Il piccolo campo
|
C'l artìcul chè 'l è scrit in
Miranduléś |
 God's Little Acre
| ||
| Il piccolo campo | ||
 Aldo Ray e la Tina Louise in na figùra dal film | ||
| Al camp pìcul 1958 | ||
|---|---|---|
| Regìa: Anthony Mann | ||
| Scritōr: Erskine Caldwell Philip Yordan • Ben Maddow | ||
| Atōr: Robert Ryan • Aldo Ray • Buddy Hackett Jack Lord • Fay Spain • Vic Morrow • Tina Louise Lance Fuller • Helen Westcott • Michael Landon Rex Ingram • Russell Collins • Davis Roberts | ||
| Müsica: Elmer Bernstein | ||
| Léngua: Ingléś | ||
| Dürä dal film: 118 minüt | ||
| Nasiōṅ: Stat Unî | ||
Il piccolo campo (Al camp pìcul) 'l è 'n film dramàtic in biànc e négar dal 1958 'd Anthony Mann trat da 'l rumànś „God's Little Acre“ dal 1933 'd Erskine Caldwell. 'L è stâ girâ in Califòrgna e 'l è stâ preśentâ a 'l 19śum Fèstival ad Venèsia.
Cuma senegiadōr dla pelìcula a figùra Philip Yordan mo invéci 'l éra stâ Ben Maddow a butàr-la śó ma, esénd ch'in cal méntar 'l éra finî in dla lista négra di suspetâ 'd cumunìśum, al n psiva minga lauràr a Hollywood dònca 'l éra custrét a scrìvar dal senegiadùri sōl ad nascòst. In alóra 'l pùblic sóta i daśdòt an al n psìva briśa andàr-'l a véd'r in di cìnema par via dal séni batśàdi cuma malnéti par via di còr'n in famìja anc s'in di tèmp 'd al dè 'd incō tut cal scàndal lè al n s véd minga più tant a dir dabòṅ.
Sunt
Ty Ty Walden (Robert Ryan) 'l è véduv e 'l stà in Geòrgia in di an dla “depresiòṅ granda”. Al gh'à dū fiōi masć ch'i vìvan sèg, Buck (Jack Lord) e Shaw (Vic Morrow), e 'n àtar ric ch'al viṿ a Augùsta, al vendidōr ad cutòṅ Jim Leslie (Lance Fuller), che però 'l è daśgustâ sèg. Ty Ty, che tut in famìja i ciàman “pà”, al pésca 'l òr in dal sò sit da quìnd'ś an pinsànd ch'un sò nunòṅ al 'l àppia lugâ sót-tèra. La mujér ad Buck la s ciàma Griselda (Tina Louise) ma 'l ròbi fra i dū i n vànan minga tant bèṅ parchè 'l óm al créd che lē la gh méta i còran cun Will Thompson (Aldo Ray), 'n èx uperàj dna fijànda saràda e śénd'r ad Ty Ty esénd spuśâ cun sò fiōla, la Rosamund (Helen Westcott). Buck al n s al cumpatìs briśa e 'l al ciàma sèmp'r „al cutunēr“ méntar lò al gh dà dal „cuntadèṅ“.
Pluto Swint (Buddy Hackett) 'l è 'n ciciòṅ amìg di Walden e 'd Will ch'al vrév dvintàr sierìf dla cuntèa dmandànd al vōt andànd in gir c'n al sò furgunsèṅ. Chi lò, ch'l à butâ 'l òć su la fiōla biónda, pìcula e malnéta 'd Ty Ty, la Darlin' Jill (Fay Spain), al gh sugerìs ad far-as jutàr in dal sò còmpit par Dave Dawson (Michael Landon) che, esénd 'n albîṅ, al sarév bòṅ ad naśàr in du 'l s cata 'l òr dabòṅ cun 'l ajùt 'd un spróc a fursèla.
I fradèi Walden e 'l négar sîṅ Felix (Rex Ingram), ch'al sarvìs in cà, i scàvan na buśa darènt la cà in dal punt indicâ da Dave cardénd che 'l òr al sia saplî lè ma i fàn'n incóra 'n buś in dl'àqua. Cla nòt lè la Darlin' Jill, ch'la n gh'à vargóggna 'd gnint, la taca subìt a far la sivéta c'n al ragàs c'n i cavìi biànc e la 'l cava śò par pò baśàr-al. Da 'l cant suo na Griselda in sotvésta la s véd ad nascòst in dal curtìl cun Will méntar tut i dòrman.
Quànd Ty Ty al finìs tut i bèsi, par pagàr i sò sarvìdōr, al và a dmandàr in prèst quèl da Jim Leslie ch'l à spuśâ na védva p'r al sò patrimòni ma ch'al vrév invéci la “cumpagnìa” 'd sò cugnàda Griselda e che lē la 'l vgnis a catàr quànd la pas' in sità. Buck, Shaw e Will i s férm'n in un bar par bévar dla bira e 'n imbariàg Will al baśa la Griselda davànti a tut ciamànd-la la sò muróśa par pò ciapàr-'s un casòt in dal grugn da part ad Ty Ty ch'al dmanda a Pluto ad scarusàr-'l a cà sua.
Pasàda la ciùca Will al và a la fàbrica in du 'l lauràva, fursànd al cansèl, par dar-ag curènt e tacàr i machinàri parchè al 'l à prumìs a tut gl'uperàj licensiâ sò culéga da 'l mumènt che quànd la fijànda la và a gh'è carna e patàchi in tut al cà. Dòp avér impisâ i machinàri, al custôd (Russell Collins) al gh spara dū cōlp masànd-al. Dòp al funeràł Buck al taca a dar adòs a la Griselda dgnéd ch'a parìva ch'a fus mòrt sò marè, pò al gh dà dla dunàsa a lē e a la Darlin' Jill ch'l'éra saltàda sù par diféndar sò cugnàda e anc la Rosamund che, sintàda da na banda, la gh'iva da scultàr tut 'l òdi 'd sò fradèl vèrs sò marè che lē la gh vliva bèṅ listés anc s'la saiva dla sò stòria cun la Griselda. Cuma s'a n fus minga abàsa Buck al s pìcia anc cun Jim Leslie ch'l iva śibî a la Griselda 'd andàr a vìvar sèg. Pà al próa a mét'r órd'n in famìja e 'l decìd ad dar-'g un taj c'n al pascàr 'l òr e 'd druàr invéci la sò tèra da cultivàr.