C'l artìcul chè 'l è scrit in Miranduléś Emiliàn

Wag the Dog
Sesso & potere

De Niro e l'Anne Heche in na figùra dal film
Sès & putēr
1997
Regìa: Barry Levinson
Scritōr: Larry Beinhart
Hilary Henkin • David Mamet
Atōr: Dustin HoffmanRobert De NiroLu Elrod
Woody HarrelsonAnne HecheKirsten Dunst
Andrea MartinJim BelushiWilliam H. Macy
Geoffrey BlakeWillie NelsonDenis Leary
Michael BelsonSuzie PlaksonPhil Morris
Müsica: Mark Knopfler
Léngua: IngléśAlbanéś
Dürä dal film: 97 minüt
Nasiōṅ: Stat Unî


«
Cuma salvàr al presidènt da 'l Sexgate? Invintànd na guèra!!!»
(Tagline dal film)


Sesso & potere (Sès & putēr) l'è na cumèdia dramàtica americàna dal 1997 ad Barry Levinson trata da 'l rumànś „American Hero“ ad Larry Beinhart. Par cl'òpra chè Dustin Hoffman, acsè cuma i senegiadōr David Mamet e l'Hilary Henkin, 'l è stâ candidâ sénsa vìns'r a i Prèmi Òscar dal 1998. In tut al manéri al regìsta 'l à purtâ a cà 'n Ōrs 'd Argìnt a 'l 48śum Fèstival 'd Berlîṅ.

La pelìcula, ch'l'è custàda quìndas migliòṅ ad dòlar faghénd-an pò sù da piò ad ssanta-quàtar, l'è stata giràda un méś prima ch'a scupìs al scàndal Lewinsky e da 'l sucesìṿ bumbardamènt dl'indùstria di fàrmag “Al-Shifa” in Sùdan da part dl'aministrasiòṅ Clinton.

La tagline itagliàna dal film (Come salvare il Presidente dal Sexygate? Inventando una guerra!!!) l'è śbaliàda parchè a n s diś minga Sexygate ma Sexgate, paròla invintàda da i americàṅ tulénd spunt da 'l Watergate dal 1972 ch'a gh vdiva insaplâ 'l presidènt Richard Nixon.

Sunt

Par paràr via l'atensiòṅ di media e dla gint da 'n scàndal sesuàł ch'a gh véd insaplâ 'l presidènt di Stat Unî (Michael Belson), al sò spin doctor Conrad Brean (Robert De Niro), esénd a ùndas dè da gl'elesiòṅ, al decìd ad dmandàr ajùt a 'l prudutōr 'd Hollywood Stanley Motss (Dustin Hoffman) par mét'r in pē na guèra finta cóntar l'Albanìa da far vgnir fóra su i giurnài e in televiśiòṅ.

Al piàṅ al prevéd ad dar adòs a i balcànig dand-ag la cólpa 'd prutèśar di terurìsta ch'i aṅ prònta na bómba da butàr su na sità americàna. Pò in studi a gh'è da giràr na séna tarucàda par far vgnir al magòṅ a i spetadōr in du a s véd na śōvna albanéśa òrfna (Kirsten Dunst) scapàr via c'n un gatèṅ in bras sóta i cōlp di terurìsta. P'r ùltim a gh'è da far inténd'r a 'l pòpul ch'un suldâ americàṅ batśâ “Scarpa vècia” p'r al fat 'd èsar tròp bòṅ, William Schumann (Woody Harrelson), 'l è stâ fat parśunēr e adès a gh'è da far incòśa par liberàr-al. Mo a èsar sćèt chi lò al n è minga 'l sergìnt ch'a s vōl far crédar ma 'n stupradōr ad sōri. Quànd chi lò al próa a viulentàr dabòṅ na śōvna al vîṅ masâ da qvéi dla sicurésa e pò fat pasàr cuma eróe 'd guèra vitma di nemìg dal sò paéś, cun la bandéra americàna su la sò casa da mòrt.

Culegamènt estéran