Scuola d'onore
|
C'l artìcul chè 'l è scrit in
Miranduléś |
 School Ties
| ||
| Scuola d'onore | ||
 Brendan Fraser in na figùra dal film | ||
| Scóla 'd unōr 1992 | ||
|---|---|---|
| Regìa: Robert Mandel | ||
| Scritōr: Darryl Ponicsan • Dick Wolf | ||
| Atōr: Brendan Fraser • Matt Damon • Ben Affleck Chris O'Donnell • Randall Batinkoff • Amy Locane Cole Hauser • Zeljko Ivanek • Gwyneth Paltrow | ||
| Müsica: Maurice Jarre | ||
| Léngua: Ingléś • Francéś • Ebrèj | ||
| Dürä dal film: 106 minüt | ||
| Nasiōṅ: Stat Unî | ||
Scuola d'onore (Scóla 'd unōr) 'l è 'n film dramàtic dal 1992 girâ par Robert Mandel.
La pelìcula l'à fat sù da piò ad quatórdas migliòṅ ad dòlar.
Sunt
David Greene (Brendan Fraser) 'l è 'n ragàs ebrèj dna famìja 'd uperàj ad Scranton (Pennsylvania) ch'in di an Sinquànta al vins na bórsa 'd studi, 'l è dimóndi brâṿ a śugàr a Fùtbol Americàṅ, p'r andàr a studiàr a la St. Matthew's, 'n impurtànt culéǵ dal Massachusetts par gint cun di bèsi. Quànd al riva là al gh'à la manéra 'd cgnósar i sò cumpàgn nóṿ, Rip Van Kelt (Randall Batinkoff), Charlie Dillon (Matt Damon), Jack Connors (Cole Hauser) e Chris Reece (Chris O'Donnell) ch'al divìd la cambra sèg. Quànd al vèṅ a savēr che chi lōr i n s cumpatìsan briśa gl'ebrèj al decìd ad tgnir lugâ 'l sò segrét par tiràr avànti.
Par via dla sò bravitù in dal śugàr al tira sù la squàdra dla scóla ch'la s la pasàva mâł e al fà cōlp su la Sally Wheeler (Amy Locane) faghénd dvintàr gelóś Charlie ch'l è inamurâ 'd lē. Quànd chi lò al dascóva la véra su 'd lò al cònta incòsa a tut chi àtar ch'i tàc'n acsè a mét'r-al da na banda esénd tut di antisemìta. Qvél più catìṿ 'l è Richard Collins (Anthony Rapp) ch'al gh dà adòs dimóndi. Anc la Sally la gh vòlta 'l spali dgénd-ag ch'al n éra minga stâ sćèt sèg fiṅ da subìt. Un dè David al cata scrit ad sōvar dal sò lèt „Và a cà tua ebrèj“ cun dal śvastìchi.
Durànt un còmpit in clas ad stòria David al véd Dillon lugàr in dla maṅ un fujét cun scrit di sò apùt da cupiàr ma a la fiṅ dla próa, quànd tut i vànan fóra, al gh casca śò par tèra sénsa vlēr e 'l prufesōr Geirasch (Michael Higgins) al gh fà a mènt e 'l al cata sù. Chi lò al s arlìa dimóndi e al decìd ad far-la pagàr cara a tut s'al culpévul al n salta minga fóra da par lò. David al diś a Charlie ch'al sà incòsa ma 'l è pròpria lò a denunsiàr-al cuntànd na bala.