Masamènt dla JonBenét Ramsey

C'l artìcul chè 'l è scrit in Miranduléś Emiliàn

La tómba dla JonBenét Ramsey in dal campsànt episcupàł ad San Jàcum a Mariéta (Geòrgia)


Al masamènt dla JonBenét Ramsey 'l è 'n umisìdi minga risòlt ch'a gh'è stâ al dè 'd Nadâł dal 1996 quànd na putìna 'd siē an l'è stada catàda mòrta masàda in dla cantìna dla cà di suo a Boulder (Culuràdo). A 'l inìsi a s è suspetâ di sò genitōr e anc dal sò fradlèṅ più grand, ólt'r anc a 'n furastēr, ma 'l culpévul al n è mai stâ catâ. Dal caś a s 'n è dascōrs dimóndi in di giurnài e a la televiśiòṅ ad tut al mónd.

La famìja

La JonBenét Ramsey l'éra nada a Atlànta in Geòrgia al 6 'd Agóst dal 1990 ma a nóṿ méś l'éra andàda a star in Culuràdo quànd la sò famìja l'à spatinâ a Boulder. Sò pàdar John Bennett Ramsey, uriginàri dal Nebràska, 'l éra 'n imprendidōr in dal camp d'l Infurmàtica e 'l éra pîṅ 'd bèsi. In dal 1980 chi lò 'l iva spuśâ in secóndi nòsi la Patricia Ann Paugh, dita Patsy, na socialite laureàda in giurnalìśum e Miss West Virginia dal 1977, più śōvna 'd lò ad tréd'ś an. La còpia la gh'iva 'n àtar fiōl ad nóṿ an, Burke, abû in dal 1987.

Fiṅ da pìcula la Patsy l'iscrivìva la JonBenét a di cuncōrs ad belésa par putìni che lē, c'n i cavìi tinśû 'd biónd cuma na Barbie, la vinsìva da spés cuma 'l tìtul ad Little Miss Colorado Sunburst in dal 1995. La putìna però la gh'iva 'n prubléma, la s pisàva adòs ad nòt bagnànd al stramàs.

La mòrt

La sira 'd Nadâł dal 1996 la famìja Ramsey l'éra andàda a séna a cà di sò amìg, Fleet e la Priscilla White. A déś óri dla sira, turnâ a cà, i genitōr i ìvan mis a lèt i putèṅ par pò andàr a preparàr la valìś ch'i gh'ìvan da partìr insém p'r un viàś par San Stēvan.

La matìna dòp, a sinc óri e mèś dla matìna, la Patsy l'iva dit ch'la s éra daśdàda catànd di bijét lung la scala ch'la purtàva in cuśìna in du a gh'éra scrit che di rapidōr i ìvan purtâ via la JonBenét e ch'i dmandàv'n un riscàt. Qvést chè 'd sóta 'l è 'l mesàǵ lasâ da i rapidōr:

«
Mr. Ramsey, Listen carefully! We are a group of individuals that represent a small foreign faction. We do respect your bussiness but not the country that it serves. At this time we have your daughter in our possession. She is safe and unharmed and if you want her to see 1997, you must follow our instructions to the letter. You will withdraw $118,000.00 from your account. $100,000 will be in $100 bills and the remaining $18,000 in $20 bills. Make sure that you bring an adequate size attache to the bank. When you get home you will put the money in a brown paper bag. I will call you between 8 and 10 am tomorrow to instruct you on delivery. The delivery will be exhausting so I advise you to be rested. If we monitor you getting the money early, we might call you early to arrange an earlier delivery of the money and hence a earlier delivery pick-up of your daughter. Any deviation of my instructions will result in the immediate execution of your daughter. You will also be denied her remains for proper burial. The two gentlemen watching over your daughter do not particularly like you so I advise you not to provoke them. Speaking to anyone about your situation, such as Police, F.B.I., etc., will result in your daughter being beheaded. If we catch you talking to a stray dog, she dies. If you alert bank authorities, she dies. If the money is in any way marked or tampered with, she dies. You will be scanned for electronic devices and if any are found, she dies. You can try to deceive us but be warned that we are familiar with law enforcement countermeasures and tactics. You stand a 99% chance of killing your daughter if you try to out smart us. Follow our instructions and you stand a 100% chance of getting her back. You and your family are under constant scrutiny as well as the authorities. Don't try to grow a brain John. You are not the only fat cat around so don't think that killing will be difficult. Don't underestimate us John. Use that good southern common sense of yours. It is up to you now John!
Victory! S.B.T.C.»
(EN)
«
Sgnōr Ramsey, Scólta bèṅ! A sém un grup ad parsòni ch'i repreśéntan na fasiòṅ pìcula furastéra. A purtém rispèt p'r al vòstar lavōr ma minga par la nasiòṅ in du 'l fâṿ. Pròpria adès vòstra fiōla a gh l'ém nuàtar. La stà bèṅ e s'a vlî ch'la véda 'l 1997, a gh'î da tgnir adrē a 'l nòstri istrusiòṅ a la létra. Tulî sù 118.000$ da 'l vòstar cònt. 100.000 i gh'aṅ da ès'r in bòṅ da 100 e gl'atar 18.000 in bòṅ da 20. Faghî in manéra 'd purtàr a la banca na valìś granda cum a s dév. Quànd a turnarî a cà, mitî i bèsi in na busta 'd carta maròṅ. Mè a v ciamarò dmatìna fra 8 óri e 10 óri par dar-uv gl'istrusiòṅ par la cunséggna. La cunséggna la custarà fadìga donca a v cunsìli ad punsàr bèṅ. S'a vdém ch'a tulî sù i bèsi prima, a v ciamarò prèst par mét'r-as 'd acòrd su na cunséggna in antìsip e dònca par dar-'v indrē prima vòstra fiōla. S'a v dascustarî da 'l mè istrusiòṅ, vòstra fiōla la sarà cupàda subìt. A n gh'arî gnanc i rèst p'r al funeràł. I dū sgnōr ch'i la tìnan 'd òć i n gh'ànan minga na simpatìa particulàra par vò, dònca a v al dig ciàr, minga pruvucàr-i. Dascórar cun di tisi basta ch'a sia dla vòstra situasiòṅ, cuma la pulisìa, 'l FBI, etc., a purtarà a 'l riśultâ dla decapitasiòṅ ad vòstra fiōla. S'a va vdém dascórar anc c'n un caṅ rugnóś, lì lē la mōr. S'i bèsi i èṅ in na quàlc manéra sgnâ o manipulâ, lì lē la mōr. A psî anc pruàr a imbrujàr-as ma a gh'î da savēr ch'a cgnusém dimóndi bèṅ al tàtichi e 'l contarmiśùri dal fòrsi d'l órdan. A gh'î 99 prubabilità su 100 ad masàr vòstra fiōla s'a pruarî a fargàr-as. Tgnî adrē a 'l nòstri istrusiòṅ e a gh'arî al 100% ad prubabilità 'd avēr-l'indrē. Vò e la vòstra famìja a sî tgnû 'd òć sèmpar, acsè cuma gl'autorità. Minga tintàr ad far al fùrub, John. Ta n sē minga 'l ùnic ricàstar chè 'd intóran, dònca minga pinsàr che par nuàt'r a sia difìcil cupàr. Minga tōr-as sót-gamba, John. Dróa cal tò bòṅ sèns dal Sud. Adès a dipénd da tè John!
Victory! S.B.T.C.»
(MUD)

