Saisai Zheng
|
C'l artìcul chè 'l è scrit in
Miranduléś |
La Saisai Zheng, (Shaanxi, 5 ad Favràr dal 1994, 鄭賽賽 in Cinéś) l'è na tenìsta cinéśa ch'l'è stada la nùmar ssant'òṅ dal mónd 'l 11 ad Maǵ dal 2015. L'è élta 170 cm, la péśa 62 chilo, la dróa al bras dèstar e la tira 'l arvèrs a dū maṅ.
La śōga cun gl'uciài adòs parchè la gh véd pôc. In dla sò caréra l'à vins un tìtul WTA 125 e tri ad qvéi ITF.
Caréra
In dal 2011 la riva in finàl in d'l ITF da vintsìnc-mila dòlar ad Burnie in Austràglia ma la la pèrd par 4-6 3-6 cun l'Eugenie Bouchard. In Utóbar la tōś part a 'l turnèo ad Pechîṅ par via dna carta salvàdga ma la và fóra subìt cun la Kaia Kanepi par 0-6 3-6.
_-_Qualifying_Rounds_-_Saisai_Zheng_(15191939202).jpg)
In dal 2012 la bat la Kurumi Nara e la Kirsten Flipkens a Phuket, pò la vins 'n ITF da sinquànta-mila dòlar a Kurume in Giapòṅ. In Luj la pasa 'l qualificasiòṅ a Stanford (6-3 6-3 a l'Erika Sema), pò la bat l'Ayumi Morita par 4-2 bandòṅ prima 'd ès'r eliminàda in di utàṿ da la Sorana Cîrstea par 3-6 3-6. In Utóbar la vins 'l ITF da vintsìnc-mila dòlar ad Taipei baténd la Caroline Garcia par 6-2 6-1 e la Zarina Diyas in finàl par 6-4 6-1.
In dal 2013 la pasa a śugàr da spés in dal sircùit WTA ma la fà sù pôc a part na finàl pardùda in dal turnèo ad Suzhou cun la Shahar Pe'er.
In dal 2014 la fà sudàr la Sara Errani a 'l prim tùr'n ad Shenzhen (6-0 3-6 7-6 par la rumagnōla). In Mars la pasa 'l qualificasiòṅ a Charleston ma la pèrd subìt cun la Jaroslava Švedova par 2-6 6-3 5-7. In Maǵ la vins 'n ITF da sinquànta-mila dòlar a Anning (6-2 6-3 a la Jovana Jakšić). In Agóst la riva a 'l secónd tùran di US Open in dua la pèrd in tri sét da la Lucie Šafářová, pò la fà i quàrt a Hong Kong (4-6 3-6 da la Sabine Lisicki) e la semifinàl a Tientsin in dua l'è bòna 'd bàtar lung la via la Tímea Babos, la Jelena Janković e la Sorana Cîrstea prima 'd cédar a l'Alison Riske par 0-6 1-6.
In dal 2015 la riva in semifinàl a Shenzhen ma la pèrd da la nùmar tri dal mónd, la Simona Halep. In Avrìl e in Maǵ la vins dū ITF ad fila da setsènt-sinquantamìla dòlar aśiàtic. In Setémbar la bat l'Alison Riske e l'Irina Falconi in d'l International ad Tokyo ma pò la céd a Christina McHale in di quàrt. Anc a Guangzhou la riva in di quàrt ma la Sara Errani la la spasa via par 6-1 6-0.