma scùria cónt'r i nemìg, al gh'à da masàr Cōr Négar, dasfrutànd la sò fòrsa, la sò mòta infernàla 'd fōg e la sò uciàda dla peniténsa.