Da morire
|
C'l artìcul chè 'l è scrit in
Miranduléś |
 To Die For
| ||
| Da morire | ||
 La Nicole Kidman in na figùra dal film | ||
| Da murìr 1995 | ||
|---|---|---|
| Regìa: Gus Van Sant | ||
| Scritōr: Joyce Maynard • Buck Henry | ||
| Atōr: Nicole Kidman • Matt Dillon • Casey Affleck Joaquin Phoenix • Alison Folland • Wayne Knight Dan Hedaya • Illeana Douglas • Kurtwood Smith Holland Taylor • Susan Traylor • Maria Tucci | ||
| Müsica: Danny Elfman | ||
| Léngua: Ingléś | ||
| Dürä dal film: 102 minüt | ||
| Nasiōṅ: Stat Unî | ||
Da morire (Da murìr) l'è na cumèdia négra americàna dal 1995 ad Gus Van Sant ch'l'è stàda preśentàda fóra cuncōrs a 'l 48śum Fèstival ad Cannes. In un cammeo a la fiṅ a s véd anc al regìsta David Cronenberg in dla part 'd un killer mafióś.
Al film 'l à praticamènt parśâ i cònt parchè 'l à muciâ sù vint-i-òṅ migliòṅ ad dòlar a 'l incìrca, òṅ da piò di cóst.
Sunt
La Suzanne Stone (Nicole Kidman) l'è na bèla biónda ch'la viṿ in na sitadìna ad pruìnsa dal New Hampshire. La gh'à sōl un quèl in dla tèsta, sfundàr in dal mónd dla televiśiòṅ. La fà védar subìt ad che pasta l'è fata miténd i còran a sò marè Larry Maretto (Matt Dillon), spuśâ p'r i bèsi dal sò risturànt, durànt al viàś ad nòsi andànd a lèt c'n un prudutōr televiśìṿ. La gh'à acsè la manéra ad lèś'r al previśiòṅ dal tèmp in un prugràma ch'a traśmét via câṿ ma lē la vōl andàr incóra più in élt.
Sò marè al vrév métar sù famìja e che lē la pasìs più tèmp in cà ma la Suzanne la n in vōl mia savēr, tut àtar, la taca anc a pinsàr ad far-al fóra par paràr via tut gl'intrapèi vèrs al sucès. La dóna la s mét in tèsta ad far un ducumentàri su tri studènt dna scōla superióra, Jimmy Emmett (Joaquin Phoenix), un ragàs disturbâ, al delinquènt Russell Heines (Casey Affleck) e la Lydia Mertz (Alison Folland), una ch'la fà fadìga a tōr-as cum l'è. Al prugràma al s ciamarà “Teens Speak Out” (I śōv'n i vōd'n al sac).
Un dè, méntar Larry 'l è fóra, lē la fà la daśnumóśa cun Jimmy. Dòp avér fat sès sèg, la Suzanne la gh admànda ad cupàr sò marè méntar lē l'è in televiśiòṅ a dascórar dal tèmp ad dmaṅ o sinò lē la 'l mòla in quàt'r e quàt'r òt.