Zucchero, miele e peperoncino
|
C'l artìcul chè 'l è scrit in
Miranduléś |
 Zucchero, miele e peperoncino
| ||
 L'Edwige Fenech e Lino Banfi in na figùra dal film | ||
| Sùcar, mēl e pavrunsèṅ 1980 | ||
|---|---|---|
| Regìa: Sergio Martino | ||
| Scritōr: Castellano e Pipolo | ||
| Atōr: Lino Banfi • Edwige Fenech • Pippo Franco Renato Pozzetto • Enzo Robutti • Glauco Onorato Dagmar Lassander • Patrizia Garganese Anna Kanakis • Luigi Leoni • Gianfranco Barra Elio Crovetto • Salvatore Baccaro • Sal Borgese | ||
| Müsica: Mariano Detto | ||
| Léngua: Itagliàṅ • Sicigliàṅ | ||
| Dürä dal film: 110 minüt | ||
| Nasiōṅ: Itàglia | ||
Zucchero, miele e peperoncino (Sùcar, mēl e pavrunsèṅ) l'è na cumèdia a epiśòdi dal 1980 ad Sergio Martino ambintàda in 'n ufìsi giudisiàri rumàṅ in dua i s tìnan tri prucès.
A 'l èstar 'l è cgnusû cuma „Sucre, miel et piment“ in Frància, „Azúcar y miel“ in Spaggna e „Sugar, Honey and Pepper“ in di Stat Unî. Al braṅ di tìtui ad tèsta, Zucchero, miele e peperoncino, 'l è cantâ da i „Gruppo Clown“.
Sunt
Prim epiśòdi
Al pugléś Valerio Milanese (Lino Banfi), méntar 'l è drē a magnàr a 'l risturànt, al vèṅ scambiâ p'r un sasèṅ dimóndi periculóś, Matteo Pugliese, ch'l è péna scapâ via da parśòṅ. Al cumisàri Genovese (Enzo Robutti), emigliàṅ ad Bulógna, al gh dà la casa méntar la giuralìsta Amalia Passalacqua (Edwige Fenech), ch'la pénsa ad far al scoop dla sò vita, la 'l pòrta in dla sò cà 'd campàggna p'r intervistàr-al. Valerio al n capìs gnint e 'l créd che lē la vója andàr a lèt sèg. In cal mént'r a riva la pulisìa dand via a 'n sapèl.
Secónd epiśòdi
Giuseppe Mazzarelli (Pippo Franco) 'l è 'n buletàri ch'al fà fadìga a pagàr al buléti e a catàr quèl da magnàr tant ch'l ufisiàł giudisiàri (Luca Sportelli) 'l al śbàt fóra 'd cà. Par mét'r-as in bisàca un pôc ad bèsi al s ardùś a far la lavandàra cuma cumpàrsa in un film ma a gh và mâł anc lè. Durànt al viàś ad ritóran vèrs Róma al dmanda 'n pasàǵ a na dóna ciamàda Mara (Dagmar Lassander) che, scambiànd-al par na camaréra ad nóm Giuseppina, la gh śibìs 'd andàr a lauràr sèg. 'L óm, par scampàr, al decìd acsè ad tgnir-as la pirùca in cô, la stanèla lunga e ad dir ad sè. Al marè dla Mara, Duilio Mencacci (Glauco Onorato), al fà 'l maslàr, al la pìcia da spés e al gh mét anc i còran. Quànd chi lē la fà a mènt ch'la camaréra la lóga quèl in mèś a 'l gambi, la decìd 'd in prufitàr-as anc parchè la s è stufàda 'd star sèmp'r in cà da par lē. Tut a và bèṅ in fin tant ch'la Mara l'armàgn gravda e Duilio, ch'al n la gusa piò da 'n an, al s incàsa 'd brut.
Tèrs epiśòdi
Plinio Carlozzi (Renato Pozzetto) 'l è 'n tasìsta ch'al s è rót ad lauràr sóta padròṅ. Quànd al fà trédas a 'l Totocalcio al manda a giràr al fènig al titulàr dl'agensìa di taxi Scarnicchia (Elio Crovetto). Purtròp par lò in dal cupiàr i riśultâ in dla schedìna al s éra śbaliâ in dal scrìv'r-an òṅ, dònca al dódas al gh fruta sōl stanta-trimìla franc ch'i n èṅ mia abàsta par cumpràr na màchina nóva par mét'r-as da par lò ma par pagàr-la cun dal trati sè. Un dè al dà 'n pasàǵ a 'l sicigliàṅ Alfio (Sal Borgese) ch'al vōl far gusàr Saruzzo (Sandro Ghiani) cun la fiōla di Mancuso, la Rosalia (Patrizia Garganese), in manéra 'd custrìnś'r-i a far-i spuśàr par salvàr 'l unōr anc s'la ragàsa la n è minga 'd acòrd. Quànd Plinio al la salva, lì lē la decìd ad spuśàr-al e la sò famìja la gh còmpra 'n taxi tut nóṿ pagànd anc i dèbit.