The Mothman Prophecies - Voci dall'ombra
|
C'l artìcul chè 'l è scrit in
Miranduléś |
 The Mothman Prophecies
| ||
| The Mothman Prophecies - Voci dall'ombra | ||
 Richard Gere in na figùra dal film | ||
| Al prufesìi 'd Mothman - Vóś in dl'òra 2002 | ||
|---|---|---|
| Regìa: Mark Pellington | ||
| Scritōr: John A. Keel • Richard Hatem | ||
| Atōr: Richard Gere • Debra Messing • Will Patton Bob Tracey • Laura Linney • Yvonne Erickson David Eigenberg • Lucinda Jenney • Alan Bates | ||
| Müsica: tomandandy | ||
| Léngua: Ingléś | ||
| Dürä dal film: 119 minüt | ||
| Nasiōṅ: Stat Unî | ||
The Mothman Prophecies - Voci dall'ombra (Al prufesìi 'd Mothman - Vóś in dl'òra) 'l è 'n thriller dramàtic dal 2002 ad Mark Pellington trat da 'l rumànś umònim ad John A. Keel dal 1975 ispirâ a sò vòlta a di fat sucès dabòṅ òt an prima in dla Virgìgna Ucidentàla baśâ su la fòla 'd Mothman, 'l “Óm parpajóla”.
La pelìcula, giràda tuta in Pennsylvania e a Washington, l'à fat sù da piò ad sinquànta-sinc migliòṅ ad dòlar a frònt 'd un cóst ad trénta-dū.
Sunt
John Klein (Richard Gere) al fà 'l giurnalìsta p'r al Washington Post e tut a gh và bèṅ in fiṅ tant ch'a sò mujér Mary (Debra Messing) i dutōr i gh càtan par caś un cànc'r a 'l sarvèl dòp ch'l'éra andàda a 'l uśdàł a séguit 'd 'n incidènt in màchina. La dóna la mōr in présia ma prima 'd far-al la lasa di fujét cun di diségn strâṅ e na fraś scrita 'd cuntìnuv insìma: “'L à't vist?”.
Dū an dòp 'l óm, ch'al próa a vultàr paśna e a 'rfàr-as na vita, durànt un viàś in dla Virgìgna Ucidentàla, al s pèrd a Point Pleasant, dimóndi luntàṅ d'in du al gh'iva 'd andàr dabòṅ. Cuma s'a n fus minga abàsta, la sò màchina la gh'à 'n guàst e John al và a dmandàr ajùt a òṅ dal pòst, Gordon Smallwood (Will Patton). Dascurénd sèg chi lò al gh diś ch'al gh'à 'l stés brut mâł 'd sò mujér e che dòp un diśàst'r in aparéć 'l à vdû 'n raś ad Sōl e pò na figùra 'd 'n óm.
Cla nòt lè John al s insùnia la Mary, pò al vîṅ a savēr che Gordon 'l è mòrt. Al giurnalìsta al próa a 'ndàr-'g a fónd e 'l cgnós la pulisiòta Connie Mills (Laura Linney) ch'la gh diś ch'in paéś soquànti parsòni i gh'aṅ abû dal viśiòṅ 'd 'n èsar misterióś, 'l “Óm parpajóla”, ch'al sà ch'a gh sarà na daśgràsia.