Apri il menu principale

C'l artìcul chè 'l è scrit in Miranduléś Emiliàn

Gus Van Sant tòlt śò a la móstra dal cìnema ad Venèsia dal 1993


Gus Green Van Sant Jr. (Louisville, 24 ad Luj dal 1952) 'l è 'n regìsta, senegiadōr, muntadōr, pitōr, futógrafar, sunadōr e scritōr americàṅ.

Nâ cuma artìsta viśìṿ e regìsta ad film indipendènt, par via dla sò manéra sćèta ad dascórar di prubléma di śōvan al gh'l'à cavàda in séguit a sfundàr anc a Hollywood. 'L è stâ numinâ par dū vòlti par vìns'r al Prèmi Òscar cuma regìsta, la prima par Will Hunting - Genio ribelle in dal 1998 e la secónda par Milk in dal 2009. 'L à vins la Palma 'd òr a 'l Fèstival ad Cannes dal 2003 p'r Elephant[1] e al prèmi dla giurìa par Paranoid Park in dal 2007[2].

Biugrafìa

Fiōl 'd un cumés viaśadōr, al pasa la sò infànsia a giràr p'r i Stat Unî insém a i sò genitōr. Durànt i an dal culéǵ al taca a dar-as da far cun la pitùra par pò davśinàr-'s anc a 'l cìnema girànd acsè soquànt curtumétraǵ in Super 8.

Al s fórma definitivamènt a la scōla 'd art 'd avanguàrdia Rhode Island School of Design in dua 'l impàra a druàr al tècnichi dal cìnema sperimentàł che pò al n mularà piò. Dòp al diplóma, Van Sant al fà soquànt curtumétraǵ in 16 mm e pò in séguit al spatìna a Hollywood in dua al lavóra insém a Ken Shapiro in dū di sò film. Durànt al tèmp pasâ a Los Angeles al gh'à la manéra ad cgnós'r al mónd di aspirànt atōr e di drugâ e al gira al mèdimetràǵ Alice in Hollywood (1981).

An Utànta e inìsi di an Nuànta

In dal 1985 al gira 'l sò prim film Mala Noche e pò in dal 1989 Drugstore Cowboy cun Matt Dillon. In dal 1991 'l è 'l tùran ad Belli e dannati cunsiderâ al sò caplavōr cun prutagunìsta Keanu Reeves e River Phoenix. Quànd chi lò al mur'rà in dal 1993, Gus al gh dedicarà al sò film péna girâ Cowgirl - Il nuovo sesso trat da 'l rumànś cult “Even Cowgirls Get the Blues” ad Tom Robbins cun na śōvna Uma Thurman. Al film 'l è stâ però 'n fiàsc, anc in dla sò versiòṅ armuntàda 'd nóṿ dal 1994.

Perìud hollywoodiàṅ

Cun Da morire dal 1995 Van Sant al sèra p'r al mumènt la faś indipendènta e al partìs p'r Hollywood in dua in dal 1997 al gira òṅ di sò film più famóś, Will Hunting - Genio ribelle, andànd in a risć ad vìns'r al Prèmi Òscar par la regìa. La pelìcula la pòrta a cà listés dū statṿi, par 'l atōr minga prutagunìsta (a Robin Williams) e par la senegiadùra (a Matt Damon e a Ben Affleck). Tut àtar dascórs invéci p'r al sò arfacimènt figùra par figùra dal film Psyco 'd Alfred Hitchcock. Par Psycho dal 1999 al regìsta dal Kentucky al vins un Razzie Award. Van Sant al s tōś dal sudisfasiòṅ invéci c'n al film a vgnir: Scoprendo Forrester dal 2000 cun Sean Connery al fà sù utànta migliòṅ ad dòlar.

Filmugrafìa

Culegamènt estéran

Nòti

Àtar prugèt