In & Out
|
C'l artìcul chè 'l è scrit in
Miranduléś |
 In & Out
| ||
| In & Out | ||
 La Glenn Close in na figùra dal film | ||
| Ad dènt'r e 'd fóra 1997 | ||
|---|---|---|
| Regìa: Frank Oz | ||
| Scritōr: Paul Rudnick | ||
| Atōr: Kevin Kline • Joan Cusack • Tom Selleck Matt Dillon • Wilford Brimley • Gregory Jbara Debbie Reynolds • Zak Orth • Shalom Harlow Glenn Close • Bob Newhart • Whoopi Goldberg | ||
| Müsica: Marc Shaiman | ||
| Léngua: Ingléś | ||
| Dürä dal film: 90 minüt | ||
| Nasiōṅ: Stat Unî | ||
In & Out (Ad dènt'r e 'd fóra) l'è na cumèdia dal 1997 ad Frank Oz. Custàda trénta-sinc migliòṅ ad dòlar, la pelìcula la 'n à pò fat sù da piò ad ssanta-tri. La prutagunìsta Joan Cusack, par cla part chè, l'è stada candidàta a 'l Prèmi Òscar dal 1998 cuma atōra prutagunìsta ma la statṿa l'è pò andàda a la Kim Basinger par L.A. Confidential.
La trama dal film la tōś spunt da 'l dascōrs ch'l iva fat Tom Hanks dòp avér vins 'l Òscar par Philadelphia quànd 'l iva dedicâ 'l prèmi a 'n sò vèć prufesōr gay.
Sunt
L'è la nòt di Prèmi Òscar e par 'l insgnànt ad létri 'd un culéǵ d'l Indiàna Howard Brackett, amànt dla Barbra Streisand, l'è na giurnàda speciàla parchè òṅ di sò vèć studènt, Cameron Drake (Matt Dillon), 'l è candidâ a vìns'r al prèmi cuma „atōr prutagunìsta“ par la pelìcula Sarvìr e prutèśar in du lò 'l fà 'n suldâ gay. I sò rivài par la statṿa i èṅ Paul Newman par Rinco, Clint Eastwood par L'ultma farmàda, Michael Douglas p'r Istìnt primurdiài e Steven Seagal par Pala 'd néṿ a 'l Infèran.
Howard al guàrda la serimògna sintâ su 'l sofà insém a la sò muróśa da na vita, l’Emily Montgomery (Joan Cusack), ch'al gh'à da spuśàr in dal gir ad pôc parchè 'l nòsi i èṅ bèla fisàdi. Quànd finalmènt la Glenn Close (Glenn Close) la lèś al nóm dal vinsidōr, Drake, al prufesōr al s lasa andàr tut cuntènt. Cameron al mònta sù in sal palc par far al sò dascōrs e par ringrasiàr tut al cast tècnig e artìstic dal film ma specialmènt tut i gay e 'l lèśbichi ch'i sarvìs'n al paéś in d'l eśèrcit ma ch'i n pōlan minga far sès. Pò 'l atōr al gh tîṅ a 'rcuràr in na manéra particulàra 'l sò insgnànt Howard Brackett ch'al gh'à insgnâ incòsa dla vita, la pueśìa e William Shakespeare, sundànd-ag che «'L è 'n gay». A cala 'l śēl in dla cà di Brackett e fra i sò parènt ch'i gh armàgnan tut, specialmènt i sò genitōr Frank (Wilford Brimley) e la Berniece (Debbie Reynolds).
In di dè a vgnir tut i próv'n a intervistàr al prufesōr anc se lò al diś ch'a n è briśa véra. A sarà però 'n baś dal giurnalìsta fnòć Peter Malloy (Tom Selleck) a vèr'r-'g i òć.