Flooding (film)
|
C'l artìcul chè 'l è scrit in
Miranduléś |
 Flooding
| ||
.png) La Brenna Gibson in na figùra dal film | ||
| Imersiòṅ 2000 | ||
|---|---|---|
| Regìa: Todd Portugal | ||
| Scritōr: Todd Portugal | ||
| Atōr: Brenna Gibson • Jack Turturici • Lauren Bailey Gregory Fawcett • Jeremy Flynn • Randy McLeod Dominic Dirito • Randy McLeod • Ron Slanina | ||
| Müsica: Jeff Pfeifer | ||
| Léngua: Ingléś | ||
| Dürä dal film: 86 minüt | ||
| Nasiōṅ: Stat Unî | ||
Flooding (Imersiòṅ) 'l è 'n thriller dramàtic americàṅ dal 2000 scrit, dirèt e prudót par Todd Portugal.
Al tìtul dal film al fà riferimènt a na terapìa druàda da i psicòlug par curàr al fubìi.
Sunt
La Joyce (Brenna Gibson) l'è na fotoreporter americàna 'd trént'un an. Par festegiàr al fat ch'i l'aṅ tòlta a lauràr in 'n impurtànt giurnàł nasiunàł, la dóna la decìd 'd andàr a 'l luna park insém a sò marè, 'l avucàt David Calloway (Kary Cawley). Méntar la gh fà na fóto impgnâ a magnàr dal sucàr filànt, un sicàri al spara a 'l sò spóś masànd-al.
La dóna la gh'à 'n tràuma psiculògic ch'al la fà andàr fóra 'd tèsta tant ch'la finìs in cura da di psicòlug che però i n èṅ briśa bòṅ 'd guarìr-la. C'n al pasàr dal tèmp la dóna la mùcia sù n'agurafubìa ch'la la custrìś a 'rmàgnar saràda in cà tant ch'al sò còmpri la li fà sōl via internet. Par furtùna ch'la s è fata amìga cun na sò vśina 'd cà ch'l'è vgnuda a star darènt a lē dòp al fat ad sànguv 'd siē méś prima, l’Evelyn Willett (Lauren Bailey). Chi lē la próa in tut al manéri ad squasàr-la faghénd-ag cgnósar di óm lśénd-ag di anùnsi su i giurnài. La Joyce la rispónd a 'n mesàǵ 'd un sèrt Louis Archer ch'al s preśénta pò da lē par snar insém. 'L apuntamènt al finìs cun na gusàda, pò 'l óm al vîṅ parâ via e la dóna la và a durmìr. 'N óra dòp, sinténd di stus, la Joyce la và a védar fóra e a 'l impruvìś a gh salta adòs 'n óm frî ch'al mōr fra i sò bras. La dóna la ciàma la pulisìa e i rìvan da lē gl'agìnt Broadacre (Dominic Dirito), cun na bénda a 'n òć, e Marish (Randy McLeod), al detective ch'l iva tgnû adrē a 'l caś dal masamènt 'd sò marè sénsa però saltàr-'g-an fóra. I dū i gh dìśan che la vitma 'l è Louis Archer in parsòna (Ron Slanina) ma la dóna la n 'l arcgnós minga in d'l óm ch'al l'iva gusàda la sira prima e ch'l iva dit 'd ciamàr-'s acsè.
La Joyce, ch'la gh'à biśógn 'd ajùt, la ciàma 'l psicòlug ch'i gh'ìvan tòlt i suo, al dutōr Hank Thornton (Jack Turturici). Chi lò al próa a far-ag pasàr al sò paùri faghénd-ag arcurdàr di fat dal sò pasâ. A la dóna a gh vîṅ in mènt 'n epiśòdi ad quànd l'éra na putìna (Kelcie Tolan) e l'éra in sna giòstra in du l'iva butâ 'l òć in un spèć ma la n s arcòrda mia cuśa l'is vdû.