Coca-Cola
|
C'l artìcul chè 'l è scrit in
Miranduléś |
La Coca-Cola (ciamàda anc Coke in di Stat Unî o scurtàda dal vòlti in Coca in Itàglia) l'è na bvanda gasàda 'd culōr maròṅ fata par l'indùstria americàna dla The Coca-Cola Company. La sò fórmula, sèmpar tgnùda segréta e anc a 'l dè 'd incō i la cgnós'n in pôc, l'è stada butàda śò 'l 8 ad Maǵ dal 1886 a Atlanta (Geòrgia) p'r al farmacìsta John Stith Pemberton.
L'è vindùda in latìna o in butìglia, ad plàstica o 'd vēdar, e la mùcia sù 37 kcal par sènt gram. La Coca-Cola Company la fà far la bvanda diretamènt a di furnidōr imbutigliadōr internasiunài ch'i s càt'n in di vari paéś dal mónd. Chi lōr i dàsfan al siròp ch'i gh màndan da i Stat Unî in dl'àqua gaśàda.
In di sò ingrediènt a s cata:
- àqua
- sùcar
- culurànt caramèl (E 150D)
- amòma naturài (in mèś a gh'è anc 'n estràt da 'l fój dla piànta dla còca)
- cafeìna
- àcic fusfòric (ch'la gh furnìs un pH 'd 2,4 a 'l incìrca)
Insém a la versiòṅ clàsica dla bìbita, a gh 'n è anc sénsa calurìi (la light e la śèr), sénsa cafeìna e atri incóra cun di gust difarènt (la life par dir-'n una).