A n catànd-la minga in dla sò cambra, la dóna l'iva ciamâ subìt al 911 dmandànd ajùt ch'l'éra dagnóra siē óri dla matìna. La Patsy l'éra tuta pîna 'd angùstia ma pò l'iva mis śò subìt a 'l impruvìś. La dóna dal 911 la la ciamàva par nóm, esénd ch'la Patsy la n iva minga pugiâ bèṅ la curnéta, ma lē la n gh'iva minga fat a mènt esénd ch'la s éra misa a dascórar nurmàł cun n'atra parsòna, fórsi dū. In séguit la pulisìa l'è vgnuda a savēr ch'i 118.000 dòlar dmandâ, na cifra piutòst basa p'r i bèṅ di Ramsey, i éran qvéi di bònus dla sò dita che John al gh'iva a purtàr a cà p'r al fèsti. Inólt'r al mesàǵ ad dū paśni e mèś, dimóndi lung p'r èsar quèl 'd un riscàt ch'a n gh'è mia tant tèmp par butàr-al śò in présia, 'l éra stâ scrit druànd na péna dla Patsy e tri fój sćiancâ via da 'n sò quadèran. Anc s'la létra la dgniva 'd tgnir la bóca saràda, la màdar l'iva fat tut al cuntràri miténd in perìcul la putìna, ciamànd la pulisìa mo anc parènt e amìg, tut a cà sua. I pulisiòt rivâ in cà i aṅ dâ n'uciàda in présia sénsa catàr gnint ad strâṅ.

Vers l'una dòpmeśdè la pulisiòta Linda Arndt l'iva dmandâ a Fleet White e a John Ramsey 'd andàr a véd'r in gir par la cà s'a gh'éra qvèl ch'a traśàva. Tacànd a pascàr in dal seminterâ, John 'l iva catâ 'l cadàv'r ad sò fiōla lugâ sóta na quèrta. A gh'éra dal nàst'r adeśìṿ su la bóca, cuma s'al sasèṅ al la vlis far taśēr mént'r al la masàva, ma in séguit l'autopsìa l'à dit ch'al scotch 'l è stâ mis in ghigna post-mortem parchè insìma a n gh'éra mia dla salìa dla putìna. A 'l còl e a 'l maṅ a gh'éra na lasa par tgnir-la sòdi mo i gróp i n éran briśa stric dimóndi a dir dabòṅ. La JonBenét la gh'iva 'l crani scavśâ a séguit 'd un brut cōlp ciapâ in cô, fórsi cun na pila par far luś, e l'éra stada strusàda cun na garòta fata c'n un fîł 'd nylon ligâ a 'n mànag sćiancâ 'd un pnèl dla Patsy.

In dla cantìna a gh'éra na fnèstra mèśa avèrta, bèla śbragàda da soquànt dè, ma 'l è difìcil ch'un furastēr al s sia insfilsâ dèntar da 'd lè parchè a sa vdiva incóra na tlaréda lè atàc.

Culegamènt estéran