C'l artìcul chè 'l è scrit in Miranduléś Emiliàn

I pòst in du a s è stablî al ding
Un ding


Al ding (Canis lupus dingo) 'l è 'n mamìfar dla famìja di Canìdi e dla spéce di Canis lupus cun pēl curt ad culōr créma o rusàstar sénsa maci. 'L è stâ purtâ in Austràglia da 'l óm da l'Àśia trimìla-e-sincsènt an fà a 'l incìrca.

Al viṿ anc in Thailàndia, in dal sud-èst dla Cina, in dal Làos, in Malèśia, in Indunèśia, in dal Bòrneo, in dal Filipìni e in dla Guinèa Nóva.

Descrisiòṅ

Al ding l'è na bèstia ch'la magna la carna, specialmènt qvéla di uśèi e di rètil cuma 'l luśèrti ma anc qvéla di cangûr s'i èṅ pìcui, dal pégri, di cunèṅ e di sórag. In gèn'r i vaṅ a casa da par lōr ma quànd al bèsti da masàr i èṅ grandi i s mét'n insém. Dal vòlti i vìvan davśèṅ a i vilàǵ d'l óm par magnàr quèl ch'a gh vansa e ch'a finìs in dal rusc.

I sò nemìg naturài i èṅ 'l óm (in Àśia al vîṅ anc vindû p'r èsar magnâ), i cucudrìi e anc di àtar canìdi o di ding ch'i fànan part di àtar branc. I pìcui i pōl'n anc èsar vitmi di uśèi rapàś.

Par salvàr la sò rasa e par far in manéra ch'al s mìsćia mia cun di àtar canìdi, in dl'Ìśula 'd Fraser 'l è prutèt e 'l è pruibî purtàr-ag di caṅ. A 'l stat salvàd'g al scampa in gènar déś an méntar s'l è tirâ sù da 'l óm al pōl rivàr anc a tréd'ś an e pasa.