Embryo
|
C'l artìcul chè 'l è scrit in
Miranduléś |
 Embryo
| ||
 Rock Hudson in na figùra dal film | ||
| Embriòṅ 1976 | ||
|---|---|---|
| Regìa: Ralph Nelson | ||
| Scritōr: Anita Doohan • Jack W. Thomas | ||
| Atōr: Rock Hudson • Barbara Carrera • Diane Ladd Roddy McDowall • Anne Schedeen • John Elerick Vincent Baggetta • Jack Colvin • Joyce Brothers | ||
| Müsica: Gil Melle | ||
| Léngua: Ingléś | ||
| Dürä dal film: 104 minüt | ||
| Nasiōṅ: Stat Unî | ||
Embryo (Embriòṅ) 'l è 'n film dramàtic americàṅ dal 1976 ad Ralph Nelson, dvintâ 'd dumìni pùblic in di Stat Unî.
Sunt
Al dutōr Paul Holliston (Rock Hudson) 'l è 'n genetìsta ch'al viṿ da par lò da quànd sò mujēr l'è mòrta in 'n incidènt méntar lò al guidàva. Da cal dè lè 'l óm al gh'à 'n magòṅ dimóndi grôs in di cunfrònt ad sò cugnàda ch'la gh fà 'd asistènta, la Martha Douglas (Diane Ladd).
Na sira 'd piōva 'l dutōr, mént'r al tórna a cà in màchina, al mét sóta na caggna gravda dla rasa dobermann. Tintàd ad salvàr-la, Paul al la pòrta in dal sò laburatòri e 'l mét i sò embriòṅ dènt'r a 'n ùtar artifisiàł. Esénd dimóndi pìcui, al siensiâ al próa a śvilupàr-i più in présia dand-ag di urmòṅ sperimentài trat da 'l latògen plasentàr umàṅ parchè al sà che par la màd'r a n gh'è gnint da far. A la fiṅ a scampa sōl 'n embriòṅ ch'al dvénta grand e inteligènt in quàt'r e quàt'r òt anc se cun di scat 'd arlìa ch'i al pórtan sénsa mutìṿ a masàr un cagnulèṅ ch'al pasàva par strada.
Decìś ad druàr i sò studi a 'l servìsi dla madśìna, 'l óm al s fà dar 'n embriòṅ umàṅ dna dóna ch'la s éra tòlta la vita e al gh la cava a far nàsar na putìna ch'la dvènta na śuvnòta in un lamp e che lò al ciàma Victoria (Barbara Carrera). La ragàsa l'impàra a star a 'l mónd e a far-as na cultùra lśénd di lìbar e a pâr ch'al tèmp par lē al vaga avànti nurmalmènt esénd ch'al dutōr, quànd l'è nada, al gh'à dâ dal metotrexâ, na sustànsa bòna a cumbàt'r al decadimènt dal sò céluli.