Sex Crimes - Giochi pericolosi

C'l artìcul chè 'l è scrit in Miranduléś Emiliàn

Wild Things
Sex Crimes - Giochi pericolosi

La Richards e la Campbell in na figùra dal film
Crìmin ad Sès - Śōg periculóś
1998
Regìa: John McNaughton
Scritōr: Stephen Peters
Atōr: Matt DillonDenise RichardsKevin Bacon
Neve CampbellTheresa RussellBill Murray
Jeff PerryDaphne Rubin-VegaMarc Macaulay
Carrie SnodgressRobert WagnerDennis Neal
Cory PendergastJennifer TaylorPaulo Benedeti
Müsica: George S. Clinton • Jimmie Hodges
Léngua: Ingléś
Dürä dal film: 108 minüt
Nasiōṅ: Stat Unî


«
I mōran da la vója 'd śugàr tèg.»
(Tagline dal film)


Sex Crimes - Giochi pericolosi (Crìmin ad Sès - Śōg periculóś) 'l è 'n film thriller dal 1998 'd John McNaughton, girâ in Flòrida, cun tri séguit vgnû fóra diretamènt p'r al marcâ d'l home video. Custâ vint migliòṅ ad dòlar, al 'n à pò purtâ a cà da piò ad sinquànta-sinc, par la cuntintésa anc dal prudutōr e atōr Kevin Bacon che chè al n s fà minga di prubléma a far-as tōr śò nûd méntar 'l è drē a far-as na dócia.

Al tìtul uriginàl al sarév Wild things (Quèi salvàdag), ma gl'itagliàṅ, acsè cum i francéś, i aṅ vlû mét'r-ag dènt'r al sès listés. La pelìcula l'à dâ vita a tri àtar film su 'l stés argumènt, vgnû fóra diretamènt p'r al marcâ d'l home video: Sex Crimes 2 (2004), Sex Crimes 3 (2005) e Sex Crimes 4 (2010).

Sunt

La Kelly Van Ryan (Denise Richards) l'è na studènta tut pévar ch'la pèrd la tèsta p'r al sò insgnànt Sam Lombardo (Matt Dillon) ma pò la cònta a sò màdar Sandra (Theresa Russell), na dóna pîna ad bèsi ma sénsa sentimènt e sémpar drē a pascàr di masć śóvan da purtàr-'s a lèt, 'd èsar stada viulentàda da lò a cà sua. In séguit a salta fóra n'atra ragasōla, la Suzie Toller (Neve Campbell), una ch'la bév e ch'la gh'à di prubléma ad dròga, ch'la diś anca lē 'd avér patî al stés quèl da part dal prufesōr.

A gh 'n è asè par dar vita a 'n prucès. Sam al pèrd al lavōr e al finìs dèntar. A difénd'r-al a gh pénsa 'l avucàt Ken Bowden (Bill Murray), 'l ùnic dispunìbil ad far-as càrag dal caś. Durànt al dibatimènt, la Suzie la n gh la cava piò a purtàr avànti gl'acùśi e la cunfèsa 'd ès'r-as invintàda incòsa insém a la Kelly. Sam 'l è mandâ lìbar e al s pòrta a cà un muć ad bèsi, pagâ da i genitōr dla Kelly. Sōl a cal punt lè a s vèṅ a savér che chi tri là, 'l insgnànt e al fémni, i éran 'd acòrd par spartìr-'s incòsa. Purtròp par lōr a gh s mét in mèś al detective Ray Duquette (Kevin Bacon) ch'al sènt pusa 'd bruśâ e 'l è cunvìnt ch'a gh sia quèl ch'a traśa.

Soquànt tèmp dòp la Suzie la vèṅ catàda mòrta, masàda da Sam, e pò a pèrd la vita anc la Kelly, cupàda cun di mutìṿ bòṅ par difénd'r-as da Ray dòp che chi lò 'l éra andâ a cà sua par far-ag dal dmandi. Al detective al vèṅ casâ via da la pulìsia ma al gh'à la manéra ad cunsulàr-as listés parchè a s véd ch'al fà la dócia a cà ad Sam: i éran 'd acòrd lōr dū par far mità p'r òṅ.

Ma 'l surpréśi i n èṅ minga incóra finìdi.

Culegamènt estéran