La bolognese
|
C'l artìcul chè 'l è scrit in
Miranduléś |
 La bolognese
| ||
 Robertino in na figùra dal film | ||
| La bulgnéśa 1975 | ||
|---|---|---|
| Regìa: Alfredo Rizzo | ||
| Scritōr: Piero Regnoli • Alfredo Rizzo | ||
| Atōr: Luciano Pigozzi • Robertino • Paolo Pacino Franca Gonella • Luca Sportelli • Guido Leontini Ria De Simone • Olga Romanelli • Attilio Dottesio Cinzia Romanazzi • Renato Malavasi • Gino Turini | ||
| Müsica: Carlo Savina | ||
| Léngua: Itagliàṅ • Emigliàṅ • Tedésc • Vènet | ||
| Dürä dal film: 86 minüt | ||
| Nasiōṅ: Itàglia | ||
La bolognese (La bulgnéśa) 'l è 'n film eròtic dal 1975 'd Alfredo Rizzo ch'al 'l à scrit insém a Piero Regnoli. In dla part dal cuntadèṅ Tonino a gh'è 'l cantànt Robertino ch'al gh'à la manéra 'd cantàr dū pès in dal film: Tango del male e Vieni in campagna.
La pelìcula l'è stada sequestràda da la magistradùra fiurentìna in dal 1976 parchè batśàda tròp “purcùsa” a dita di giùdas.
Sunt
La Caterina Moreno (Franca Gonella) l'è na ragàsa emigliàna ch'la gh'à dagnóra darsèt an e ch'la và mata p'r i fóto-rumànś, insugnànd-as 'd èsar la prutagunìsta dal stòri ch'i gh piàśan tant, la Vanessa, divuradōra 'd óm. Esénd che sò surèla Susanna (Cinzia Romanazzi) la gh'à da spuśàr-as cun Marco (Paolo Pacino), sò nunòṅ Primo (Renato Malavasi) al la và a tōr da 'l culéǵ dal sōri tedéschi in du la stùddia.
Rivàda a cà, la ragàsa la salùta sò màdar, la Norma (Olga Romanelli), mèntar sò pàdar Secondo (Luciano Pigozzi) 'l è piutòst impgnâ a tastàr al cûl dla dóna di fat, la Rosetta (Ria De Simone). Finìda la serimògna, méntar tut i èṅ fóra a tavla a magnàr, la Caterina la gh'à l'ucaśiòṅ ad far un lavursèṅ 'd bóca a sò cugnâ.
Decìśa a far na caréra in dal mónd di fóto-rumànś, la ragàsa la gh'à na discusiòṅ c'n un cuntadèṅ cumunìsta amìg 'd sò nunòṅ, Tonino (Robertino), pò la s fà inganàr da 'n talent scout imbrujòṅ (Vincenzo Pulcrano) ch'al la tōś in paròla quànd la gh diś ch'la farév incòsa par cavàr-'g-la. 'L óm al gh prumét ch'la dvintarà na stéla in cal camp lè ma prima la gh'à da far sù almànc sinc migliòṅ ad franc par di servìsi futugràfic e par cumpràr-as di vistî.