Elina Svitolina

tenìsta ucraìna

C'l artìcul chè 'l è scrit in Miranduléś Emiliàn


La Svitolina tòlta śó in dal 2019


L’Elina Mychajlivna Svitolina (Udésa, 12 ad Setémbar dal 1994, Еліна Михайлівна Світоліна in Ucraìn) l'è na tenìsta ucraìna ch'l'è stada la nùmar déś dal mónd (al 27 ad Favràr dal 2017).

L'è élta 174 cm par 62 chilo e l'è prufesiunìsta da 'l 2010. La dróa 'l bras dèstar e la tira 'l arvèrs a dū maṅ. In dla sò caréra l'à vins siē tìtui WTA in singulàr (anc un Premier 5, qvél ad Dubài dal 2017) e sèt in dal sircùit ITF.

A gh piàś lèśar, guardàr al partìdi 'd balòṅ e 'l magnàr cinéś. La scólta vluntéra Michael Jackson e Eminem. La s è stablìda a Kharkiv in Ucraìna.

Caréra

Dòp avér vins al turnèo di śōvan dal Roland Garros dal 2009, la Svitolina la taca a calcàr i camp ITF in dal 2010. In dal 2011 la próa a qualificàr-as p'r al turnèo a 'l quèrt ad Parì ma la pèrd subìt da la Jelena Dokić.

In dal 2012 la difénd i culōr dla sò nasiòṅ cónt'r i Stat Unî in Fed Cup ma la pèrd i sò singulàr cóntar la Serena Williams e la Christina McHale. La vèṅ fata fóra durànt al qualificasiòṅ dal Roland Garros e ad Wimbledon sèmpar da la spagnōla Garbiñe Muguruza Blanco. Finalmènt la pasa c'l ustàcul lè rivànd a śugàr in dal tablòṅ di US Open ma l'è dasfurtunàda parchè la cata subìt l'Ana Ivanović ch'la la manda a cà cun un 6-3 6-2. A Mósca la bat a 'l prim tùran in tri sét l'itagliàna Maria Elena Camerin ma pò la pèrd da la Valeria Solovieva. In Nuvémbar la śōga al turnèo ad Pune (in Ìndia) e la 'l vins in finàl cóntar la giapunéśa Kimiko Date-Krumm par 6-2 6-3 dòp avér fat fóra l'Andrea Petković.

'N arvèrs dl'ucraìna
La Svitolina la sa ślunga par tiràr sù na bucìna 'd drit
L'Elina tòlta śò in dal 2015
Prim piàṅ dla Svitolina

C'n i punt muciâ sù 'l an prima, in dal 2013 la Svitolina la n è piò custréta a pasàr sèmpar p'r al qualificasiòṅ. A gl'Australian Open la pèrd a 'l prim tùran da l'Angelique Kerber. In Favràr la s pòrta a cà 'l ITF ad Eilat in Iśraēl. A Cali la riva in semifinàl (6-2 4-6 4-6 da la śugadōra ad cà, la Catalina Castaño) ma pò la cata sù sōl di prim tùran a Bugutà (la pèrd da la francéśa Alizé Cornet), a Indian Wells (chè l'è la Monica Niculescu a far-la fóra), a Katowice (la céd a la cruàta Petra Martić) e a Straśbûrg (l'è la Flavia Pennetta a 'ndàr avànti). In d'l ITF ad Praga da sènt-mila dòlar la disfa subìt n'aśèrba Pera Bernarda par pò lasàr strada a l'Irina Falconi. A 'l Roland Garros la fà fóra la Romina Oprandi 6-3 4-6 6-1 prima ad far al valìś cun la Varvara Lepchenko. In di turnèo ingléś in s'l èrba la pèrd sèmp'r a 'l prim tùran, anc a Wimbledon 3-6 5-7 cun la francéśa Marion Bartoli pò vinsidōra dal tìtul. In Luj la śōga al turnèo ad Bad Gastein in sla tèra rósa in dua la riva in semifinàl cun l'Andrea Hlaváčková ch'la gh'à la méj sèg par 7-5 6-7 6-4. A la fiṅ dal méś la vins al tìtul WTA ad Baku dand un 6-4 6-4 in finàl a la Shahar Peer, dòp avér mandâ a cà anc l'Aleksandra Krunić, la Nastassja Burnett, la Donna Vekić e l'Alexandra Cadanțu. La stmana dòp la s mét in bisàca 'l ITF da stanta-sincmìla dòlar 'd Donec'k baténd in finàł la Tímea Babos par 3-6 6-2 7-6. In sal cimènt americàṅ la pèrd subìt a New Haven da la Karin Knapp ma a gl'US Open la s cava la sudisfasiòṅ ad mandàr a cà la Dominika Cibulková. In sèra 'l an da nùmar quarànta dal mónd.

