Porky's - Questi pazzi pazzi porcelloni
|
C'l artìcul chè 'l è scrit in
Miranduléś |
 Porky's
| ||
| Porky's - Questi pazzi pazzi porcelloni | ||
 Al grup prutagunìsta ad Porky's in na figùra dal film | ||
| Porky's - Chi pursèi spurcaciòṅ fóra 'd tèsta 1982 | ||
|---|---|---|
| Regìa: Bob Clark | ||
| Scritōr: Bob Clark | ||
| Atōr: Dan Monahan • Wyatt Knight • Tony Ganios Nancy Parsons • Kim Cattrall • Mark Herrier Roger Wilson • Wyatt Knight • Cyril O'Reilly | ||
| Müsica: Carl Zittrer • Paul Zaza | ||
| Léngua: Ingléś | ||
| Dürä dal film: 94 minüt | ||
| Nasiōṅ: Stat Unî • Cànada | ||
Porky's - Questi pazzi pazzi porcelloni (Porky's - Chi pursèi spurcaciòṅ fóra 'd tèsta) 'l è na cumèdia americàna e canadéśa dal 1982 ad Bob Clark, giràda da lò dòp na sfilaràda ad film ad scarésa cuma La morte dietro la porta e Black Christmas - Un Natale rosso sangue.
Al film, ch'al gh'à abû dū séguit, Porky's II - Il giorno dopo dal 1983 e Porky's III - La rivincita! dal 1985, 'l è ambintâ in dal 1954 in na scōla invintàda ciamàda Angel Beach High School.
A i butghèṅ al gh'à abû un sucès ad c'l àtar mónd avénd purtâ a cà da piò ad sènt-ùndas migliòṅ ad dòlar a frònt 'd un cóst ad sinc.
Sunt
Un grup 'd amìg ch'i stùdian insém in un college dla Flòrida al s mét in tèsta ad far ciulàr par la prima vòlta in dla sò vita Edward Morris (Dan Monahan), dit "Pipîṅ", ch'l è incóra vìrgin. Dal grup i faṅ part, fra i àtar, Tommy (Wyatt Knight), Billy (Mark Herrier), Mickey (Roger Wilson) e Anthony Tuperello (Tony Ganios) ch'al s pòrta sèg al scutmàj ad "Pilòṅ" par via dal sò pigugnìṅ bèl grôs. Chi lōr, anc par via di sò an, i pènsan sèmp'r a 'l sès. Un dè, mént'r i śógan a basket in dla palèstra dla scōla, 'l alenadōr Roy Brackett (Boyd Gaines) al gh la cava a far-as l'insgnànta Lynn Colamiele (Kim Cattrall), una ch'la pèrd la tèsta quànd la sènt 'l udōr di masć e l'è cgnusùda anc cuma "Lassie" parchè, quànd la 'l tōś, la siga cuma na caggna. Par cal mutìṿ lè, tut chi àtar i sènt'n incòsa.
Par far in manéra ad far pruàr al stés quèl anc a Pipîṅ, al grup al dà di bèsi a na putàna par far sès sèg a tùran, ma lē la gh tira 'n schèrs tgnénd-as i bèsi sénsa far gnint.
Na sira, par divertìr-'s insém, i amìg i decìdan 'd andàr a spasàr-'s-la in dal lucàl ad Porky (Chuck Mitchell), in dua dal dóni i bàlan e i s càv'n anc śò. Dòp avér-ag tòlt tut i bèsi, cal ciciòṅ là al s fà śōg ad lōr faghénd-i cascàr śò in dal padól. I śóvan i próan a far-as dar indrē incòsa cuntànd tut a 'l sierìf Wallace (Alex Karras) ma 'l è listés che ciucàr na spòrta róta parchè qvést chè a n è àtar ch'al fradèl ad Porky.
Turnâ in dal college, i studènt i decìdan 'd andàr a védar cal fémni mént'r i èṅ drē a cavàr-as śò sóta la dócia e i al faṅ par mèś ad soquànt buś in dal mur. Pipîṅ 'l è dasfurtunâ anca lè parchè la sa gh para davànti na budlòna e acsè lò al n è bòṅ ad védar gnint. Incasâ négar, lò al gh diś ad far-as da na banda ma in cla manéra chè al ragàsōli i capìsan ch'i masć i èṅ drē a tgnir-i 'd òć. Tommy al stà a 'l śōg miténd la sò léngua insfilsàda p'r al buś e al diś ch'l è prònt a lcar-i. Una ad qvili lè la gh fà 'n schèrs e la gh mét dal savòṅ in bóca e lò al fà 'l fùrub miténd-ag invéci al sò cas in mèś. Purtròp par lò a riva lè la catìva Beulah Balbricker (Nancy Parsons), l'alenadōra ciciòna dla squàdra ad basket dal fémni. Chi lē, arliàda dabòṅ, la gh s buta adòs tgnénd-'g-al stric cun al maṅ p'r a n far-al andàr via. Quànd però chi lò al gh la cava a scapàr via a fadìga, lì lē la và da 'l diretōr par dmandàr ad far 'n ispesiòṅ a i masć dla scōla p'r arcgnósar chi al fus stâ, avénd nutâ ch'in cal cas lè a gh'éra 'n nièl. Lē la vrév cavàr-i śò tut par guardàr-'g i pistulèṅ.