C'l artìcul chè 'l è scrit in Miranduléś Emiliàn

Death at a Funeral
Funeral Party

Macfadyen, Marshall, Nyman e Graves
in na figùra dal film
La serimògna dal funeràł
2007
Regìa: Frank Oz
Scritōr: Frank Oz • Dean Craig
Atōr: Matthew MacfadyenJane AsherAlan Tudyk
Peter DinklageDaisy DonovanKris Marshall
Rupert GravesAndy NymanThomas Wheatley
Ewen BremnerPeter VaughanKeeley Hawes
Müsica: Murray Gold
Léngua: Ingléś
Dürä dal film: 90 minüt
Nasiōṅ: Régn Unî


«
Quànd na vita la finìs, i tàc'n i guàj.»
(Tagline dal film)


Funeral Party (La serimògna dal funeràł) l'è na cumèdia négra dal 2007 ad Frank Oz. L'è stada prudóta c'n un budget ad nóṿ migliòṅ ad dòlar da 'l Régn Unî, da i Stat Unî e da la Germâgna par la Sidney Kimmel Entertainment.

L'à fat sù da piò ad quarànta-siē migliòṅ ad dòlar in tut e la gh'à abû anc 'n arfacimènt americàṅ ad Neil LaBute in dal 2010, vgnû fóra in Itàglia c'n al tìtul 'd Il funerale è servito.

Sunt

Na famìja ingléśa dal Sussex la s cata in na vila 'd campàgna p'r al funeràł dal pàd'r ad Daniel (Matthew Macfadyen) e ad Robert (Rupert Graves). Al prim di dū 'l è 'n óm a la bòna ch'a gh piaśrév sfundàr cuma scritōr e ch'l è spuśâ cun la Jane (Keeley Hawes), al secónd invéci al fà 'l scritōr ad mistēr, 'l è put e 'l è andâ a vìv'r a New York in dua al s la spasa e al spénd tut i bèsi ch'al fà sù. La védva Sandra (Jane Asher) la pénsa a che tut a sia a pòst in cà p'r al ricevimènt ma minga a 'l spéśi dla serimògna ch'l è na questiòṅ fra i dū fradèi. Daniel 'l à mis da na banda i bèsi par cumpràr na cà nóva, Robert invéci al n gh'à più gnint parchè 'l à spéś tut cumprànd un bijét 'd aparéć ad prima clas. A pâr pròpria che Daniel al gh'àppia da mét'r-i fóra lò ma al n sà mia cuma far parchè sò mujér la và sèmp'r a drē p'r al cumprumés dla cà.

A 'l funeràł i rìv'n anc chi àtar parènt. La Martha (Daisy Donovan), anvōda dla védva, la s pòrta sèg al só muróś Simon (Alan Tudyk), ad mistēr avucàt, par far-al cgnós'r a sò pàdar. Quànd i vàn'n a tōr sò fradèl Troy (Kris Marshall), studènt ad farmacìa, la Martha la gh dà na madśìna ch'la tōś da 'n bucét ad Valium parchè la 'l véd dimóndi agitâ par 'l incòntar. Purtròp par lò qvàla là la n éra minga 'n tranquilànt ma na dròga sintética che Troy al gh'iva da purtàr a 'n sò amìg dòp al funeràł. A la serimògna a gh'è anc 'l imbranâ Howard (Andy Nyman), ch'al gh'à sèmpar paùra 'd avér-ag quèl anc parchè 'l à vdû na maciulìna più ciàra in sal pōls dla maṅ, insém a sò sio Alfie (Peter Vaughan), un vèć tarulî ch'l è sōl bòṅ ad tiràr dal Madóni e ch'l è custrét a vìvar in sna scrana a rudèli, e al sò amìg Justin (Ewen Bremner) ch'a gh và sōl p'r avér l'ucaśiòṅ ad far al galét cun la sò ex muróśa Martha. Inóltar a s véd anc un nân, Peter (Peter Dinklage), che ninsòṅ a sà chi 'l è.

Dòp ch'al prēt (Thomas Wheatley) al dà inìsi a la serimògna e che Daniel al taca a far al sò dascōrs, a Simon a gh pâr ch'la casa da mòrt la s muìs da pae lē e al taca a sigàr ciapànd-'g incòst. La casa la casca śò e al cadàvar al salta fóra. Al prevòstar, ch'al gh'à dimóndi présia ad finìr parchè al gh'à 'n àt'r impégn a tri óri, 'l è custrét acsè a suspénd'r incòsa.

Peter al s 'n imprufìta p'r andàr a dascórar da par lò cun Daniel par dir-ag ch'l éra 'l amànt segrét ad sò pàdar e al gh fà védar dal fòto par pruàr-'g-al, anc ad qvéli spurcaciòni. Al nanét al gh dmanda quìndas-mila starlìni par taśēr anc parchè al s 'n è abû a mâł abàsta dal fat ch'in dal testamènt al sò nóm a n gh fus minga. In cal méntar Simon, tòlt da la cretinìśia, al s sèra a ciàṿ in dal bagn e al taca a cavàr-as śò. Subìt dòp al mònta insìma a 'l téǵ tut nûd dgénd ch'al s vōl butàr śò.

In dal studi Daniel e Robert i lìgan stric Peter par far in manéra ch'al n pòsa minga andàr a cuntàr incòsa a i parènt parchè i dū i n vōlan minga dar-'g di bèsi. Tut 'd un trat a riva dèntar c'l insiminî 'd Howard che, cardénd che Peter al gh'àppia 'n atàc epilètic, al gh dà soquànti madśìni dal Valium ad Troy che lò 'l iva péna catâ sù da par tèra quànd 'l à vdû al bucét in giardèṅ. Adès a śbragàr i maròṅ 'l è al sio Alfie ch'al gh'à 'n atàc ad cagaròt e ch'al vōl vgnir dènt'r a 'l studi par druàr al cèso ch'a gh'è śò anc parchè al n pōl minga far al scali in dla sò cundisiòṅ. Méntar Howard 'l al pòrta a far i sò biśógn, Peter ch'al n capìs più gnint p'r i àcid ch'i gh'aṅ fat tōr, al strabùca e al s instùrla atàc a 'l spìgul 'd un taulèn armagnénd-ag séc.

Catànd-as in di guàj, a n saénd piò cuśa far, Daniel, Robert, Troy e Howard i decìd'n ad mét'r al sò còrp in dla casa da mòrt ad sò pàdar par far-al sparìr, amprufitànd-as dal fat che tut i èṅ fóra a tgnir 'd òć Simon ch'al gira sénsa gnint adòs in si cóp. Peter al vèṅ acsè insfilsâ là dèntar in dla puśisiòṅ dal ssanta-nóṿ méntar Howard al dascór c'n al prēt p'r a n far-al minga vgnir da cla banda.

Culegamènt estéran