Ela Weber
|
C'l artìcul chè 'l è scrit in
Miranduléś |
La Manuela Hannelore Weber (Dettelbach, 13 ad Mars dal 1966), cgnusùda méj cuma l’Ela Weber, l'è n'atōra, showgirl e persunàǵ televiśìṿ tedésc.
Biugrafìa
La Weber la nas in un paiśèṅ ad gnanc sèt-mila abitànt dla Bavéra. Da śōvna la lasa la Germâgna p'r andàr a far la mudèla a New York prima 'd stablìr-'s in Itàglia in du la vèra na pómpa 'd benśìna c'n autolavàǵ a Mòdna. In dal 1988 la taca a lauràr in televiśiòṅ cun Alessandro Ippoliti in dla traśmisiòṅ ad Canale 5 Telecamere a richiesta.
Al sucès par lē a riva in dal 1996 c'n al quiz Tira & molla cundót insém a Paolo Bonolis ch'al gh dà al scutmàj ad „Sellerona“ (Gròs Sèlar) ch'a Róma a s dróa par batśàr al parsòni élti dimóndi esénd la Weber un mét'r e utànta. Sèmp'r in c'l an lè la rècita in dū cumèdi a 'l cìnema: Uomini senza donne 'd Angelo Longoni e A spasso nel tempo ad Carlo Vanzina. In dal 1998 la pasa a TMC par far Goleada cun Massimo Caputi e p'r insgnàr al tedésc in dal prugràma Tappeto Volante ad Luciano Rispoli. Dòp àtar dū film (Paparazzi e Tifosi) l'è in dal cast ad Sette per uno, śōg invintâ par Jocelyn e cundót par Gigi Sabani.
In séguit la pasa a la RAI faghénd Domenica In in dla stagiòṅ 2001/2002 insém a Carlo Conti, a la Mara Venier e a l'Antonella Clerici. In dal 2001 la tórna a recìtar in dla pelìcula Se lo fai sono guai ad Michele Massimo Tarantini. In dal 2004 e in dal 2008 la tōś part a i reality show La fattoria e Isola dei famosi sénsa vìnsar. In dal 2009 l'è prutagunìsta, insém a Gaetano Gennai, dla cumèdia Mucho Macho.
Filmugrafìa
- 1996 - Uomini senza donne, regìa 'd Angelo Longoni
- 1996 - A spasso nel tempo, regìa ad Carlo Vanzina
- 1998 - Il mastino, regìa 'd Ugo Fabrizio Giordani e ad Francesco Laudadio (TV)
- 1998 - Paparazzi, regìa ad Neri Parenti
- 1999 - Tifosi, regìa ad Neri Parenti
- 2001 - Se lo fai sono guai, regìa ad Michele Massimo Tarantini
- 2009 - Mucho Macho, regìa ad Leonardo Scucchi