Criminally Insane - La grassa grossa follia omicida di Ethel
|
C'l artìcul chè 'l è scrit in
Miranduléś |
 Criminally Insane
| ||
| Criminally Insane - La grassa grossa follia omicida di Ethel | ||
 La Priscilla Alden in na figùra dal film | ||
| Mata criminàla - La grasa grôsa metèria masadōra dl'Ethel 1975 | ||
|---|---|---|
| Regìa: Nick Millard | ||
| Scritōr: Nick Millard | ||
| Atōr: Priscilla Alden • Lisa Farros • Michael Flood Jane Lambert • George Flower • Cliff McDonald Ginna Martine • Sonny La Rocca • Sandra Shotwell | ||
| Müsica: / | ||
| Léngua: Ingléś | ||
| Dürä dal film: 62 minüt | ||
| Nasiōṅ: Stat Unî | ||
Criminally Insane - La grassa grossa follia omicida di Ethel (Mata criminàla - La grasa grôsa metèria masadōra dl'Ethel) 'l è 'n film ad scarésa americàṅ dal 1975 scrit e dirèt par Nick Millard.
Girâ in sinc stmani in dla Primavéra dal 1973 a San Francisco, al gh'à abû 'n séguit in dal 1987 da 'l tìtul Criminally Insane 2 e 'n arfacimènt in dal 2016, Crazy Fat Ethel.
Sunt
L′Ethel Janowski (Priscilla Alden) l'è na śōvna budlòna sénsa critèri ch'la gh'à da spés di atàc 'd arlìa. La viṿ a San Francisco insém a sò nunóna (Jane Lambert) ch'la fà da tut par curàr-la cuma andàr da 'l dutōr Gerard (Cliff McDonald) ch'al gh fà far dal puntùri e anc di elettroshock par métar-la in riga. Chi lò al cunsìlia a la vècia ad far-ag far na diéta par prutéś'r al sò cōr da di brut mâi. La sgnōra Janowski la gh próa anc ma a n gh'è gnint da far, alóra la vōda 'l frig e la sèra a ciàṿ al magnàr in di casét, dgénd a sò anvōda ch'la gh darà da magnàr tri vòlti a 'l dè in fiṅ tant ch'la n impararà a cuntrulàr-as da par lē. La ragàsa, ch'la pâr sèmpar ch'la s sia péna alvàda da lèt, la s arvòlta sèg e pò la la scurtèla a mòrt quànd cl'atra la diś ch'la ciamarà subìt al dutōr.
Dòp avēr lugâ 'l cadàv'r in dal sò cambra, l′Ethel la ciàma la drugarìa Caruso par far-as purtàr dal magnàr, cun dópi dóś ad ślâ, ma 'l titulàr al gh diś che prima la gh'à da pagàr al dèbit ch'la s iva fat sgnar. La ragàsa la gh diś ad sè, pò la và a pascàr di bèsi in dal burslèṅ ad sò nunóna ma la cata sōl quàtar dòlar e mèś. Quànd al ragàs dal cunséggni, Glen Dickie (Sonny La Rocca), al gh diś ch'a gh in vōlan utànta, l′Ethel la 'l masa druànd i vēdar dna butìglia parchè lò 'l éra drē a 'ndàr via esénd ch'la n gh 'n iva minga abàsta. Al sò còrp al finìs in dla cambra da lèt dla vècia anc parchè l′Ethel la n gh la cava briśa a far na buśa in giardèṅ granda asè par lugàr-i tut dū. I mòrt i dvèntan pò tri parchè la ciciòna la masa anc al dutōr Gerard ch'l éra vgnû in dla sò cà a pascàr la sgnōra Janowski esénd che la dóna l'iva saltâ soquànt apuntamènt p'r al curi dla sò anvōda. Par quaciàr la pusa di cadàv'r in putrefasiòṅ, l′Ethel la próa a druàr di parfùm, ma a cónta pôc.
In cal méntar, in dla cà, a gh'è vgnuda a star anc sò surèla Rosalie (Lisa Farros) ch'la fà la scaja 'd mistēr, 'd acòrd anc c'n al sò muróś John (Michael Flood) ch'al gh mét i còran e che dal vòlti al la pìcia anc parchè par lò «na quàlc vòlta na bastunàda a gh vōl, a vuàtri tuti, specialmènt a tè». Al sergînt McDonough (George Flower) al s fà viṿ p'r indagàr su la sparisiòṅ ad Glen e la budlòna la gh diś ch'la n sà gnint da quànd la 'l à pagâ e chi lò 'l éra andâ via.
Al ròbi par l′Ethel i pàr'n andàr p'r al vèrs giùst in fiṅ tant che la Rosalie e John i dìśan ch'i vōlan vèrar 'l us dla cambra dla nunóna, saràda a ciàṿ, parchè a gh'è na pusa ch'a s mōr. L′Ethel la sugerìs ad spetàr ch'la turnìs a cà, ch'l'è via par dal vìśiti. Méntar lōr i èṅ drē a durmìr, la mata la và in cuśìna a tōr un manarèṅ par masàr-i. Fat cal lavōr chè, la decìd ad scavśàr e a śbrandlàr i cadàvar par pò purtàr-i via in un sac.