Europe

C'l artìcul chè 'l è scrit in Miranduléś

«

Days filled with joy and days filled with sorrow, I don't know just what to do, am i happy today? am i lonely tomorrow? Everything depends on you and i've been waitin' for the angels to knock on my door, I've been hopin' that everything could be like before, open your heart and tell me what's wrong, why can't you talk like you used to do before?»

(EN)(Open Your Heart, 1984)

«

Dè pîṅ ad cuntintésa e dè pîṅ ad dulōr, a n sò pròpria cuśa far, sòṅ-j-a cuntènt incō? sòṅ-j-a da par mè dmaṅ? A dipénd tut da tè e a-j-ò spitâ ch'i àngil i busìsan a la mè pòrta, a-j-ò sprâ ch'a psis incòsa èsar cuma prima, vèra 'l tò cōr e dì-'m cuś è'l ch'a n và minga, parcòsa a n dascór-at piò cuma 't fav prima?»

(MUD)

Gl′Europe i èṅ un grup muśicàl hard & heavy śvedéś nâ in dal 1978 e cgnusû specialmènt p'r i sò disc di an Utànta e par la canta The Final Contdown dal 1986.

In dla sò caréra i aṅ vindû vint migliòṅ 'd àlbum a 'l incìrca, quarànta śuntànd-ag anc i sìngui.

Biugrafìa

Al grup al mōv i prim pas in dal 1978 quànd al cantànt e chitarìsta John Norum, al basìsta Peter Olsson, al baterìsta Tony Niemistö, al chitarìsta Micke Kling e al basìsta Jan-Erik Bäckström (ch'i daśgnìvan da Upplands Väsby, in di dintóran ad Stucólma), i métan sù na furmasiòṅ ciamàda WC. Dòp ésar-'s mulâ p'r un pôc ad tèmp, Olsson al ciàma Norum par dmandàr-ag ad turnàr insém e acsè a sucèd, cun un cantànt nóṿ ad paca, Joakim Larsson, che pò al sarnirà par lò al nóm ad Joey Tempest.

Al grup al càmbia nóm in Force e pò in Europe. Cun cal nóm chè i vìnsan un cuncōrs par di grup śvedéś. In dal Dicémbar dal 1982 gl’Europe i rigìstran al sò prim àlbum (ciamâ pròpria Europe) ch'al véd la luś in dal Favràr dal 1983 (utàv pòst in dla clasìfica dal sò paéś), cun Seven Doors Hotel e In the Future to Come cuma pès più famóś. 'L an dòp l'è la vòlta ad Wings of Tomorrow, cun al lènt Open Your Heart.

In dal Maǵ dal 1986 al grup al fà vgnir fóra par la Epic Recors quél ch'al dvintarà al sò lavōr più cgnusû e vindû: The Final Countdown, cun dèntar la canta umònima (dódas migliòṅ ad pès vindû) e di àtar sìngui ad sucès cuma Rock the Night, Carrie, On the Loose e Cherokee.

Anc al quàrt àlbum dal grup (Out of This World dal 1988) al vénd bèṅ (3 migliòṅ ad pès), rivànd a ciapàr anc 4 disc 'd òr e 2 ad plàtin. A la chitàra Kee Marcello 'l iva in cal méntar tòlt al pòst ad John Norum. Óltar a 'l arfacimènt 'd Open your heart, al disc al gh'à dèntar anc di àtar braṅ cgnusû cuma i sìngui Superstitious e Let the good times rock e la rabìda Ready or not. Invéci cun Prisoners in Paradise dal 1991 al ròbi i tàcan a 'ndàr mâl parchè a sém in di tèmp dal grunge e in di Stat Unî al disc 'l è 'n fiàsc. Dòp èsar stâ mulâ par la Epic e avér far vgnir fóra na racòlta in dal 1993, al grup al s mòla. Joey Tempest al taca a sunàr da par lò faghénd catàr in di negòsi tri disc sulìsta (A Place to Call Home dal 1995 'l è 'l prim). In dal 2003 però al grup al tórna insém par far di disc e di cuncèrt, cuma quéi tgnû a Nunàntla in dal 2010 e in dal 2012.

Discugrafìa

Àlbum

1983 - Europe
1984 - Wings of Tomorrow
1986 - The Final Countdown
1988 - Out of This World
1991 - Prisoners in Paradise
2004 - Start from the Dark
2006 - Secret Society
2009 - Last Look at Eden
2012 - Bag of Bones

Europe

Biugrafìa

Discugrafìa

Àlbum

Racòlti

Da 'l viṿ

Culegamènt estéran