L'ucraìna la vèra 'l 2014 rivànd a 'l tèrs tùr'n a Melbourne pardénd da la Sloane Stephens ma baténd n'atra Top 20 cuma la Svetlana Kuznecova. A Parì a 'l quèrt la ciàpa la paga in di quàrt da la Sara Errani ch'la la bat par 6-2 6-3. In Privavéra la riva in di utàṿ a Miami e a Charleston ma su la tèra rósa la mét in fila tri prim tùr'n a Marrakech, a Madrìd e a Róma e faghénd bèṅ sōl a Nurimbèrga in du la pèrd in semifinàl par 2-6 6-1 6-2 da la Karolína Plíšková. In Luj la vins incóra a Baku, pò la fà i quàrt a Cincinnati baténd la nùmar tri dal mónd, la Petra Kvitová, e la nùmar sédas, la Carla Suárez Navarro. In Setémbar la riva in semifinàl in d'l impurtànt turnèo cinéś ad Wuhan baténd la Camila Giorgi par 6-2 6-3, la Sabine Lisicki par 7-6 6-3, la Garbiñe Muguruza par bandòṅ e l'Angelique Kerber par 6-4 7-6 prima 'd andàr a cà cun la Petra Kvitová. La Svitolina la sèra la stagiòṅ faghénd n'atra semifinàl a Uśàka.

Al prim turnèo dal 2015 par l’Elina 'l è qvél ad Brisbane e l'ucraìna la riva in semifinàl baténd l'Angelique Kerber in tri set par pò ciapàr un brut 1-6 3-6 da la Marija Šarapova. A gl'Australian Open la gh la cava a purtàr via 'l prim set a la Serena Williams pardénd però sèg a 'l tèrs tùran. In Mars la fà gl'utàṿ a Indian Wells baténd la Lucie Šafářová pò la riva in semifinàl a Bugutà e la vins al turnèo 'd Marrakech (7-5 7-6 a la Tímea Babos). La Svitolina la gh la cava a far al sò ingrès in dla Top 20 rivànd a i quàrt a 'l Roland Garros, in du la pèrd da l'Ana Ivanović par 3-6 2-6, pò la sèntra la semifinàl a Stanford e a Cincinnati, turnèo in du la mét in riga l'Alison Riske, l'Eugenie Bouchard, la Caroline Garcia e la Lucie Šafářová prima 'd pèrdar da la Serena Williams par 4-6 3-6. La sèra 'l an a la 19śma puśisiòṅ.

In dal 2016 la Svitolina la vins sōl na partìda fra Sydney e Australian Open ma a Dubài la riva in semifinàl in du la ciàpa 'n 4-6 4-6 da la Sara Errani. In Mars la vins 'l International ad Kuala Lumpur baténd in finàl l'Eugenie Bouchard par 6-7 6-4 7-5. A Indian Wells la s bèca na scòpla da la Roberta Vinci a 'l secónd tùran (1-6 3-6) mént'r a Miami la gh la cava invéci a rivàr a gl'utàṿ baténd la Caroline Wozniacki e pardénd da l'Ekaterina Makarova. A 'l Roland Garros la lasa 'l briśi a la Sorana Cîrstea, a la Taylor Townsend e a l'Ana Ivanović (quìndas śōg in tut) ma in di utàṿ la vîṅ asfaltàda a sò vòlta par la Serena Williams ch'la gh'à la méj sèg par 6-1 6-1. In Agóst però l'ucraìna la s tōś l'arvìnsida cun l'americàna a gl'Ulimpìadi quànd la la bat par 6-4 6-3 prima 'd céd'r a la céca Petra Kvitová par 2-6 0-6. In Agóst la Svitolina la riva in finàl a New Haven (1-6 6-7 da l'Agnieszka Radwańska) mént'r a gl'US Open l'incróśa incóra la Petra Kvitová a 'l tèrs tùran pardénd-ag par 3-6 4-6. La Svitolina la mùcia sù atri tri semifinàli a Tokyo, a Pechîṅ e a Mósca baténd la nùmar tri dal mónd Garbiñe Muguruza in Giapòṅ e la nùmar òṅ, l'Angelique Kerber, in Cina. Zhuhai 'l è 'l sò ùltim turnèo d'l an e l'ucraìna la riva in finàl dand un 2-6 6-1 6-4 a la Johanna Konta e bcand-'s un 4-6 2-6 da la Petra Kvitová. C'n i 440 punt muciâ sù, la Svitolina la finìs la stagiòṅ da nùmar quatórdas dal mónd.

La tenìsta 'd Udésa la vèra dimóndi bèṅ al 2017 faghénd la semifinàl a Brisbane, baténd incóra l'Angelique Kerber par 6-4 3-6 6-3 e pardénd da la Karolína Plíšková par 2-6 4-6, faghénd un tèrs tùr'n a Melbourne e vinsénd i turnèo 'd Taipèi (6-3 6-2 a la Shuai Peng) e 'd Dubài. In di Emirâ Àrab Unî la bat la cinéśa Saisai Zheng, gl'americàni Christina McHale e Lauren Davis, incóra na vòlta l'Angelique Kerber e la Caroline Wozniacki in finàl par 6-4 6-2. Cun cal sucès chè la Svitolina la gh la cava a dvintàr la nùmar déś dal mónd.

Culegamènt estéran