Jack Sock
|
C'l artìcul chè 'l è scrit in
Miranduléś |
Jack Sock (Lincoln, 24 ad Setémbar dal 1992, a s lèś /dʒæk sɑk/ in ingléś) 'l è 'n tenìsta americàṅ.
Uriginàri dal Nebràska anc s'adès al stà a Kànsas City (Kànsas), Jack al dróa al bras dèstar e al tira 'l arvèrs a dū maṅ. 'L è élt 191 cm e al péśa 84 chilo. In emigliàṅ al sò cugnóm a vōl dir calsét. Jack, ch'l à patî n'uperasiòṅ a 'n galòṅ in dal 2014, al gh'à 'n fradèl più grand ad nóm Eric ch'l è andâ in a risć ad murìr par n'infesiòṅ a i palmòṅ[1].
In dla sò caréra 'l à vins siē turnèo in dópi, anc qvél ad Wimbledon insém a Vasek Pospisil in dal 2014 baténd i fradèi Bryan, e òṅ in singulàr in dal 2015 a Houston in finàl cóntar Sam Querrey. Inóltar insém a la Melanie Oudin 'l à purtâ a cà 'l tìtul ad dópi misć a gl'US Open dal 2011, turnèo ch'l à vins anc da par lò in dla categurìa „śōvan“.
'L è stâ bòṅ ad rivàr a la puśisiòṅ nùmar vint-a-dū dal ranking al 18 ad Śnar dal 2016.
Caréra
Dòp avér śugâ i sò prim turnèo futures in dal 2009, in dal 2010 i gh dànan na carta salvàdga par gl'US Open in dua però al pèrd subìt p'r al śvìsar Marco Chiudinelli.
In dal 2015, in sla tèra batùda 'd Houston, al vins al sò prim tìtul ATP baténd par 7-6 7-6 c'l àt'r americàṅ, Sam Querrey. A 'l Roland Garros al riva par la prima vòlta in caréra in di quàrt 'd un turnèo Slam baténd Grigor Dimitrov, Pablo Carreño Busta e Borna Ćorić prima 'd céd'r a Rafael Nadal. In Utóbar al riva in finàl a Stucólma ma al pèrd cun Tomáš Berdych par 6-7 2-6.
In dal 2016 al śōga pardénd-li atri dū finàli. In Śnar a Auckland al n è mia in cundisiòṅ ad finìr al sò incóntar cun Roberto Bautista Agut e al gh'à da bandunàr in dal secónd set[2] mént'r a Houston al pèrd par 6-3 3-6 5-7 da 'l argintèṅ Juan Mónaco.
Culegamènt estéran
Wikiquote contiene citazioni di o su Jack Sock
Wikimedia Commons contiene file multimediali su Jack Sock
Nòti
- ↑ In fiṅ 'd vita al fradèl ad Jack Sock Ubi Tennis, 23 ad Śnar dal 2015
- ↑ ATP Auckland: Sock al gh dà sù par la févra, tìtul a Bautista-Agut Ubi Tennis, 16 ad Śnar dal 2016