Debora Caprioglio
|
C'l artìcul chè 'l è scrit in
Miranduléś |
.png)
La Deborah Caprioglio, cgnusùda méj cuma Debora Caprioglio (Mèstar, 3 ad Maǵ dal 1968), l'è n'atōra e persunàǵ televiśìṿ vènet.
Biugrafìa
La Debora Caprioglio a daśdót an la và in finàł in dal cuncōrs "Un volto per il cinema" e la vîṅ duciàda par Klaus Kinski, famóś atōr e regìsta, dvintànd la sò muróśa in dal 1987. La fà sèg i sò prim film: Grandi cacciatori (1988) 'd Augusto Caminito e Kinski Paganini (1989) ch'l à muciâ sù dimóndi crìtichi a 'l Fèstival ad Cannes.
Dòp ès'r-as mulàda sèg la decìd lauràr cun Tinto Brass e la dvénta dimóndi famóśa par via dal sò film spurcaciòṅ Paprika dal 1991 in du lē la fà la part dna putàna ch'la lavóra in un caśèṅ.
Dòp al śal/eròtic Spiando Marina ad Sergio Martino e 'l còmig Saint Tropez - Saint Tropez (tut dū girâ in dal 1992), la Debora la càmbia regìstar dal tut e in dal 1994, dòp avér fat un rōl in dal drama Con gli occhi chiusi dla Francesca Archibugi, la decìd ad métar da na banda la figùra ch'la gint la gh'iva 'd lē ad dóna tetóna e purcùsa. In tut al manéri dòp Albergo Roma (1996) la gh dà 'n taj c'n al cìnema e la taca a lauràr a teàtar e a la televiśiòṅ, faghénd soquànt film TV.
In dgl'ultmi stagiòṅ televiśìvi l'à fat la sò preśénsa a Buona Domenica ad Maurizio Costanzo in sal Canale 5 méntar par Rai 2 l'à laurâ a Mezzogiorno in famiglia e a la quìnta edisiòṅ dal reality show l'Isola dei famosi.
Al 7 ad Setémbar dal 2008, a quàrant'an, la s è spuśàda cun 'l atōr e regìsta Angelo Maresca.
In dal 2010 la decìd 'd impgnàr-'s in pulìtica p'r al muimènt Alleanza di centro, al partî 'd 'n amig ad sò marè Francesco Pionati, ch'al dà 'n apòǵ a 'l presidènt dal cunsìli Silvio Berlusconi. Pionati al l'à numinàda respunsàbila nasiunàla dla Cultura e dal Spetàcul dal sò partî.
Filmugrafìa
- 1988 - Nosferatu a Venezia, regìa 'd Augusto Caminito
- 1988 - Grandi cacciatori, regìa 'd Augusto Caminito
- 1989 - La maschera del demonio, regìa ad Lamberto Bava
- 1989 - Kinski Paganini, regìa ad Klaus Kinski
- 1991 - Paprika, regìa ad Tinto Brass
- 1992 - Saint Tropez - Saint Tropez, regìa ad Castellano e Pipolo
- 1992 - Spiando Marina, regìa ad Sergio Martino
- 1994 - Con gli occhi chiusi, regìa dla Francesca Archibugi
- 1995 - Storie d'amore con i crampi, regìa ad Pino Quartullo
- 1996 - Albergo Roma, regìa 'd Ugo Chiti
- 2006 - I giorni perduti, regìa ad Bruno Gaburro
- 2007 - Ripopolare la reggia (Peopling the Palaces at Venaria Reale) regìa ad Peter Greenaway
- 2012 - Colpi di fulmine, regìa ad Neri Parenti
- 2013 - La finestra di Alice, regìa ad Carlo Sarti
- 2014 - Il pretore, regìa ad Giulio Base
- 2014 - La nostra terra, regìa ad Giulio Manfredonia