State of Play
|
C'l artìcul chè 'l è scrit in
Miranduléś |
 State of Play
| ||
.png) Russell Crowe e Ben Affleck in na figùra dal film | ||
| Al stat dal ròbi 2009 | ||
|---|---|---|
| Regìa: Kevin Macdonald | ||
| Scritōr: Paul Abbott • Matthew Michael Carnahan Tony Gilroy • Billy Ray | ||
| Atōr: Russell Crowe • Ben Affleck • Helen Mirren Rachel McAdams • Robin Wright • Jeff Daniels | ||
| Müsica: Alex Heffes | ||
| Léngua: Ingléś • Cinéś | ||
| Dürä dal film: 125 minüt | ||
| Nasiōṅ: Stat Unî • Régn Unî • Frància | ||
State of Play (Al stat dal ròbi) 'l è 'n thriller dramàtic dal 2009 ad Kevin Macdonald trat da la minisérie televiśìva ad Paul Abbott.
Al film 'l à muciâ sù da piò ad nuànt'òṅ migliòṅ ad dòlar esénd-an custâ ssanta.
Sunt
A Washington na nòt un làd'r al vèṅ cupâ da 'n tisi misterióś c'n in maṅ na valìś che pò al spara a 'n óm in bicicléta (Woody Andrews), adét a cungnàr dal pizzi, ch'al psiva avér vdû quèl. Chi lò al finìs a 'l uśdàł in còma. La matìna dòp a mōr sóta i vagòṅ dla metrupulitàna la Sonia Baker (Maria Thayer), mémbar dal staff e amànta 'd Stephen Collins (Ben Affleck), un pulìtig a cap dna cumisiòṅ ch'la gh'à da far luś su i cuntribùt pùblic dâ da 'l Ministēr dla Diféśa a na sucietà privàda ad militàr ch'la cumbàt in Iràq, la „PointCorp“. Tut i crédan ch'la dóna la s sia tòlta la vita a part Stephen ch'l iva arsavû 'n vìddeo-mesàǵ a 'l telefunèṅ pròpria cal dè lè in dua la Sonia l'éra tuta cuntènta dònca 'l è difìcil pinsàr ch'la vulìs cupàr-as.
Quànd a s vèṅ a savēr a la televiśiòṅ di còran ch'l à mis a sò mujér Anne (Robin Wright), Collins al finìs in di guàj parchè tut i giurnài i gh staṅ adòs e la gint la taca a pinsàr mâł. Stephen al dmanda ajùt a 'n sò vèć amìg da i tèmp dal culéǵ, Cal McAffrey (Russell Crowe), giurnalìsta 'd mistēr. Chi lò al taca 'n indàśin su incàrag dla sò editōra, la Cameron Lynne (Helen Mirren), insém a la sò culéga, la Della Frey (Rachel McAdams). Chi lē la vèṅ a savēr da na sénsa téǵ drugàda, la Mandi Brokaw (Sarah Lord), ch'al làdar cupâ 'l éra 'n sò amìg e ch'l è mòrt mént'r al vliva dar indrē na valìś ch'l iva fargâ in cambi 'd bèsi. Ad dèntar i gh'éran dal foto dla Sonia insém a 'n àt'r óm, Dominic Foy (Jason Bateman). In cal méntar 'l óm dla bicicléta al vèṅ masâ pròpria quànd al stava méj e 'l éra drē a daśdàr-as.
Cal 'l è sicûr ch'in mèś i gh sìan qvéi dla „PointCorp“ e difàti al killer 'l è òṅ di marines, Robert Bingham (Michael Berresse).