C'l artìcul chè 'l è scrit in Miranduléś Emiliàn

La Marchéśa Yanus


La Marchéśa Yanus l'è 'n persunàǵ d'l anime Gran Mazinga, creâ p'r al senegiadōr Gō Nagai.

La Marchéśa Yanus la fà 'l sò debùt in dal cartòṅ animâ dal Gran Mazinga vèrs la mità dla série par tōr al pòst dal Grandùca Gorgon, mòrt in cumbatimènt, e jutàr acsè al Minìstar Àrgos in di sò piàṅ esénd lē 'l as ad brìscula in fat ad tragatèṅ e 'd traplàdi cóntar la Furtésa dal Siénsi. La cuntròla la baś dl'Ìśula vulcànica e la cmanda 'l Còrp di Cattloo, di suldâ ninja cun la ghigna 'd gat.

La marchéśa l'è na stria ch'la gh'à dū ghigni in mèś a di lung cavìi vióla, una bèla ch'la móstra da spés e cl'atra da scarésa cun la pèla vérda ch'la salta fóra quànd chi lē la prila la tèsta 'd 180° a 'l indrē. L'è sèmpar cumpagnàda p'r un gat négar ch'al s tîṅ sòdi su la sò spala e la gh'à 'n spróc ad légn in maṅ ch'al spuda energìa.

La Yanus, a difarénsa di àtar mémbar dla rasa di Mikenes, la n è minga custréta a vìvar fisa in un un robot ma la s pōl mōvar druànd al teletraspòrt p'r andàr dapartùt. Quànd la decìd 'd armàgn'r-ag dèntar, la cata puśisiòṅ in dla sò téta sinìstra.

La mōr in dl'ultma puntàda dal cartòṅ animâ quànd la furtésa Demonica la salta p'r ària.