Cuncōrs ad belésa par putìni
|
C'l artìcul chè 'l è scrit in
Miranduléś |
I Cuncōrs ad belésa par putìni i èṅ dal gari ad belésa ch'i s tìn'n in di Stat Unî fra putìni o baghéti 'd sóta di 16 an. Cal cumpetisiòṅ lè, ciamàdi da lōr Child beauty pageant, i pōlan cumprénd'r anc al truc adòs, giràr su i tac, patnadùri da dóna e dal próvi 'd talènt cuma èsar bòni 'd intervistàr o èsar dal bravi mudèli p'r i vistî spurtìṿ, western, casual, ad tut i dè o da sira e custùm da bagn. I gh tōśan part tri migliòṅ ad putìni[1].
Al cuncurènti i èṅ da spés divìśi tgnénd cònt di sò an: 0-11 méś, 12-23 méś, 2-3 an, 4-6 an, 7-9 an, 10-12 an, 13-15 an e 16-18 an. I tìtui in bal i èṅ "Baby Miss", "Petite Miss", "Little Miss" e àt'r incóra.
Par figuràr méj al putìni i gh'aṅ da rivàr bèli brunśàdi (anc a sprus), cun di cavìi lung (anc fint), truc parfèt, extension a gl'ungi e dènt arfàt o fals (a s sà ch'i putèṅ i i càmbian carsénd). In gènar a s armàgn su 'l palc un minùt e mèś, minga da piò.
L'iscrisiòṅ la pōl pasàr da sinc a utànta dòlar, a dipénd. Ma 'l grôs dla spéśa l'è preparàr-li prima.
Riferimènt stòric
Un prim cuncōrs dal gènar 'l è nâ in dal 1921 quànd al pruprietàri 'd 'n hutèl 'd Atlantic City 'l à strulgâ cl'idéa chè par cuciàr in élt al turìśum. In dal 1960 in dal New Jersey a tōś al via al cuncōrs “Little Miss America”, a 'l inìsi par ragàsi da i 13 a i 17 an, ma pò i èṅ stati acsè tanti al partesipànti ch'in dal 1964 i èṅ stâ custrét a divìdar-li p'r età. Semp'r in di an Ssanti a 'n è nâ 'n àt'r a Miami. Al dè 'd incō i cuncōrs in Amèrica i rìv'n a duśènt-sinquantamìla a 'l incìrca c'n un faturâ stimâ ad vint migliàrd ad dòlar. In na quàlc manéra i Cuncōrs ad belésa par putìni i s èṅ pò stramnâ in tut al mónd, anc in Rùsia[2] o in Itàglia[3].
Nòti
- ↑ "Bèli e dascuntènti", l'Amèrica la férma 'l miss pìculi La Repubblica, 27 ad Śugn dal 2011
- ↑ Rùsia, dòp la campàggna su i gay na cruśàda cónt'r i cuncōrs ad belésa par putìni Il Secolo d'Italia, 18 ad Nuvémbar dal 2013
- ↑ I cuncōrs ad belésa par mudèli-putìni i cunquìstan l'Itàglia La Stampa, 7 ad Nuvémbar dal 2013