Manhattan (film)
|
C'l artìcul chè 'l è scrit in
Miranduléś |
 Manhattan
| ||
 La Meryl Streep e Woody Allen in na figùra dal film | ||
| id. 1979 | ||
|---|---|---|
| Regìa: Woody Allen | ||
| Scritōr: Woody Allen • Marshall Brickman | ||
| Atōr: Woody Allen • Diane Keaton • Meryl Streep Mariel Hemingway • Michael Murphy • Tisa Farrow Anne Byrne Hoffman • Karen Ludwig • Bella Abzug Michael O'Donoghue • Helen Hanft • Karen Allen | ||
| Müsica: George Gershwin | ||
| Léngua: Ingléś | ||
| Dürä dal film: 96 minüt | ||
| Nasiōṅ: Stat Unî | ||
Manhattan (id.) 'l è na cumèdia americàna dal 1979 ad Woody Allen. L'è stada giràda in biànc e négar e l'è stada preśentàda a 'l 32śum Fèstival ad Cannes fóra cuncōrs. Inóltar l'è stada candidàda a vìnsar dū Prèmi Òscar in dal 1980 (atōra minga prutagunìsta a la Mariel Hemingway e senegiadùra briśa uriginàla fata méj a Woody Allen e a Marshall Brickman) sénsa però purtàr a cà gnint.
Al film 'l à fat sù quarànta migliòṅ ad dòlar, un sucès dimóndi grand esénd-an custâ sōl nóṿ.
Sunt
Isaac Davis (Woody Allen) al gh'à quarànta-dū an, al viṿ a Manhattan e ad mistēr al fà 'l autōr televiśìṿ. Da pôc tèmp 'l è stâ mulâ da la sò secónda mujér Jill (Meryl Streep) ch'l'à sarnî 'd andàr a star a cà dla sò muróśa 'd adès, la Connie (Karen Ludwig). Da 'l cant suo Isaac al và a drē a na ragasōla ad darsèt an, la Tracy (Mariel Hemingway), anc s'al créd ch'a dir dabòṅ a sia 'n quèl ch'l and'rà avànti pôc parchè lì lē l'è tròp pìcula par lò. Anc al sò amìg Yale (Michael Murphy) al n s la pasa minga tant bèṅ parchè al s è ligâ a na giurnalìsta divursiàda, la Mary (Diane Keaton), anc s'l è incóra spuśâ cun l’Emily (Anne Byrne Hoffman).
Quànd Isaac al cgnós la Mary, al gh armàgn mâł parchè al la cata pēśa, minga a la bòna e una ch'la sà tut lē. Dòp che lò al s è licensiâ, par véndar da par lò i sò lìbar, e ch'l à spatinâ in 'n apartamènt ch'al cósta méno, a na fèsta al véd incóra la giurnalìsta e al dvénta sò amìg. In cal méntar la Tracy, ch'la gh'à da 'ndàr a studiàr a Lóndra, la gh dmanda 'd andàr-ag sèg ma lò al n è mia 'd acòrd, anc parchè Yale e la Mary i s mòlan e lò al gh'à camp lìbar par pruàr-ag dabòṅ cun la pràtica dal sò amìg.