La gabbianella e il gatto
|
C'l artìcol chè 'l è scrit in
Carpśàn |
 La gabbianella e il gatto
| ||
| La gabbianella e il gatto | ||
 La banda di gat ed lung ala sponda dal canèl dal port. | ||
| La gabianèla e 'l gat 1998 | ||
|---|---|---|
| Scritōr: Luis Sepúlveda | ||
| Regìa: | ||
| Senegiadùra: Umberto Marino | ||
| Personâǵ: Śorba • Fortunèda • Diderot Segretàri • Colonèl • Bucìn • Rośa di Vèint Kengah • Igor • Bubulèina • Al Grand Sòreg | ||
| Dupiadōr originêl: Carlo Verdone • Sofia Baratta Veronica Puccio • Leda Battisti • Domitilla D'Amico Antonio Albanese • Luca Biagini • Valerio Ruggeri Paolo Lombardi • Gabriele Patriarca • Paola Tedesco Massimo Lodolo • Alida Milana • Ivana Spagna Fabrizio Vidale • Melba Ruffo | ||
| Mùśica: David Rhodes | ||
| Durèda dal cartòun: 76 minût | ||
| Lengua: Itagliàṅ | ||
| Nasiòun/Paēś: Itàglia | ||
La gabbianella e il gatto (a dìr "La gabianèla e 'l gat") 'l è 'n cartòun animê dal 1998 prodòt da 'l Cecchi Gori Group in Itàglia, dirèt da Enzo D'Alò e tolt dala fola ed Luis Sepúlveda "Historia de una gaviota y del gato que le enseñó a volar".
Sunt edla fóla
Na banda 'd amìg gat, Śorba, Colonèl, Segretàri, Diderot e Bucìn i s caten per tgnìr a bèda na maramàja ed pundgàsi stremnèdi in del fùgni 'd Ambûrg. Chel pòundghi lè, cmandèdi da 'l Grand Sòreg, i gh'àn sèimpr in amèint 'd impinìr el só scorti ed furmàj ma, sovertùt, ed conquistèr la sitê. Gran Sòreg al li cmanda tuti cun dimòndi impéri e in pòunpa magna. Ind ùn di scòunter tra pundgàsi e i noster gat, Śorba 'l armàgn frî a na sampa e a gh'tòca scapèr vìa ed dardòun. In dal turnèr a cà, Śorba al pasa per al tras ed na gatèina dimòndi blèina, la Bubulèina, ch'la gh'taca a piaśér.
Na sira, gnanc tant luntàn da 'l port, na berca a mutōr la ciàpa còuntr'a na petroléra, ch'a gh'vin un śbrègh e soquànt petròli al se stremna ed lung al mèr. Al dè dòp, i gabiàn in serca ed pès, i s tùfen in dl'aqua per ciapèrn un quelcdùn, mo la gabiàna Kengah, ch'l'è lè lè per mèter śò al só prim ōv, la s inbàt pròpia in dla pòsa dal petròli e dòunca, la và anc in arìsć ed murìr avelenèda lè da mèś. Furtùna la vōl che la Kengah la gh'la chèva ed vulèr in na quèlc manéra infìn a riva e caschèr acsè sèinsa fiê pròpia in dal curtìl ed Śorba.
Bah, la pusa dimòndi ed catìv udōr, la Kengah! Mo chelē la gh'dìś subìt, a Śorba, ch'a n'gh'è minga tanti quistiòun. Lē l'è drē a murìr, la gh'lasa lè al só ōv, mo lò, Śorba, al gh'à da prumètregh ch'l insgnarà a vulèr ala gabianèla cichìna ch'a gh'gnarà fóra. La gh'ìva ragiòun la Kengah, anc se 'l grup di gat i s fèvn in quàter per tóregh vìa al petròli dagli èli, mo lē la spirèva ded lè a pòc, dòp 'd avér mìs śò al só prim ōv.
I gat i s infórmen, quant a durarà la còva 'd un ōv ed gabiàṅ?! Vèint dè, a gh'è da fèregh la còva in sìma, al gh'è scrit dimòndi cèr in dl'ensiclopedìa dal gat Diderot. Na promèsa la và mantgnùda e, anc s'an s era mài vist prìma un gat ch'al faga la còva, Śorba al s gh'adàta, luntàn dai só gir 'd amìg e interèsi ed chièter dè.
Anc la gata Bubulèina la và a catèr Śorba, per capìr che fin 'l àpia fat, tant che lò al s vergògna anc un pô, ed stèr lè in dla còva edl ōv, mo pròpia in cal mèinter lè, a se sćiànca 'l gùs edl ōv e la gabianèla finalmèint la nas.
"Mama, mama, a gh'ò fam!", la gh'diś a Śorba, "Mama, mama, a gh'ò fàam!!" Adèsa Śorba al gh'à da capìr cuśa dèr da magnèr ala Fortunèda, che acsè lò al la ciàma subìt. I crocantèin i n'gh'pièśen brìśa, i magnèr edla só umàna gnanca. El moschi però sè... A gh'darèm dal moschi per magnèr!
E vìa tut i gat in dal curtìl ed Śorba a ciapèr el moschi da dèri da magnèr ala Fortunèda. Tut cal dafèr e chi śmanèś acsè tante stran dintórn a n'uślèina i nn'éren minga pasê inoservê a 'l pundgàsi dal fùgni, ch'i tgnivn informê al Grand Sòreg ed chel nóvi stranberìi ch'a gh'era gnû ai gat, cuacèr un ōv per vèint dè, crèser n'uślèina, ciapèr el moschi per dèrghi da magnèr, a n's era mài vist prìma di lavōr acsè!
Se i gat i s inpègnn acsè tant per n'uślèina per cìca ch'la sìa, a vōl dìr che chelē la dév èser un quèl ed dimòndi presiōś, a descòr acsè al Grand Sòreg. A biśgnarà tōrghla vìa, in na manéra o in cl'ètra, e l'uślèina la prà dvintèr 'n ostàǵ in del man dal pundgàsi per sotamèter la banda di gat e psér acsè tōr al cmand ed tùta la sitê.
I protagonìsta
Colegamèint estéren
- (EN) La schéda dal film in sìm'a 'l MYmovies.