Wikipedia

Meryl Streep

C'l artìcul chè 'l è scrit in Miranduléś Emiliàn

Prim piàṅ dla Meryl Streep


La Mary Louise Streep, cgnusùda méj cuma Meryl Streep (Summit, 22 'd Śugn dal 1949), l'è n'atōra, ardupiadōra e prudutōra 'd film americàna, batśàda da spés da i giurnài cuma la più granda atōra dla sò generasiòṅ [1] [2].

In dla sò caréra l'è stada candidàda par daśnóṿ vòlti a i Prèmi Òscar, un rècord, vinsénd-an tri p'r i film Kramer contro Kramer (1979), La scelta di Sophie (1982) e The Iron Lady (2011). La gh'è invéci andàda mâł in dal pelìculi Il cacciatore (1978), La donna del tenente francese (1981), Silkwood (1983), La mia Africa (1985), Ironweed (1987), Un grido nella notte (1988), Cartoline dall'inferno (1990), I ponti di Madison County (1995), La voce dell'amore (1998), La musica del cuore (1999), Il ladro di orchidee (2002), Il diavolo veste Prada (2006), Il dubbio (2008), Julie & Julia (2009), I segreti di Osage County (2013) e Into the Woods (2014).

Biugrafìa

Uriginària dal New Jersey, a dód'ś an la và a lesiòṅ ad cant pò la stùdia recitasiòṅ laureànd-'s in art dramàtica a la Yale Drama School faghénd in séguit al sò debùt a teàtar.

In dal 1975 la s fà avànti par recitàr in dal film King Kong ma Dino De Laurentis al la dascàrga parchè „L'éra tròp bruta“[3]. La Streep la gira la sò prima pelìcula dū an dòp par Fred Zinnemann, Giulia, ma 'l è in dal 1978 ch'la s fà nutàr c'n Il cacciatore ad Michael Cimino ch'la gh fruta na nomination a i Prèmi Òscar e cun la minisérie televiśìva Ulucàust ch'la gh fà ciapàr 'n Emmy.

La Meryl la gira pò Kramer contro Kramer in du la s litga cun Dustin Hoffman in na batàja giudisiària par tgnir sèg sò fiōl Bill dòp la fiṅ dal matrimòni. La part dla Joanna la gh fà vìns'r al Prèmi Òscar e la sò caréra la ciàpa 'l vōl. La Streep la lavóra cun Woody Allen (Manhattan), cun Robert Benton (Una lama nel buio), c'n Alan J. Pakula (La scelta di Sophie, àtar Prèmi Òscar par la part dna dóna pulàca parśunēra in un lager naśìsta), cun Mike Nichols (Silkwood), cun Ulu Grosbard (Innamorarsi insém a Robert De Niro) e cun Sydney Pollack (La mia Africa).

Un diségn ch'al la figùra
La sò firma
La Meryl tòlta śò in dal 1966
La Streep in dal 1990
La Streep a San Sebastiàṅ
Làurea a honorem 2010
La Meryl tòlta śò in dal 2012
L'atōra a Nadâł c'n Obama e sgnōra

Dòp dū film girâ cun Jack Nicholson, Heartburn - Affari di cuore e Ironweed, in dal 1989 la vins la Palma 'd Òr a 'l Fèstival ad Cannes par la sò part in Un grido nella notte ispiràda a 'n fat sucès dabòṅ dna dóna austragliàna misa in parśòṅ par śbali parchè i giùdas i cardìvan ch'l'is cupâ lē la sò putìna quànd invéci l'éra stâ 'n ding a purtàr-la via e a magnàr-la.

In di an Nuànta la gira la cumèdia La morte ti fa bella, in du la fà a gara cun la Goldie Hawn p'r arfàr-as da piò, pò la gira 'l thriller ad Curtis Hanson The River Wild - Il fiume della paura, al film rumàntic I ponti di Madison County ad Clint Eastwood e la pelìcula La stanza di Marvin cun Robert De Niro, Leonardo DiCaprio e la Diane Keaton. P'r al film ad Wes Craven La musica del cuore l'impàra dabòṅ a sunàr al viulèṅ.

In dal 2001 la lavóra cun Steven Spielberg in AI - Intelligenza artificiale, pelìcula ch'al gh'iva da giràr Stanley Kubrick s'al n fus minga mòrt in cal méntar. In dal 2002 la fà na lèśbica in The Hours, recitâ insém a la Nicole Kidman e a la Julianne Moore, ch'la gh fruta na candidadùra a i Golden Globe. In dal 2004 la tōś part insém a Denzel Washington a 'l thriller The Manchurian Candidate pò dū an dòp la figùra in d'l ùltim film ad Robert Altman, Radio America, e in dla cumèdia Il diavolo veste Prada.

In dal 2008 l'è la prutagunìsta ad Mamma Mia!, adatamènt p'r al cìnema 'd un musical teatràl ch'al dróa 'l canti dal grup śvedéś di Abba, e 'd Il dubbio in du a s dascór d'l argumènt di “prēt pedòfil”[4].

In dal 2011 la vins al sò tèrs Prèmi Òscar faghénd la “Sgnōra 'd Fèr”, la Margaret Thatcher, in dla pelìcula The Iron Lady. Tri an dòp la gira 'n àtar musical, Into the Woods, ch'al mìsćia insém soquànti fòli cuma Cenerentola, Cappuccetto Rosso, Raperonzolo e Jack e la pianta di fagioli.

Filmugrafìa

Culegamènt estéran

Nòti

  1. ↑ Meryl Streep, parchè lē l'è la mijóra 'd tuti Donne Europa, 5 ad Favràr dal 2014
  2. ↑ Meryl Streep - A 'l sò, l'Amèrica la dirà: Incóra lē? Ma l'è l'ultma vòlta La Stampa, 28 ad Favràr dal 2012
  3. ↑ «Ag bruta!». Cal chè qvél ch'l iva dit Dino De Laurentiis dla Meryl Streep a 'l sò pruvèṅ Best Movie, 23 ad Śugn dal 2015
  4. ↑ Meryl, da 'l musical a i prēt pedòfil. In "Al Dubi" na próa da Òscar La Repubblica, 27 ad Śnar dal 2009
Estratto da "https://eml.wikipedia.org/w/index.php?title=Meryl_Streep&oldid=122892"