I tre volti della paura

C'l artìcul chè 'l è scrit in Miranduléś Emiliàn

I tre volti della paura

La Rika Dialyna in na figùra dal film
Al tri ghigni dla paùra
1963
Regìa: Mario Bava
Scritōr: F.G. Snyder • Aleksej Tolstoj • Anton Čechov
Alberto Bevilacqua • Mario Bava • Marcello Fondato
Atōr: Michèle MercierLidia AlfonsiBoris Karloff
Mark DamonSusy AndersenMassimo Righi
Rika DialynaGlauco OnoratoHarriet Medin
Müsica: Les Baxter • Roberto Nicolosi
Léngua: Itagliàṅ
Dürä dal film: 87 minüt
Nasiōṅ: ItàgliaFrància


«
Qvésta chè l'è la nòt di arbgàt... Al dè di minga mòrt.»
(Tagline dal film)


I tre volti della paura (Al tri ghigni dla paùra) 'l è 'n film ad scarésa a epiśòdi dal 1963 ad Mario Bava ch'al tōś spunt da tri racònt 'd Aleksej Tolstoj, 'd Anton Čechov e 'd F.G. Snyder (anc s'a 'l sò pòst, in di tìtui 'd tèsta, 'l è ripurtâ in na manéra minga curèta Guy de Maupassant).

In di Stat Unî 'l è cgnusû cuma Black Sabbath, tìtul ch'l à pò dâ 'l nóm a 'l grup metal umònim ad Tony Iommi e 'd Ozzy Osbourne.

In alóra 'l à fat sù sènt-tri migliòṅ ad franc in Itàglia, minga abàsta p'r andàr in para.

Sunt

Prim epiśòdi: Al telèfun

La Rosy (Michèle Mercier) l'è da par lē in dla sò cà quànd un furastēr al taca a ciamàr-la 'd cuntìnuv a 'l telèfun minasànd-la 'd mòrt. A s trata dla Mary (Lidia Alfonsi), na sò amìga ch'la gh'iva na relasiòṅ sèg, ch'la gh vōl far-'g un brut schèrs faghénd-ag crédar che da 'd là d'l aparéć a gh sia 'l sò èx muróś Frank (Milo Quesada) scapâ via da parśòṅ.

La Rosy, pîna 'd paùra, la ciàma in ajùt la Mary p'r armàgn'r insém durànt la nòt. Chi lē la riva e, méntar la sò amìga la dòrum, la scriv na létra 'd spiegasiòṅ par dar-'g un taj cun cla cumèdia lè. Purtròp però Frank 'l è dabòṅ scapâ da la galéra e, insfilsànd-'s in cà, al masa la Mary cardénd-la la Rosy, par pò andàr in dla cambra da lèt ad cl'atra par finìr al lavōr.

Secónd epiśòdi: I Wurdulak

Vladimir D'Urfe (Mark Damon), un nòbil rus, al cata par strada un cadàvar sénsa tèsta e c'n un pugnàł insfilsâ in dla schina. 'L óm al carga sù 'l còrp e, a cavàl, al partìs par rivàr a 'n vilàǵ lè darènt in du al s férma in dla cà ad tri fradèi, Pietro (Massimo Righi), la Sdenka (Susy Andersen) e Giorgio (Glauco Onorato), spuśâ cun la Maria (Rika Dialina) e padàr 'd un masćèṅ ciamâ Ivan. Giorgio al cònta a 'l òspit che sò pàdar Gorca (Boris Karloff) 'l éra partî sinc dè prima par masàr, insfildànd-g al cōr, un wurdalak turc ch'al turminàva la gint dal pòst.

A 'l impruvìś, subìt dòp meśanòt, a riva Gorca c'n in maṅ la tèsta dal vampîr utmàṅ. La famìja la fà fèsta ma 'l vèć al taca a cumpurtàr-as in na manéra stràna.

Tèrs epiśòdi: La gósa 'd àqua

L′Helen Chester (Jacqueline Pierreux) l'è n'infarméra ch'la vistìs i còrp di cadàvar. Un dè la vîṅ ciamàda in présia da la camaréra (Milly Monti) dna medium par vistìr al còrp dla sò pardóna mòrta c'n un bèc ad scarésa in ghigna durànt na sedùda spirìtica. Durànt la vistisiòṅ, l′Helen la buta 'l òć su 'n anèl ad śafîr a 'l dî e la decìd ad fargàr-'l ad nascòst. Séns vlēr la ciàpa incòst a 'n bicér faghénd-'l arbaltàr. Dal gósi 'd àqua i tàc'n a śguslàr śò su 'l paimènt méntar na mósca la gh vóla adòs.

In séguit i tàc'n a sucédar di fat strâṅ in dla sò cà: la sènt śguslàr ad cuntìnuv, móschi e tavàṅ dapartùt, la luś elèstrica ch'la vîṅ e ch'la và. La dóna la n in pōl piò in fiṅ tant ch'la véd al fantàśma dla medium in dla sò cambra da lèt. Dmandàr-ag pardòṅ a n è mia asè, l′Helen la n è più bòna 'd tiràr fiâ e la mōr. La matìna dòp la purtéra (Harriet White Medin) la la cata mòrta e la ciàma la pulisìa. Al patòlug (Gustavo De Nardo) al fà a mènt a 'n nis cic ch'la gh'à a 'l dî in du la purtàva 'l anèl ch'adès al n gh'è piò. Na sò vśina 'd cà (Harriet Medin) la gh 'l à purtâ via, cundanànd-'s a patìr la maledisiòṅ dal spìrit dl′Helen Chester.

Culegamènt estéran