The Life of David Gale
|
C'l artìcul chè 'l è scrit in
Miranduléś |
 The Life of David Gale
| ||
| The Life of David Gale | ||
 La McCarthy, Mann, la Winslet e 'n pòster di Siouxsie and the Banshees in na figùra dal film | ||
| La vita 'd David Gale 2003 | ||
|---|---|---|
| Regìa: Alan Parker | ||
| Scritōr: Charles Randolph | ||
| Atōr: Kevin Spacey • Kate Winslet • Laura Linney Gabriel Mann • Lee Ritchey • Matt Craven Rhona Mitra • Leon Rippy • Melissa McCarthy | ||
| Müsica: Alex Parker • Jake Parker | ||
| Léngua: Ingléś • Spagnōl | ||
| Dürä dal film: 130 minüt | ||
| Nasiōṅ: Stat Unî • Germàgna • Régn Unî | ||
The Life of David Gale (La vita 'd David Gale) 'l è 'n film dramàtic dal 2003 'd Alan Parker prudót insém a Nicolas Cage.
Al film 'l è custâ trént'òt migliòṅ ad dòlar e 'l à muciâ sù un quèl cumpàgn a 'l incìrca.
Sunt
Al prufesōr ad filuśufìa David Gale (Kevin Spacey) 'l è cundanâ a mòrt da 'l stat dal Tèxas par stup'r e umisìdi dla sò amìga Constance Harraway (Laura Linney), una ch'la s batìva sèg par n'asuciasiòṅ ciamàda „Death Watch“ ch'l'éra cóntar la péna capitàla. Quànd a gh cala sōl tri dè a l'eśecusiòṅ, al sò avucàt al s mét 'd acòrd c'n un giurnàl par véndar na sò intervìsta da far cun la Bitsey Bloom (Kate Winslet), una cun di prinsìpi ciàr in dla vita e ch'l'è bòna 'd tgnir di segrét tant ch'l'è anc andàda in parśòṅ p'r a n cuntàr briśa 'l sò fònt. La ragàsa la s fà jutàr p'r òṅ dal tirucìni, Zack Stemmons (Gabriel Mann), ch'al partìs sèg.
Tut 'l éra tacâ quànd par vindicàr-'s ad David na sò ex studènta, la Berlin (Rhona Mitra), na rója ch'la s éra śibìda ad far da tut sèg par pasàr 'l èśàm prima che lò al la faśìs casàr via da la scōla, la s éra fata gusàr fòrt e catìṿ da lò in dal cèso, c'n anc di murśgòt in dal spali, durànt na fèsta dl'università méntar 'l óm 'l éra mèś ciùc, pò l'iva fat denùnsia par stùpar a la pulisìa. Al prufesōr 'l éra finî in parśòṅ dòp un dibàtit televiśìṿ su la péna 'd mòrt c'n al guvernadōr dal Tèxas, Hardin (Michael Crabtree). In dal méntar sò mujér Sharon (Elizabeth Gast), da spés a Barcelóna par lavōr ma anc par mét'r-ag i còran, dòp avér pagâ la causiòṅ l'iva dmandâ la separasiòṅ e la s éra purtàda sèg sò fiōl Jamie (Noah Truesdale) in Spaggna.
David al s buta śò dimóndi, anc parchè i sò amìg dl'asuciasiòṅ i gh dànan cóntar cuma i sò cumpàgn ad mila batàj Ross (Sean Hennigan) e John (Charles Sanders), e al taca a bévar dvintànd 'n imbariagòs e pò al pèrd anc al pòst parchè, anc se la Berlin la s éra tiràda indrē a 'l ùltim minùt, par tut lò 'l éra 'l stupradōr ch'al l'iva fata franca.