C'l artìcul chè 'l è scrit in Miranduléś Emiliàn

Frances

La Jessica Lange in na figùra dal film
id.
1982
Regìa: Graeme Clifford
Scritōr: Christopher De Vore
Eric Bergren • Nicholas Kazan
Atōr: Jessica LangeKim StanleySam Shepard
Bart BurnsSarah CunninghamDonald Craig
Jeffrey DeMunnBonnie BartlettJordan Charney
Jonathan Banks‎Christopher PennockAllan Rich
Müsica: John Barry
Léngua: Ingléś
Dürä dal film: 140 minüt
Nasiōṅ: Stat Unî


«
Frances made one final movie, then moved to Indianapolis where she hosted a daytime television show. She died on August 1, 1970, at the age of 56. Harry was not with her. She died as she had lived... alone.»
(EN)(Cartèl finàl dal film prima di tìtui ad cóa)
«
La Frances l'à fat 'n ùltim film, pò la s è spustàda a Indianàpulis par tgnir un spetàcul televiśìṿ durànt al dè. L'è mòrta al 1 'd Agóst dal 1970 quànd la gh'iva 56 an. Harry al n éra briśa sèg. L'è mòrta cum l'à sèmpar visû... da par lē.»
(MUD)


Frances (id.) 'l è 'n film biugràfic americàn dal 1982 ad Graeme Clifford ch'al cònta la vita dl'atōra ad Seattle, la Frances Farmer.

La prutagunìsta dal film, la Jessica Lange, l'è stada numinàda p'r i Prèmi Òscar, acsè cuma la Kim Stanley, ch'la fà la part ad sò màdar.

In dal film a s diś che la Frances l'à patî na lubutumìa a 'l sarvèl ma a n gh'è mia la próa ch'a sia sucès dabòṅ anc s'in d'l uśdàl in dua l'éra stada mandàda l'atōra 'l éra un quèl ch'i fàvan in via sperimentàla. Invéci l'è véra ch'i gh aṅ fat dal puntùri 'd insulìna, di lètroschòck, dâ di fàrmag nóṿ tut da sperimentàr, fat magnàr i sò pét e fata viulentàr par bèsi a di militàr imbariàg, óltar ch'a di dutōr e a 'l persunàl dla clìnica.

La sò stòria la s è cgnusùda dabòṅ sōl pôc prima ch'la murìs ad càncar, cun la publicasiòṅ dal lìbar biugràfic „Will there really be a morning?” (Gh sarà-la dabòṅ na matìna?).

Al grup di Nirvana 'l à dedicâ a la dasfurtunàda atōra, dal stat ad Washington cuma lōr, la canta Frances Farmer Will Have Her Revenge On Seattle ch'la s cata in dal sò àlbum dal 1994 In Utero. La mujér ad Kurt Cobain, la Courtney Love, la s è misa pròpria òṅ di sò vistî al dè dal sò matrimòni.

Sunt

Fiōla 'd Ernest (Bart Burns) e dla Lillian (Kim Stanley), la Frances Farmer la vins a séd'ś an un prèmi ad sènt dòlar p'r un sò scrit, al saǵ Dio al mōr. La dvénta amìga 'd Harry York (Sam Shepard), un giurnalìsta amìg 'd un candidâ a sìndic ad sinìstra. In dal 1935, durànt i an dl'università a Seattle, la vins un cuncōrs 'd un giurnàl ad sinìstra, The Voice of Action, ch'al gh parmét ad vulàr in Rùsia par tōr dal lesiòṅ a 'l Teàtar 'd Art ad Mósca anc se sò màdar la s éra misa in mèś parchè la n vliva minga.

Turnàda in di Stat Unî, la s férma a New York, cun l'idéa ad far caréra a teàtar, ma pò la firma un cuntràt ad sèt an cun la Paramount Pictures cuma starlet. In cal méntar la taca anc a lauràr par 'l Actor's Studio insém a 'l scritōr ad drami, Clifford Odets (Jeffrey DeMunn). La dvénta anc la sò amànta anc se tut i dū i éran bèla spuśâ. Quànd chi lò al la mòla p'r i spetàcui a vgnir lundinéś, tulénd una ch'la gh śibìva dimóndi bèsi p'r avér la part da prutagunìsta, al decìd anc ad turnàr da sò mujér e la Frances la capìs 'd èsar stada dasfrutàda sōl par métar al sò nóm, famóś a Hollywood, in si cartlòṅ.

Al 19 'd Utóbar dal 1942 la Farmer la vèṅ farmàda da la pulisìa ad Santa Monica parchè la giràva in màchina ad nòt cun i fanài impìs, un quèl ch'a n s psiva briśa far in tèmp ad guèra. La vèṅ cundanàda da i giùdas a sinc-sènt dòlar ad multa e a sènt-utànta dè ad parśòṅ. La sò manéra 'd èsar, al sò impégn pulìtic, al fat ad pinsàr cun la sò tèsta e minga sōl ès'r un còrp da śibìr, 'd èsar stada batśàda cuma atea e ad simpatìi p'r al cumunìśum, la gh créa di prubléma a Hollywood, anc parchè lē la vrév sćiancàr al cuntàt par far sōl dal teàtar.

Turnàda in sal sèt dal film "No Escape", la tira un marùc a la dóna ch'la tgniva a drē a 'l patnadùri, śbragànd-ag la ganàsa, parchè chi lē la in dgiva ad tut i culōr in sal sò cònt. Sò màdar la dà al sò parmés parchè la véggna purtàda in clìnica p'r èsar curàda e lē la patìs dal puntùri 'd insulìna e di lètroschòck, fintànt che Harry al la fà scapàr via da 'd lè. Turnàda a cà dla Lillian, la litga sèg parchè sò màdar la vrév ch'la turnìs a giràr di film quànd lē la vrév star a lauràr in campàgna. Dòp avér-la piciàda, in dal 1945 la vèṅ purtàda in dal manicòmi dal Western State Hospital. La gh rèsta sinc an, paténd da tut, la vèṅ anc data a di militàr p'r èsar viulentàda. Sōl dòp na lubutumìa la vèṅ mandàda libra.

Culegamènt estéran