Monster (film 2003)
|
C'l artìcul chè 'l è scrit in
Miranduléś |
 Monster
| ||
.png) La Ricci e la Theron in na figùra dal film | ||
| Móstar 2003 | ||
|---|---|---|
| Regìa: Patty Jenkins | ||
| Scritōr: Patty Jenkins | ||
| Atōr: Charlize Theron • Christina Ricci • Tim Ware Bruce Dern • Pruitt Taylor Vince • Brett Rice Lee Tergesen • Annie Corley • Rus Blackwell | ||
| Müsica: Brian Transeau | ||
| Léngua: Ingléś | ||
| Dürä dal film: 109 minüt | ||
| Nasiōṅ: Stat Unî • Germàgna | ||
Monster (Móstar) 'l è 'n film dramàtic e biugràfic americàṅ e tedésc dal 2003 scrit e dirèt par la Patty Jenkins. Al cònta la stòria dla vita dl'Aileen Wuornos, la prima serial-killer dóna cundanàda a mòrt in di Stat Unî. Par cla part chè la prutagunìsta Charlize Theron, ch'l'è stada custréta a ingrasàr ad quìndas chilo e a druàr un truc ch'al la faśìs dvintàr bruta, l'à vins al Prèmi Òscar.
La pelìcula, in du a s sènt par 189 vòlti la paròla «fuck», l'è stada giràda in Flòrida e l'è custàda òt migliòṅ ad dòlar faghénd-an pò sù da piò ad ssanta. In dal film i s càtan di braṅ di Duran Duran (All She Wants Is), di Blondie (Tide Is High), di INXS (What You Need), di Chemical Brothers (Where Do I Begin), dla Joan Jett (Do you Wanna Touch Me (Oh Yeah)) e àt'r incóra méntar la culòna sunóra l'è firmàda par BT (Brian Transeau).
Sunt
Da quànd la gh'à tréd'ś an l'Aileen Wuornos (Charlize Theron) la fà la putàna par campàr. Un dè la finìs par śbali in un lucàl par gay e lè la cgnós na ragàsa ciamàda Selby (Christina Ricci) ch'la gh'à di prubléma in famìja parchè i n la vōlan minga. Al dū dóni i tàcan la relasiòṅ e i vàn'n a vìv'r insém anc se l’Aileen la cuntìnua listés a far la scaja parchè i gh'aṅ biśógn ad bèsi e lē la n cata minga di àtar lavōr da far.
Na nòt l’Aileen la masa 'n cliènt ch'al l'iva viulentàda, Vincent Corey (Lee Tergesen), ma pò la cuntìnua a far listés cun di àt'r óm ch'i n gh'ìvan briśa cólpa: Gene (Pruitt Taylor Vince), Evan (Marco St. John), Will (Marc Macaulay) e Horton (Scott Wilson).