Cenerentola (film 1950)
|
C'l artìcol chè 'l è scrit in
Carpśàn |
 Cinderella
| ||
| Cenerentola | ||
.png) La Sendrèintla e 'l Grandùca Monócol in na figùra dal film | ||
| Sendrèintla 1950 | ||
|---|---|---|
| Scritōr: Charles Perrault | ||
| Regìa: Wilfred Jackson • Hamilton Luske • Clyde Geronimi | ||
| Senegiadùra: Bill Peet • Ted Sears • Homer Brightman Ken Anderson • Erdman Penner • Winston Hibler Harry Reeves • Joe Rinaldi | ||
| Personâǵ: Sendrèintla • Giàc • Gas • Tobìa Sgnóra Tremaine • Śenvèfa • Anastàśia Fata Deśminghèina • Prìnsip • Rè • Grandùca Monócol | ||
| Mùśica: Paul J. Smith • Oliver Wallace | ||
| Durèda dal cartòun: 74 minût | ||
| Lengua: Ingléś | ||
| Nasiòun/Paēś: Stêt Unî | ||
Cenerentola (Sendrèintla) 'l è 'n cartòun animê americàṅ dal 1950 prodót dala Walt Disney e tolt da na fóla 'd Charles Perrault.
Sunt
Al pèder dla Sendrèintla al spóśa in secòndi nòsi la madrègna sgnóra Tremaine, mèder dal surlàstri Śenvèfa e Anastàśia. Al nōv idìli famigliêr al n'dura briśa dimòndi però, vist che 'l pèder al mōr ded lè a pôc.
El surlàsi e la madrègna i n'gh'mèten mìa dimòndi tèimp a fèr vèder i só caràter imprufitadōr, invidiōś, tacàgn e tiràṅ. Adês ch'i n'gh'àn gnanc più tanti disponibilitê econòmichi, la nn'è più na vìta agèda, mo a chilōr a n'gh'pêr gnanc véra ed psér desfrutèr la dolsa Sendrèintla in tùti el facèndi ed cà ch'a s pòsa imaginèr. La Sendrèintla, ed bòun caràter, la gh'la chèva 'd tór-la anc cun soquànta filośofìa, ch'la gh'à finànc di amîg pìn ed simpatìa per lē in di surghìn ed cà, in dal vêć cavâl, in dal vêć càṅ e in di pasarôt, ch'a s egh pōl ciacarèr-egh sēg.
Lè in cà i dè i pasarèven tùt cumpàgn s a n'rivìs la nuvitê che 'l śóven prìnsip, vlènd-es spuśèr, al ciama a 'n bâl a castêl tùti el śuvnòti dal paēś, ch'al in vōl sernìr ùna per mujér.
I śmanèś e i sù e śò dal surlàstri per fèr-es bèli p'r al bâl, gl'ìn secònd sōl ala cativèria edla madrègna, ch'l'impinìs la Sendrèintla ed tanta ròba da lavèr e stirèr, che chilē pròpia la n'gh'la cavarèv gnanc ed fèr-es bèla, se i só amìg surghìn e pasarôt intànt i n'gh'ìsen cuśî per lē un bêl vistidèin dignitōś. Vistìda l'è vistìda, petnèda l'è petnèda, mo nò: el surlàstri pini 'd invìddia, n'gh'àn-i da sćianchèr-'gh al vistî e la gulàna?!
Tùt a parrèv pêrs, che 'l surlàsi e la madrègna i partìsen vers al castêl lasènd la Sendrèintla lè in cà a piànśer sàinsa più sperànsa. Mo a 'l impruvìś, na magìa la fà cumparìr lè atēś a lē la fata Deśminghèina, ch'la gh'fà un pò 'd cumplimèint, ala puvrèta, la gh'tira sù al morêl, ch'la gh'fà vèder 'd èser bòuna ed vistìr-la cun un vistî biànc belìsim e finànc la gh'prepèra na caròsa cun un tîr ed cavâl. È tùt véra? Pōl-la dabòun andèr a 'l bâl bèla acsè? Sè, la gh'dìś la madrèina Deśminghèina, ùnica cundisiòun l'è quèla ed turnèr a cà dàint'r ala meśanôt, perchè la magìa la durarà apèina infìn a cl uràri lè.
Cursa in fuga là a 'l castêl, al prìnsip al la vèd subìt, che acsè bèla cum l'ē, la n'pasa minga indiferèinta a nisùn. Al prìnsip al gh'bala sēg tùta la sira, tùt e dū imberiêg ed cuntintèsa.
Apèina apèina, quànd a sòuna la meśanôt, la Sendrèintla la s arcòrda del paròli dla madrèina e dòunca la gh'à da scapèr vìa a lughèr-es, mulènd incòsa al prinsip e 'l bâl. Difât, lughèda drē 'n angol, la caròsa, i cavài, al vistî, i sparìsen 'd un fiê. Ala puvrèta a n'gh'resta in màṅ èter che ùna dal só scarpèti 'd cristâl, che cl'ètra l'era bliśghèda vìa in sìm'a 'l scalòun dal castêl, in dal mèinter ch'l'era drē a scapèr.
Al dè dôp, a 'l grandùca Monòcol, ch'l iva catê sù la scarpèina bliśghèda vìa in dla fuga edla śóvna, a gh'vìn dê al bèl impègn 'd andèr per tùt i dintóren dal castêl a pruvèr la scarpèta 'd cristâl ai pē ed tùti el śuvnòti, ch'la gnarà bèin fóra, cla bèla ragàsa misterióśa dal bâl!
Tùti el ragàsi dal paéś i s fàn bèli per pruvèr-es la scarpèina, mo a n'gh'n è minga ùna ch'la gh'àpia al pē acsè cìc cuma la damèina dal bâl pina ed mistēr.
La madrègna, ch'a gh'è suvgnû che la bèla ragàsa dal bâl la prèv dabòun èser la Sendrèintla, la la sèra sù in dal tasèl ed cà, lughènd-es la cèva edl ùs in dla bisàca: vō-'t che acsè el só do fióli i n'fùs'n el mióri da sernìr?! Ala próva edla scarpèina però, a n'gh'è dùbi che chel do fèti che 'l surlàsi i gh'àn per pē i n'gh's esfrùcen dèinter. "N'gh'è più nisùna ragàsa, in cla cà chè?" al dmanda al grandùca Monòcol.
I amìg surghìn, pasarôt, al càṅ e 'l cavàl i gh'àn però ciavê la cèva, ala madrègna, i àn tolt fóra la Sendrèintla da 'l tasèl, e chilē, in bèrba a tùt, la fà vèder ch'l'è pròpia lē ch'a s serchèva.
Evìva i spōś, dòunca!
Colegamèint estèren
- (EN) La schéda dal film in sìm'a 'l IMDb.
- (IT) La schéda dal film in dal FilmTV.