Grunge

C'l artìcul chè 'l è scrit in Miranduléś

«

With the lights out, it's less dangerous, here we are now, entertain us, I feel stupid and contagious, here we are now, entertain us, a mulatto, an albino, a mosquito, my libido. Hey! Hey! I'm worse at what I do best and for this gift I feel blessed.»

(EN)(Smells Like Teen Spirit, Nirvana)

«

C'n al luś śmursàdi, 'l è manc periculóś, a sém chè adès, fà's divertìr, a m sènt stùpid e cuntagióś, a sém chè adès, fà's divertìr, un mulàt, 'n albèṅ, na sinsàla, la mè libìdin. Vê! Vê! A sòṅ al più lòfi a far qvél ch'a fag méj e par cal rigàl chè a m sènt banadét.»

(MUD)

Al Grunge (a s lèś [ɡrʌndʒ] in ingléś, cgnusû da spés anc cuma „Seattle sound“) 'l è 'n gènar muśicàl ch'al s è śvilupâ a la fiṅ di an Utànta in dal stat ad Washington e in dla sità 'd Seattle in particulàr. A s trata 'd un gèn'r ad rock alternatìṿ ch'al mìsćia insém 'l hard rock, al punk rock e 'l heavy metal.

La paròla la daśvîṅ da grungy (inśaclâ), ślang dal paròli “dirty” o “filthy” ch'i vōlan dir crica.

Descrisiòṅ

Da 'l punt ad vista stilìstic i grup grunge i dàv'n impurtànsa a i sòṅ sćèt e dirèt dal bas, dla baterìa e dla chitàra, dal vòlti druàda par tiràr fóra dal distursiòṅ e di sòṅ ciucadōr, parànd via tastéri e sintetiśadōr.

A 'l cuntràri d'l hair metal di an Utànta, ch'al mitìva in prim piàṅ al divertimènt e 'l sès in dal sò canti insém a 'l èsar “fîg” in dla vita, al grunge, influensâ da la cultùra hippie, al dascurìv' invéci dal dulōr, di ùltim, di pòvar, dla gint ch'la n gh la cava briśa, dla dròga (minga druàda par gudiōl ma par daśmindgàr i magòṅ), dl'ingiustìsia, dal pacifìśum, dla stufìśia e dla fadìga 'd vìvar e dl'arlìa vèrs al mónd par cum 'l è fat.

Mis da na banda i lustrèṅ e i giachét ad pèla c'n i ciòld, i sunadōr ad cal gènar chè i n dàvan minga impurtànsa a i vistî da métar-'s adòs, i andàvan bèṅ anc di majòṅ, di jeans sćiancâ e i vistî ad tut i dè.

In dal canti a s psiva sintìr da spés dal stròfi in du la vóś la parìva patìda mént'r in di riturnèi la tindìva piutòst a 'l sîg. In gèn'r al tèmp 'l éra 7/8.

Al sucès a livèl mundiàł 'l è tacâ a 'l inìsi di an Nuànta, c'n i Nirvana ch'i cantàvan Smells Like Teen Spirit e i Pearl Jam Alive, ma 'l è finî piutòst in présia anc par via dla mòrt ad Kurt Cobain, ch'al s è tirâ na sćiuptàda in bóca in dal 1994 par far-la finìda, dal cantànt di Alice in Chains Layne Staley, mòrt par n'overdose ad speedball, e dla separasiòṅ di Soundgarden, dvintâ famóś in dal 1994 c'n al pès Black Hole Sun.

Grup ad riferiment

Culegamènt estéran

(IT) La paśna dal gènar Grunge in dla Treccani